VOV4.M’nông: Tâm trôm bôk nău kan tâm mâp Gia Lai-Nhật Bản 2022, mhe rlău, N’gâng kan Ngoại vụ n’gor Gia Lai tâm rgop đah Trung tâm dịch vụ Đối ngoại n’hanh Rƀŭn nchră Lam ntŭr neh-FSC (N’gâng kan ngoại vụ nkual ƀon têh Hồ Chí Minh) n’hanh Ntŭk tâm nđŭr Việt Nhật ƀư rgum nchră “Nău geh n’hanh nău dơi ntuh kơl đah Gia Lai n’hanh ăp n’gor bah Nhật Bản”. Rgum nchră wăch râng rhiăng doanh nghiệp tâm n’gor n’hanh doanh nghiệp tât bah Nhật Bản râng n’hanh mĭn joi gĭt ăp nău dơi ntuh kơl, tâm rgop.

Gia Lai aƀaơ geh rlău 800.000ha neh chăng baza, ndrel trôk nar uĕh, tâm di hun hao tơm jŏ năm, mât rong ndrôk rpu, tăm bri. Aƀaơ, n’gor geh rlău 500.000 ha tơm tăm khlay geh cà phê, cao su n’hanh tiêu, đah rnoh geh ăp năm rhiăng rbăn tấn du ntil. Ndrel đah nĕ, Gia Lai lĕ ndâk ƀư geh ăp ntung trong ndơ dŏng hun hao công nghiệp kơt 3 nkual rkum công nghiệp đah dĭng lĕ bơi 1000ha; yơn nĕ lah ntung trong hăn geh 1 tach ndeh păr n’hanh 3 trong quốc lộ, âk trong tỉnh lộ, kơl nău tăch rgâl đah ăp nkual tâm dak n’hanh đah ăp dak băl Lào n’hanh Campuchia dơh lơn. Ta n’gor geh rnoh duh n’hanh sial wăr năm, tâm di hun hao điện ê nkra mhe. Bah meng nĕ, n’gor geh âk ndơ hun hao pâl nđaih. Yor, ntŭk aơ geh nghệ thuật Chĭng gông Tây Nguyên dơi kơp dơn lah drăp ndơ ơm yău văn hóa mô mpơl săk bah kon nuĭh, Ntŭk ntêm nkrem sinh quyển lam ntŭr neh Cao nguyên Kon Hà Nừng, ăp Di tích ngih dak khlay Tây Sơn Thượng đạo, Nkual khảo cổ Rộc Tưng-Gò Đá n’hanh âk ntŭk uănh nsong uĕh.

Ntŭk rgum nchră

Ta rgum nchră, ăp nuĭh ntuh kơl bah Nhật Bản ôp tât ntoh măt bah UBND n’gor Gia Lai, ăp nău kan kế họach đầu tư, công thương, lŏ mir n’hanh văn hóa thể thao n’hanh pâl nđaih gay ƀư kloh ăp nău ôp mpeh ntŭk ntô ntuh kơl, nău mât ntŭk ntô gŭ âm n’hanh mpeh nău kơt dŏng ăp nău kơl an mpeh soay, sam ƀŭt sam tra đah nuĭh ntuh kơl dak bah dih. Wa Shimizu Akira-Kruanh ntoh măt văn phòng ngih pah kan ndrel lam ntŭr neh Nhật Bản (JICA) nkoch mpŏng ŭch, Gia Lai rgâl tay du đêt nău gay ăp doanh nghiệp Nhật Bản đăp mpăn ntuh kơl jŏ jong:

Băng: “N’gor an nta nơih gay ăp nău kơl an ntuh kơl dơi ƀư du trong nâp nâl. Na nê̆ kơt, n’gor tĭng ntop kơl an doanh nghiệp ntuh kơl tâm rgop uĕh đah nuĭh pah kan, mô lah ngih măy an dơi kơl an ŭnh nar gay đăp mpăn tŏng điện an nkra njêng. Ăp nău nsrôih kơt nĕ mbra kơl nuĭh ntuh kơl đăp mpăn ntuh kơl tăch rgâl nkra njêng tâm n’gor”.

 Ta rgum nchră, wa Hồ Phước Thành-Groi Kruanh UBND n’gor Gia Lai an gĭt, nău ntrôl dăng wăch rgum ăp nuĭh ntuh kơl hun hao lŏ mir, công nghiệp nkre njêng, công nghiệp ŭnh nar nkra njêng n’hanh pâl nđaih dơi n’gor mĭn lah ngoăy tâm âk nău kan khlay tâm năm kan 2020-2025. Gia Lai ŭch, jă doanh nghiệp dak bah dih, tâm nĕ geh doanh nghiệp tât bah Nhật Bản ntuh kơl an ăp nău kan. Nău aơ nkre kơl doanh nghiệp ê nkra, geh rnoh khlay hao bah ăp nău geh ơm ta n’gor; nkre ntop kơl n’gor nti, jao an ăp nău blău ơm mât uănh kỹ thuật, công nghệ mhe. N’gor Gia Lai ton hăn ndrel, ntop kơl doanh nghiệp:

N’gâng kan Ngoại vụ n’gor Gia Lai, Trung tâm Dịch vụ Đối ngoại n’hanh Rƀŭn nchră lam ntŭr neh (FSC) n’hanh Ntŭk tâm nđŭr Nhật-Việt lĕ ký ton kan ndrel têh hvi.

“Mpôl hên geh nău knơm hăn ndrel đah doanh nghiệp n’hanh nta an nơih, kơl, dôh rklaih jêr jŏt an doanh nghiệp. Nkre mpôl hên rgâl ntŭk ntô ntuh kơl, m’hâm ƀư an doanh nghiệp nơih ngăn. Tă bah nar aơ, mpôl hên dŭt rhơn, geh âk doanh nghiệp Nhật Bản, đê̆ đŏng ta Nhật Bản ƀư trực tuyến gay mĭn joi gĭt. He mư ndơ̆ an bôk nău kan, hôm pah kan, ri ăp doanh nghiệp mbra mĭn joi đah ăp công ty, tập đoàn”.

Gay nchrŏng trong mbơh ƀư săk rnglăy rgum nchră, wa Hồ Phước Thành, Groi Kruanh UBND n’gor Gia Lai, năl lah, Nhật Bản mô di lah du ntŭk nuĭh nơih, ăp doanh nghiệp Gia Lai mô dơi geh dâl ăp sam ƀŭt ndơ têh ma an hăn tĭng gưl rlăp, nâp nâl, tâm nĕ nsrôih an rgâl mhe, kơt dŏng khoa học công nghệ an nkra njêng, mô rlu n’hao uĕh ndơ.

Di rơh aơ, N’gâng kan Ngoại vụ n’gor Gia Lai, Trung tâm Dịch vụ Đối ngoại n’hanh rƀŭn nchră Lam ntŭr neh (FSC) n’hanh Ntŭk tâm nđŭr Nhật-Việt lĕ ký ton kan ndrel têh hvi; n’hanh 8 doanh nghiệp ta Gia Lai n’hanh Nhật Bản lĕ ký ton sam ƀŭt kan ndrel tâm nău pă manh, tăch ndơ lŏ mir n’hanh jao an công nghệ nkre njêng./.

          Nuĭh rblang: Y Sưng Phê Ja