Lah ngoay tâm 5 ntuk rdul lơh gay ma rklaih Sài Gòn, Quân đoàn 3 đah nău kan lah pit in tach ndeh păr Tân Sơn Nhất n´hanh bộ Tổng Tham mưu - leo tơm bâh mpôl rlăng. Gay ma pit in ăp ntuk khlay aơ ta di nar 30/4 lich sư, Quân đòan le geh ăp nău leo lan tahen dut êng, ngăch ngăr n´hanh răng dăng. Trung tướng Nguyễn Quốc Thước, Rnôk ne nơh mât ƀư năy kan lah kruanh tham mưu kruanh Quân đoàn 3, nuih leo du ntuk rdul lơh ta Sài Gòn le nkoch ăp nău lahgit mô dơi chuêl ta nar rklai đăp mpăn.

Tach ndeh păr  Tân Sơn Nhất n´hanh Bộ Tổng Tham mưu le rklaih đăp mpăn le rngôch ta rnôk 11h30. Kơt ne Bâh ntơm 11h tât 11h30 le 5 ntuk ta Sài Gòn geh rklaih đăp mpăn ndrel du rơh. Nău rhơn rnôk ne lah mô dơi nkoch, lôch geh in dinh đôc lâp, rklaih đăp mpăn lôch ne plơ sit tâm nuih n´hâm hên dut rhơn ngăn, yơn geh du nău, mô hôm geh wa Hô. Rnôk mpôl hên nsrôih lơh dơi My, Wa Hô le ji kop hô ngăn, wa lah: kônh yơ nsrôih rklai đăp mpăn ngăch Sài Gòn gay wa tât khâl ƀon lan miên Nam…ơm ôi, radio nău ngơi Việt Nam pơk nău mprơ bâh đồng chí Phạm Tuyên “Như có Bác hồ trong ngày vui đại thắng”, rnôk nĕ mpôl hên mơ geh nău rhơn ngăn, a Hồ lĕ ta ao hôm, ƀon lan miền Bắc bâh nhạc sỹ lĕ geh vơt wa tât đah mpôl hên hôm, jêng lah rnôk nĕ saơ tâm săk jăn rhơn ngăn”.

Trong hăn tât lơh dơi têh nar 30/4/1975 geh nău rgop nting mham bah rhiăng rkeh nuĭh kon ntoh lư bah ăp nkual lam dak. Hăn bah neh ntu sah ônh Quảng Ninh, ăp nuĭh tahen-nuĭh nuĭh kuih sah ônh đah săk moh Binh đoàn sah ônh lĕ geh âk nău lơh dơi, mô klach njê ndrel nău nchih bản hùng ca Đại thắng Mùa Xuân. Jêh rnôk râng ăp trong rdôl lơh tâm Buôn Ma Thuột, âk tahen Binh đoàn Sah ônh lĕ hăn tât Sài Gòn rdôl lơh tach ndeh păr Tân Sơn Nhất, Bộ Tổng tham mưu Ngụy quyền, Dinh độc lập. Wa Bùi Duy Thinh, rnôk nĕ lah trợ lý Trưởng tiểu ban quân lực bah Trung đoàn 28, nkah gĭt tay nar 30/4 lịch sử.

 “Tât 10 mông mpôl hên lĕ lơh lăp tât mpông me bah Bộ Tổng tham mưu Ngụy quân Sài Gòn. Tât 11mông 30 mnit, ndrel đah mông aơ mpeh Dinh Độc Lập mpôl hên lĕ gĭt rklaih đăp mpăn, mpôl hên ntăm cờ ta Bộ Tổng tham mưu Sài Gòn. Lĕ rngôch oh nô chrai gay lơh rŭn in, sŏk tay lĕ rngôch, ndâk njêng ntĭm rđău bah kruanh Cao Văn Viên, mpôn bah Nguyễn Văn Thiệu. Răm mô dơi nkoch, tât aƀaơ mô dơi lah lĕ”.

48 năm lĕ rlău kơp bâh nar đăp mpăn miền nam dơn ngoăy neh dak, yơn nău kahgĭt ta nar mpôl tahen rklaih đăp mpăn Sài Gòn hôm nha geh ueh mhe tâm nuih n’hâm mpôl geh saơ Rhơn rnê tâm mpôl nuĭh nchih báo Việt Nam bôk năp geh măt ta Dinh độc lập di ta kêng nar 30/4/1975, nhà báo Trần Mai Hưởng, tă kan Tổng giám đốc Thông tấn xã Việt Nam geh chup tay rup nău dơi đah bôk nău : “Ndeh sar tahen rklaih đăp mpăn hăn lăp ta dinh độc lập kêng klong  nar 30/4/1975” n’hanh âk nău nchih ta nar rklaih đăp mpăn lịch sử.

Nhà báo Trần Mai Hưởng an gĭt rnôk ndeh om măng ca rdeng mpôl phóng viên lăp ta dăch nkuăl ƀon têh ăp trong phao ndrak bâh mpôl rlăng hôm nha pănh, bôk ndeh rdeng phóng viên tĭng groi mbro ta bôk ndeh sar gay ma der ndrak phao. Yơn tât ta nkuăl ƀon têh lah du nau êng, nuih bon lan rhơn jur ta trong vơt tahen rklaih đăp mpăn.

 “Nuih ƀon lan dŭt rhơn ngăn, pă ndơ n’hanh njôt dak ngêt an oh nô. Du hê oh bu klô 13-14 năm deh hao ta ndeh phóng viên hên, oh nĕ dâk ta njônh ndeh n’hanh dat têh: rklaih đăp mpăn hôm, rklaih đăp mpăn hôm. Hôm nuĭh bon lan bả ding trong hăn tât ut rhơn tahen, nhup ti gơm rhơn n’hanh mprơ. Mprơ ăp nău mpro kơt lah Tiến về Hà Nộ bâh Văn Cao rĭ geh nău mprơ: “Trùng trùng quân đi như sóng, lớp lớp đoàn quân tiến về.” Nău mprơ nĕ dŭt tâm di ta rnôk nĕ nơh, ăp nuĭh mprơ nău mprơ nĕ n’hanh dŭt rhơn ngăn, khân păng ntĭm trong an hên lăp.