VOV4.M’nông: Khay 6/2021, Thủ tướng Chính phủ hŏ geh nau ntrŭnh mrô 984 ntrŭnh nau ntrŭnh mrô 82 năm 2020 bah Bộ chính trị gưl XII. Chính phủ đă ăp n’gâng kan, ntŭk kan, nkuăl ntrŭnh ân tŏng, nâp ngăn nau rđau kan, nau ntrŭnh bah Bộ chính trị. Bah nê, rklaih ăp nau kol, nau ê dơi, mô nâp, ƀư ngăn du đê̆ nau kan, nau ntrŭnh khlay gay ma doh rklaih ăp nau kol tâm nau kan dăp rgum, rgâl mhe bah công ty mât njrăng bri ma nau ngăn dôl ŭch. Lôch âk nau nchih “Nau ntrŭnh 30: Nau ŭch ngăn bah bah công ty mât njrăng bri tâm Tây Nguyên”, bôk nau ntuh nar aơ geh nau ntơ “Nau mpŏng ŭch, kâp rnơm bah nkuăl, ntŭk ƀư nau kan tăch rgâl”.
Tâm rnoh 16 công ty mât njrăng bri bah n’gor Dak Nông, geh 3 rmôt kan ƀư kan cổ phần, 6 rmôt kan hŏ nsrŭng kan. wa Nguyễn Xuân Tuấn, Kruanh Jrâu kan Đăng kí ƀư nau kan tăch rgâl, N’gâng kan nchrăp kan-ntuh kơl n’gor Dak Nông mbơh, ăp công ty kŏ geh neh rlau 500 ha, tĭng nau rđau tâm mrô 82 bah N’gâng kan chính trị ri ân geh ƀư đăp mpăn nau dơi tâm rgop kan bah Ngih dak đah ăp công ty aơ. Tâm rnôk nê, nau kan dăp rgum, ƀư nsum rnôk aơ tâm nkuăl hôm geh âk nau nkol mpeh âk ding, ân geh ƀư ân ơm ueh tĭng nau rƀŏng, nau rđau tâm nau ntrŭnh 82 gay ma lŏ ntrŭnh ndrel doh rklaih:
‘Ƀư tĭng nau ntrŭnh 82 bah Bộ chính trị ri đah ăp công ty geh rnoh neh têh, rlau 500 ha hao gŏ lơ ri Ngih dak mra mât cổ phần gay pă. Lah geh dơi đăp mpăn nkre nau kan dăp rgum ân tâm di, nau kan rƀŏng trong ri mra dơi geh mât tay nau kan công ty du ntŭk kan. Rnoh rnon hôm e mra geh nkân ndrel geh ntrong gay ma rklaih lơi”.
Wa Lê Danh Thắng, Groi Giám đốc N’gâng kan tơm prăk n’gor Dak Lak, mbơh, jêh rnôk geh nau ntrŭnh mrô 82 bah Bộ chính trị, n’gor hŏ nsrŭng nau kan dăp rgum, ƀư jêng cổ phần tâm 6/15 công ty mât njrăng bri (9 công ty êng hŏ ƀư jêh nau kan rgum nsum ndrel jêng nau kan 2 rmôt kan). Tĭng wa Thắng, nau kan nkân uănh, rgâl nau kan, nau kơl mra dơi rklaih kơl an geh du đê̆ nau jêr, nkol, ngăn lah nkol mpeh tơm prăk đah ăp rmôt kan geh rklaih nsrŭng:
‘Dak Lak geh 3 ntŭk ƀư nau kan tăch rgâl dôl geh rklaih lơi rnôk ndâk du nau kan mô hôm geh nau tâm ban, kơt lah păng mô hôm geh sa, mô hôm geh tŏng gay ma trok tâm. Nau aơ tâm nau ntrŭnh mrô 82 bah Bộ chính trị păng hôm geh du nau êng đŏng nê lah tơm prăk mra roh nau kơl an nau kan ân geh tâm ban gay đăp mpăn geh prăk trok, tŏng nau dơi gay ma rklaih ân ntŭk kan tăch rgâl”.
Wa Trịnh Đình Trường, Kruanh Hội đồng Quản trị, Tổng giám đốc Công ty cổ phần Cà phê Gia Lai ndrel công ty cổ phần chè Biển Hồ, ân lah, nau ntrŭnh mrô 82 bah Bộ chính trị hŏ ân ntŭk kan tăch rgâl saơ geh nau dơi tâm nau rklaih ăp nau nkol tâm nau kan, nau ƀư ndrel pháp luật rnôk aơ. Tâm nê, lah rjăp, nau kan ntrơn rgâl, ntop tay ăp nau ntrŭnh geh nau dơi mpeh tơm prăk, soay ndrel geh tât tơm prăk ân manh:
‘ Nau nkoch aơ lah nau nkoch tih êng mpeh luật, ăp nau ntrŭnh, Nau ntrŭnh bah năp nê ê geh nau rgâl ân tât nơm, yor nơm lah nŭih mhe. Nau ntrŭnh bah Bộ chính trị ân geh nchâp dŏng tâm nau ngăn, dơi geh lăp hăn tâm nau rêh, tât ăp ntŭk ƀư nau kan tăch rgâl păng lah du nhoat hăn jong”.
Uănh nau kan dăp rgum, rgâl mhe, ƀư rgum ntŭk kan mât njrăng bri tâm n’gor Tây Nguyên, wa Nguyễn Lâm Thành, Groi Kruanh Hội đồng Dân tộc bah Quốc hội lah, nau mât kan, dŏng neh ntu rnôk aơ hôm âk nau ê dơi. Tĭng wa Thành, lŏ ƀư nau ntrŭnh mrô 30 bah Bộ chính trị ri ndrel rgâl nkra, ntop tay ăp nau kan, nau kơl an ngăn tĭng ăp nau kơl an bah ntŭk kan tăch rgâl hun hao, kŏ lah jut jăng lơi ăp nau kan, ntrong kan kơl an hô ir, ê geh tâm ban:
‘Đah nau ntrŭnh mpeh ntrong kan pháp lý rnôk aơ, phung he jao neh âk, mât njrăng âk jêh ri ân manh đah rnoh dêh ngăn. Yor nau ê dơi tâm nau kan tơm prăk neh ntu ƀư jêng nau kan ƀư nau mât mô hôm geh săk tam. Ndrel ngăn lah, păng jêng tât nau kan in, sŏk dŏng. Mpeh nau n’hao nau mât nau săk tam bah nau dŏnh neh ntu bah ntŭk mât njrăng bri ngăn lah ntrong kan tơm prăk mpeh ntu ntu ri gâp đă Chính phủ ân geh rgum mĭn, rklaih nau kan aơ”.
Tâm ăp nau kan bah nau dăp rgum, rgâl mhe, ƀư ân rgop nsum bah ăp công ty mât njrăng bri, Kruanh Quốc hội Vương Đình Huệ ân lah, nkol mpeh neh ntu lah nau kan jêr ndrel ân geh rklaih du trong ueh nâp. Kruanh Quốc hội ngăn ngên uănh nkah nau kan jao neh ntu bah ăp công ty mât njrăng bri ân ma nkuăl rnôk aơ hôm âk nau nkol, nau ê dơi ndrel đă Hội đồng nhân dân ăp n’gor geh nau nchrăp uănh. Tât aơ tă, Quốc hội kŏ mra uănh nau ndâk tay nau uănh mpeh nau kan aơ:
Nkô̆ nau rgâl mhe nau kan mât, n’ăp mpeh tơm prăk, n’ăp mpeh nau kan ê nkra lah nsum hôm âk nau gay ma ƀư ngăn. Nkô̆ nau gay ma n’hao nau geh tam dăch dŭt bah ăp công ty mât njrăng bri, rgop âk tay tâm nau n’hao ndrel tơm prăk Ngih dak ri hôm geh nau tâm ƀah. Rnoh ntu neh bah ăp công ty mât njrăng bri ntrơn sĭt ân n’gor ri rnoh dêh ngăn. Tal bar, neh ntu ân ăp nkuăl geh rnoh ƀư nau ntrŭnh gay ma sŏk nkân lơi neh ndrel geh nau dŏng neh ntu ri hôm dêh ngăn. Tâm rnôk kônh wa ƀon lan nơm, ngăn lah kônh wa rnoi nkuăl gôl yôk, rnoi mpôl đê̆ mô geh neh gŭ, mô geh neh tuch tăm. Aơ lah nau kan nơm ân geh uănh njrăng kơl an, ân geh ăp nau kan ân tâm di”.
Mra dơi lah, ăp nau kan bah nau dăp rgum, rgâl mhe, ƀư rgum nsum bah ăp công ty mât njrăng bri tâm lam dak lah nsum, Tây Nguyên lah êng, hŏ geh rđau kan Đảng, Ngih dak uănh ndrel ndơn ma kơl an rđau, đă gay ma ơm rklaih ăp nau nkol nau ê dơi, nau mô nâp./.
Nŭih rblang: H’Thi
Viết bình luận