VOV4.M’nông: Đah rlau du ha neh tăm ba ndrel tăm byăp ăp ntil, tâm năm 2021, bol ma geh rnôk mâp nau jêr mpeh ntŭk tăch yor geh nau khuch bah srê Covid-19, yơn rnơm nau tăm tĭng nau kan klôn bêl, rnăk wa K’Pìn, tâm xã Đạ Ròn, nkuăl Đơn Dương n’gor Lâm Đồng hôm đăp mpăn nau geh jêng ân rnăk vâl. Ngăn lah, lôch du năm tuch tăm, nkŭp prăk dŏng ƀư nau kan tuch tăm ndrel nau ngêt sa, rnăk wa hôm geh têm rlau 60 rkeh prăk. Ndri ma, têt kŏ geh rnăk wa rvăt ăp tŏng ndoh ndơ gay ma nsum rhơn ma ƀon lan. Wa K’Pìn, ngơi:

‘Di rnôk tết aơ, rnăk gâp tăm geh rlau du sào kao, kŏ mô geh âk ôh, rnoh ri nsing tâm ntŭk bu rvăt, tăm đê̆ ri geh đê̆, tăm âk ri geh âk. Êng tăm ba, ri rnăk hên kŏ geh ƀư tay ăp ntil byăp kao. Bol ma rnoh geh rnôk aơ rnôk êng, yơn lah rnăk hên hôm geh mbơm oi đŏng. Tết aơ rnăk hên ƀư kơt bu dê đŏng, moh ndơ geh ri nơm rhơn ma ndơ nê. Kŏ ƀư gŭch djăr, kik, jêh ri ngêt ndrănh yăng gay ma jă oh nô tâm ƀon lan tât ngêt sa nsum, tâm pă nau ueh m’ak ma rnăk vâl”./.

Nŭih rblang: H’Thi