VOV4.M’nông: Ngoai tâm ăp nau kan khlay gay ndâk nau kan văng sa lah lah nau ntrŭt dăng văng sa tơm prăk, leo trong lăp tâm nau kan kơl an lor, nau kan tơm. Rnơm tâm nau hun hao ndâk văng sa, âk ngân hàng dôl ndơ̆ nau kan hun hao đê̆ ngăn lah 20-30% tâm năm aơ ngăn lah nsing tâm nau tăch rai, ân manh ân êng nơm, ân manh neh.

Tĭng rnoh kơp tă bah Ngân hàng Ngih dak, tơm prăk tât lôch khay 2 hao 1,82% rđil dŭt năm 2021. Kŏ tĭng rnoh bah Ngân hàng Ngih dak, dŭt năm 2021, rnoh rnon ân manh prăk geh 10,44 rkeh rmen. Kơt ri, tâm 2 khay bôk năm, ntrong kan ngân hàng hŏ ân manh ƀư nau kan văng sa rlau 190 rbăn rmen prăk. Bah năp nê, Ngân hàng Ngih dak mbơh, rnoh ân manh prăk hŏ geh nklăp 2,74% tâm khay 1/2022, tâm ban ma 286 rbăn rmen. Aơ lah rnoh prêh ngăn tâm khay bôk năm. Ăp nŭih ƀư nchră nau kan kŏ ndơ̆ luh nau kan ueh nâp ngăn mpeh nau dơi ân hun hao tơm prăk tâm năm aơ. Tĭng nau mbơh bah Công ty chứng khoáng BSC, nau geh ŭch tơm prăk năm 2022 mra hâo prêh lơn ndrel hao 14% geh kơl an yor nau kan ndâk njêng văng sa jêh bah srê. Êng nê, nau kơl an nklăp geh 350 rbăn rmen tâm 2-3 năm tât kŏ rgop nau hun hao tơm prăk. Groi Thống đốc Ngân hàng Ngih dak Đào Minh Tú, mbơh:

‘Năm 2022 phung hên mra lŏ rđau nau ntrŭnh tơm prăk tĭng trong ueh mhe, pơk trong nơih ueh ngăn ân ntŭk kan tăch rgâl, kơl an rnoh prăk ân jâng văng sa. Tâm nau rđau ƀư nau kan tơm prăk ri phung hên mra mât ân dăp tâm nau ndâk njêng văng sa bah Chính phủ, đăp mpăn nau dơi nkân nau hao khlay, đăp mpăn tơm prăk, đăp mpăn nau geh rnoh bah prăk kaih, đăp mpăn nau dŏng rnoh kŏ kơt lah nau mât ueh ngăn bah tơm prăk, ntŭk tăch rgâl mah”

Mpeh nau pă tơm prăk ân jâng văng sa, Ngân hành Ngih dak lŏ ƀư ăp nau kan gay ma nkân rnoh geh tơm prăk, geh nsum ma nau hun hao khlay bah tơm prăk. Nkre, ngân hàng rđau tơm prăk ân manh geh hun hao ân nâp, tam, rgum tơm nau leo nkân ăp nau khuch bah neh ntu, chứng khoán, aơpư nau kan BOT, BT gung trong, n’hao nau mât nau khuch đah nau ân manh kơl an văng sa, tơm prăk ân manh, pơk trong nơih ân ntŭk ƀư kan ndrel ƀon lan geh prăk ngân hàng. Wa Hà Thu Giang, Groi Kruanh nau kan tơm prăk, Ngân hàng Ngih dak mbơh:

‘Tơm prăk lŏ lăp tâm 5 nau kan geh kơl an lor, ndrel 5 nau kan aơ kŏ geh rnoh hun hao âk lơn tâm ăp nau kan nsum, 5 nau kan kơl an lah tuich tă, ƀon lan, ntŭk kan tăch rgâl bah găp ndrel jê̆, tăch luh, ƀư nau kan kơl an ndrle công nghệ prêh kŏ geh lah n’gâng dră bah jâng văng sa, yor nau rƀŏng năm 2022 bah Ngân hàng Ngih dak kŏ kơt lah rgum tâm tơm prăk ân manh lăp tâm nau kan aơ”.

Mhe aơ, rmôt ƀư nau kan bah Ngân hàng bah rơh tâm nchră ƀư nau kan tăch rgâl bah Việt Nam (VBF) đă Ngân hàng Ngih dak uănh mhe nau ân manh gay ăp ngân hàng geh âk ntŭk ân manh, kơl an ăp rmôt ƀư nau kan, ngăn lah ăp rmôt ƀư nau kan bah gaơpư ndrel jê̆ rnôk ŭch. Nau kan pă ân tơm prăk ân manh mô knŭng lah nau mât kan, nau rđau trong ƀư prăk kaih tĭng nau mhe, nau kan tăch rgâl. Nau kan ƀư dŏng dơi mra ƀư geh tâm nau ryơk rưih lơi tâm nau kan lah mô kâp ƀư trong ân manh kơt ăp ngân hàng ƀư nau kan tŏng dơi nau ŭch bah du ntŭk hun hao. Nŭih kơl nchră ƀư nau kan Nguyễn Trí Hiếu ân lah, tâm ăp khay tât, nchrăp nau ŭch mpeh tơm prăk bah ntŭk ƀư ân manh ân ăp ngân hàng geh mra geh nau săk rnglay ân ăp năch ndrel ăp ntŭk kan. Ngân hàng Ngih dak ân jăng lơi nau ân nchâp ƀư nau kan geh tât tơm prăk gay ăp ngân hàng ƀư nau kan tăch rgal êng nau kan bah nơm. Wa Nguyễn Thanh Tùng, Groi Tổng Giám đốc Ngân hành Ngoại thương Việt Nam Vietcombank lah rjăp nau ân manh tơm prăk pă mhe mra dŏng gay kơl an nau kan tăch rgâl ndrel ndâk văng sa:

‘Ăp nau nchrăp ƀư nau ân manh prăk tâm Ngân hàng ân nau manh ntop tay. Vietcombank mra dŏng tơm prăk ân ăp nau kan khlay bah jâng văng sa, ndâk nau kan tuch tăm tăch rgâl kŏ kơt lah nau rêh bah ƀon lan”.

Nau mbơh mpeh ngân hàng mhe bah Công ty chứng khoán Rồng Việt (VDSC) kŏ mbơh tâm năm aơ, ăp nau kan ndâk văng sa mra geh ƀư ueh lơn tâm ntŭk kan ngân hàng. Ăp rnoh kơl an ƀư nau ueh khlay tâm nau mât đăp mpăn nau rnưom bah ăp ntŭk kan, rgâl ƀư nau luh lăp ndrel rnoh prăk nkre n’huch nau khuch mpeh tơm prăk đah rnoh nsing tâm nau kan, nau geh dnrle nau săk tam bah nau kan leo dŏng ndrel ndâk văng sa. Tâm rnôk nau kan tăch rgâl geh n’hao prêh lơn ri nau khuch mpeh tơm prăk bah jâng văng sa. Ntơm bah nê, ntrŭt dăng nau pă-dŏng mpeh tơm prăk. Bol ma ndri, rđau kan du đê̆ ngân hàng kŏ kơp dơn hôm ơm ăp nau khuch mpeh nau hao khlay ndơ, nau mbrơi ndâk bah du đê̆ nau kan...yơn lah uănh nsum, nau hun hao văng sa năm aơ hôm ueh lơn năm e. Ngân hàng lah ngoai tâm ăp ntŭk kan geh mpŏng lah mra hun hao ueh ngăn tâm năm aơ./.

Nŭih rblang: H’Thi