Hŏ jêng nau mơng, tâm lơ 10/3 âm lịch ăp năm, wa Tạ Thị ka, tâm Phường Thống Nhất, nkuăl ƀon têh Buôn Ma Thuột lŏ tât ntŭk nkah ơm bah neh dak Đình Lạc Giao, tâm nkuăl ƀon têh Buôn Ma Thuột gay ma râng Giỗ tổ Hùng Vương. Wa Tạ Thị Ka mbơh, ƀon păng ta Hưng Yên, tât gŭ tâm Dak Lak bơi tât 50 năm ma aơ. Ăp năm bah năp nơh, rnôk hôm druh, ăp năm păng kŏ sĭt tât Phú Thọ gay ma râng lễ giỗ Tổ. Yơn nklăp 10 năm ma aơ, wa rƀŭn nsum đah rmôt bu ranh tâm Đình Lạc Giao. Ndri ma, nar êp tât, nau nchrăp kthup, ŭnh jrêng, ndơ ôp brah lơn ma âk ntil ngăn:

            ‘Gâp saơ nau nchrăp ăp ntil ueh ngăn ndrel lah nsum lam ƀon lan rƀŏng tât nar Giỗ Tổ, ƀư rjăp ndrel geh âk nau ƀư ăp ntil đŏng.  Nau khuch răm bah ƀon lan ta aơ ri nkre rhơn geh ntô̆ n’hao săk jêh ri ŭch sĭt tâm ăp ntŭk geh ƀư ôp brah ăp Kđăch Hùng gay ma mpoh kthup rƀŏng tât tu tơm”.

            Tâm ntŭk nkah ơm neh dak Đình Lạc Giao, ăp năm lễ Giỗ Tổ Hùng Vương geh ƀư ueh, đah nau râng bah ăp rđau kan n’gor, ăp ntŭk kan ndrel ăp kơn ƀon lan. Ăp nŭih ƀon lan kŏ mpoh kthup rƀŏng nkah, ƀư nau mbah Quốc tổ Hùng Vương. Râng nar aơ, yuh Nguyễn Thị Ngọc Hà, tâm Phường Thống Nhất, nkuăl ƀon têh Buôn Ma Thuột, ngơi:

‘Lễ giỗ tổ 10/3 ri đah ma gâp lah du đoàn viên, druh ndăm tâm nkuăl ƀon têh Buôn ma Thuột ri gâp rhơn ngăn, rhơn rnôk râng nar rƀŭn. Bah nê ri hên geh ăp nau gĭt lơn mpeh nau vay bah rnoi mpôl Việt Nam nơm, nkre ma kŏ lah rnôk gay ma hên râng tâm ăp nau kan kơl an êng êng gay ma rgop nau ƀư ueh lơn tay nau vay ơm bah rnoi mpôl Việt Nam”.

Mô êng tâm Dak Lak ma ăp n’gor Tây Nguyên, Lễ Giỗ tổ Hùng Vương geh ƀư rjăp, ăp ntil. Ta Lâm Đồng, ntơm năm 2022, Đền thờ Âu Lạc geh ndâk tâm yôk Phượng Hoàng, tâm ntŭk pâl n’aih thác Prenn, Phường 3, nkuăl ƀon têh Đà Lạt, n’gor Lâm Đồng. Tĭng wa Phan Thị Thuý Vi, nŭih ntĭm nau pâl n’aih ta nkual ƀon têh Đà Lạt mbơh, ntŭk aơ geh ndâk tĭng nau ƀư kơt ma Đền Hùng ta Phú Thọ đah nau “rveh chôn kô̆ mâ, giau kâp dâp, bih yŭk kăk kâp”, jêng du ntŭk rgum âk ƀon lan ndrel bu năch tât nar Giỗ tổ ăp năm:

‘Đền thượng lah Đền ôp brah Lạc Long Quân ndrel Mẹ Âu Cơ, tâm ntŭk prêh ngăn rđil ma măt dak lêng lah 1.250 mét, hăn jâng ntơm bah dâng tât yôk prêh nê nklăp 630 jâng gung lah tât yôk Phượng Hoàng. Jêh đền Thượng lah hăn jur Đền Trung, ntŭk ôp brah tal pơh ndrel jur đŏng lah đền Hạ lah ntŭk ôp brah Kđăch dăch dŭt bah Kđăch Hùng. Ta aơ ri ntŭk ueh ngăn, hvi đŏng bay ƀư nau kan hội trại, nklâm bánh chưng ăp năm. Hôm ta Đền Thượng ri ăp nar 10/3 geh nau ƀư mpoh kthup, ôp brah ăp Kđăch Hùng”.

Bôk năm aơ, UBND n’gor Dak Lak hŏ geh nau njoăl Thủ tướng Chính phủ mpeh nau đă ndâk ntŭk ôp brah Kđăch Hùng tâm nkuăl Tây Nguyên tâm n’gor. Tĭng nê, n’gor rgum tơm prăk rgop gay ma ndâk ngih brah Kđăch Hùng bah nkuăl nklăp 20 ha, tâm yôk Cư Mblim, tâm xã Ea Kao, nkuăl ƀon têh Buôn Ma Thuột ndrel Xã Ea Tiêu, nkuăl Cư Kuin. Nau ntuh kơl nkra ntŭk ôp brah Kđăch Hùng gay ntoh nuih n’hâm đah ăp nŭih geh n’hâm dâk dak ndrel mât neh dak, ntĭm nti nau vay “ngêt dak nkah gĭt tu”. Nkre kơl an nau ŭch ôp brah bah rnoi mpôl, lah nau ŭch bah âk mpưm ƀon lan n’gor Dak Lak kŏ kơt lah ăp n’gor Tây Nguyên. Wa Lại Đức Đại, Groi Giám đốc Sở Văn hoá, Thể thao ndrel pâl n’aih Dak Lak mbơh, Ntŭk kan Chính phủ hŏ geh nau nkoch mbơh tât nau đă ntop du đê̆ nkô̆ nau geh tât gay ƀư jêh săm ƀŭt kan:

‘UBND n’gor kŏ jao ân Sở Văn hoá-Thể thao ndrel Pâl n’aih dâk dăn nau mbơh bah ăp ntŭk kan, n’gâng kan gay ma ntơm ƀư ăp nhoat gay ndâk ntŭk ôp Brah Kđăch Hùng tâm nkuăl Tây Nguyên ta Dak Lak. Tât rnôk aơ ri ăp nau kan dôl tâm rnôk mbơh ƀư ăp nau dăch dŭt tĭng nau đă bah Jrâu kan Chính phủ. Tâm gưl n’gor ri rƀŭn, ăp ntŭk kan dăn tay nau đă ndrel kŏ tâm ban geh ăp nhoat tay gay ma dăn nau đă bah Thủ tướng ân ƀư”.

Ntơm năm 2012, Ntŭk kan UNESCO hŏ ntơm kơp dơn nau ƀư ôp brah Hùng Vương ta Phú Thọ, Việt Nam lah du ntil ndơ ơm ntoh măt bah rnoi mpôl. Nau aơ lơn ma lah rjăp nau ŭcjh ueh khlay bah nau ôp brah yang bah nsum mpôl ăp rnoi Việt Nam. Kŏ kơt lah nŭih ƀon lan lam dak, ăp nar aơ, nŭih ƀon lan tâm nkuăl Tây Nguyên ndrel rƀŏng tât neh yau đah nuih n’hâm ntô̆ n’hao, nkah gĭt./.