Mbah rhơn ƀon lan, đồng chí n’hanh tahen lam dak!

Tâm rân mông khlăy vơt rhơn năm mhe Nhâm Dần, gâp dŭt rhơn dăn ndơn măt đah lĕ rngôch Đảng, ngih dak n’hanh Ủy ban Trung ương Mặt trận Tổ quốc Việt Nam, dăn njoăl tât lĕ rngôch ƀon lan, đồng chí, tahen lam dak ndrel ƀon lan he gŭ ta dak bah dih ăp nău rŏng têh ueh, dăch mêr, nău rhơn vơt năm mhe ueh lăng ngăn tât ƀon lan. Gâp dăn njoăl tât băl mpôl ăp dak tâm play neh, ƀon lan ăp dak ta lam ntur neh nău rhơn đăp mpăn, tâm rnglăp, têh ndrŏng n’hanh hơm răm.

Kahgĭt tay năm mhe năm Nhâm Ngọ 1945, ta báo “Việt Nam Độc Lập”, Chủ tịch Hồ Chí Minh lĕ nchih.

Dăn mbah rhơn lĕ ngih dak he tâm năm aơ.

Cờ gŭr mănh êr n’hao ntô̆ mpăr.

Năm aơ lah năm du\t ntoh ang

Nău rhơn tết bâh Wa aƀaơ lĕ tŏng 80 năm. Bol  lịch sử lĕ lăp tât plơp mhe, yơn ăp nău mĭn ueh geh bun dăp bâh lịch sử mpôl rnoi, nău tâm rnglăp, nău tâm rŏng, nău nâp nâl, geh âk nău roh jot khĭt ji bâh ƀon lan he mô dơi geh nău rgâl.

Năm 2021, tâm ăp mông nar geh âk nău ntul rlong ngăn, he lĕ geh saơ âk nău ueh, nău kan di ntoh ang yor tâm pêt tâm kơl ta ntŭk rêh jêng ta ăp nuĭh ƀon lan: Nĕ lah ăp nai dak si, y tá, tahen, nuĭh kơl kan mô klach rvê nău jêr, nău tât ji tât ta nkual geh ntưp nuh srê, nklơi ba kơi rnăk vâl, mê̆ bơ̆ ranh, kon jê̆, nĕ lah ăp nuĭh ranh lĕ sŏk lĕ rngôch prăk nkrem ranh rnă săk nơm gay ma kơl tâm rgop prăk njrăng rdâng nuh srê Covid-19, nĕ lah ăp oh mon, bu ndăm, kon se lĕ geh vẽ ăp rup dŭt ueh, geh âk nău mprĭng, nchih săm ƀŭt njoăl dŭt ueh, mpơl nău ŭch, nău rŏng, nău ryơk bâh nơm đah ăp nai dak si, y tá tâm ban kơt knơm mpeh soan dăng Việt Nam tâm rơh ntul rlong tâm rdâng đah nuh srê...

Tâm mông aơ, geh ăp nuĭh kon Việt Nam dôl dâk bôk năp ta ntŭk kan njrăng rdâng nuh srê, ăp nuĭh tahen ăp nar măng mât đăp mpăn rnă njrăng, mât ueh lăng n’har bri, gôl dak mô lah ăp oh yuh ta ăp n’gâng kan êng geh hôm nha nsrôih pah kan, mô dơi sĭt vơt sa tết rgum nsum đah rnăk vâl nơm.

Đảng, ngih dak n’hanh ƀon lan dŭt ryơk nsơm ăp nău nsrôih pah kan yor nău dơn kan đah ƀon lan n’hanh ntŭk rêh jêng. Neh dak kơp dơn ăp nău roh jot khĭt ji bâh ƀon lan, đồng chí, ryơk nsơm nău mĭn ueh mpŏng sĭt đah neh dak bâh ƀon lan he ta dak bah dih n’hanh nău kơl kan bâh băl mpôl lam dak.

Bâh ăp nău ntul rlong kanŭng lơ ma tiăr nti an he geh dăng săk soan bâh nău mĭn tâm rnglăp du nuih n’hâm, bâh nău nsrôih n’hanh kan rjăp, tâm di đah nău mĭn têh dăng bâh u che he kăl e tâm lĕ rngôch năm khay lịch sử jŏ jong “Ơm ôi rdâng đah mih sial, kêng măng rdâng đah duh n’heng”, lĕ tă rlet rlău rbăn năm văn hiến, rdâk njêng neh dak n’hanh mât đăp mpăn neh dak.

Dăn njoăl nău mbah rhơn tât ăp rnăk vâl Việt Nam geh ăp nar Tết ueh lăng, hơm ră n’hanh đăp mpăn. Dăn njoăl nău mbah rhơnj tât ăp nuĭh ƀon lan Việt Nam, ƀon lan he ta năm mhe Nhâm Dần 2022 đăp mpăn, săk dăng lăng ngăch, geh nău dơi n’hanh hơm răm.

Dăn lah ueh n’hanh mbah rhơn năm mhe.