Ơi kônh wa ƀon lan, ndrăng băl n’hanh tahen lam dak!

Khay năm mhe hŏ tât đah ăp nuĭh, ăp rnăk! Tâm du ƀât du rân tâm rgâl uĕh reh n’hanh huêng khlay bah trôk neh, he chŭn mbah nkah gĭt ăp yău ye, ăp rơh u che me bơ̆ hŏ âk rơh rdâk njêng, cheh tanh  jêng bok sut bok hul neh dak, an khay năm  mhe đăp mpăn, ƀon lan dơi rêh dah rŏng, hơm răm, rhơn nđơr, an săk geh uĕh ndrŏng, têh lư, nsing nơm neh dak nar aơ.

Tâm mông nar răm mƀak, huêng khlay wơt Tết way ơm rnoi nuĭh, ntơh măt kruanh rđău kan Đảng, Ngih dak, gâp dăn njuăl tât kônh wa ƀon lan, ndrăng băl n’hanh tahen lam dak, ƀon lan he gŭ dak bah dih ăp nău tâm rŏng dŭt dêh bên, nău ôp khâl lĕ nuih n’hâm ngăn n’hanh nău  mbah rhơn năm  mhe dŭt uĕh lăng. Dăn njuăl tât băl mpôl lam ntŭr neh, ƀon lan ăp dak lam ntŭr neh dăn an nău đăp mpăn, tâm boh, tâm rnglăp n’hanh hun hao nâp dăng!

 Năm rlău aơ, đah nău tâm rnglăp, nău nsrôih bah  lam Đảng, lam ƀon lan, lam tahen, neh dak he hŏ năl dơi ntŭk gŭ têh mhe, nău lư mhe bah du dak Việt Nam rôih dăng  tâm krit jêr, way rôih tĭng ăp  rnoh khlay uĕh, yor nău geh bah ƀon lan, geh ăp nău dơi khlay, lam lĕ rngôch ta ăp trong kan đah ăp nkah uĕh ntoh lư; way lah nuĭh băl uĕh ngăn, nuĭh  tâm  boh nsing nơm bah ăp dak, dơi  băl mpôl lam ntŭr neh uănh khlay, rnê âk.

Giao thừa lah rnôk rngân jru gay he nklân êng mpeh ăp ntil nău hŏ rlău, mĭn rvê mpeh trong hăn chrat ang let năp tay bah  ăp nuĭh, ăp rnăk n’hanh bah rnoi nuĭh. Gâp nsing nơm ngăn lah, ntik n’hao suan dăng tâm rnglăp lam rnoi nuĭh n’hanh ăp rnoh khlay uĕh lăng bah văn hóa, kon nuĭh Việt Nam, mpư n’hao rnoh khlay nuih n’hâm uĕh lŏng, bôk rngot n’hanh ntơm pơk suan njêng mhe tâm ăp nuĭh, n’gluh ăp săk geh, mbluh lhoi ăp tơm suan, mbra njêng luh suan dăng têh kuâng, gay rnoi nuĭh he nâp jâng chuat hao geh tât âk nău dơi lơn đŏng.

Khay năm mhe pơk  luh mô gĭt dah âk nău nđơr, wơl geh n’hanh ăp bôk ntơm dŭt uĕh lăng, dŭt răm mƀak, dŭt bêng ler suan rêh. Tâm  mông nar khay năm mhe bah trôk nar n’hanh năm mhe bah nuih n’hâm kon nuĭh rgum wăch, tâm lăp nsum, he ân ndrel wơt dơn ăp  tơm suan rêh mhe, tâm an nsum ăp nău mpŏng geh ngăn, uĕh lăng, ndrel dăn an rnoi nuĭh rêh mbro, an neh dak  nar lơn ma hao geh uĕh ndrŏng, rsang rnglăy, an nău rêh ƀon lan nar lơn ma hơm răm, rhơn nđơr!

 Dăn an ƀon lan, băl mpôl, ăp rnăk, ăp nuĭh ƀon lan Việt Nam n’hâm suan ngăch lăng dăng soih, ngăch manh, geh nău dơi n’hanh rhơn mƀak!

Năm mhe, nuih n’hâm nsan mhe, nău nsrôih mhe, geh nău dơi mhe!  

Dăn nău uĕh lăng!