VOV4.M’nông: Ndrel ma nau kan mât trong nkuăl n’har bri jong rlau 141 km tâm dăch ma n’gor Mondulkiri, dak Campuchia, tahen Biên phòng n’gor Dak Nông hŏ geh âk nau kan khlay. Mô êng râng nau ndâk njêng nau kan chính trị tâm 7 xã nkuăl n’har bri, kơl ƀon lan hun hao văng sa, rêh jêng, tahen Biên phòng Dak Nông hôm ƀư nau kơl an tâm nchră, rgop nau bun dăp ueh lơn nau tâm boh, kan nsum đah bar dak.

            Tâm kêng măng tâm mpeh nkuăl n’har bri tâm dăch ma Campuchia, Đại uý Tôn Đức Thái-Chính trị viên Groi Đồn Biên phòng mpông n’har Thuận An (Tahen biên phòng n’gor Dak Nông) ndrel ma du đê̆ tahen dôl ma uănh tâm ntŭk 2 ngih dôl ndâk kơl an gay ma năn pă tâm khay 6/2022. Nê lah ndơ ma tahen Biên phòng Dak Nông ndrel Uỷ ban MTTQ n’gor pă ân rnăk wa Y Saly Môn ndrel rnăk wa H’ Piơk- 2 rnăk ach o (rnoi Bunong) tâm ƀon Sar Pa, xã Thuận An, nkuăl Dak Mil. Ndrel đah tơm prăk 100 rkeh yor 2 rmôt kan kơl an, cán bộ, tahen Đồn Biên phòng mpông đah Thuận An, tơm prăk kơl an rnăk ach o xã Thuận An hôm kơl an 15 rkeh ndrel râng kơl an gay ma nkra 2 ngih. Đại uý Tôn Đức Thái mbơh, êng nau kơl ndâk ngih, rmôt kan hôm geh âk nau kan êng:

            ‘Ngăn lah, tâm ăp năm rlau aơ, ƀư tĭng nau ntrŭnh bah Tahen Biên phòng, rmôt kan hŏ ndơn kơl an ân ngăn kon se nti tâm nkuăl. Đah nau rgop kơl an prăk khay bah cán bộ, tahen gay ma kơl an ăp kon se nti, tâm nê ndơn rong du hê kon se ndrel kơl an 6 kon se êng. Rmôt kan kŏ tâm rgop nsum đah ăp ntŭk kan, rmôt kan ntrŭnh ƀư nau kơl an kon se jut n’huch ach o, kơt lah bôk nau kan “ndrôk rong kơl an rnăk ach o”, “rong be tâm pleh”, pơk trong ân ƀon lan hun hao văng sa, đăp mpăn nau rêh, rkalih rlet ach o”.

            Ƀư tĭng nau kan bah nkuăl, tâm ăp năm rlau aơ, Đồn Biên phòng mpông đah dak ba dih Thuận An hŏ ntrŭnh ƀư Bôk nau kan ndâk nau kan chính trị tâm nkuăl, rgop nau ndâk ăp chi bộ, ntŭk mât njrăng êng ăp thôn, ƀon nâp, hun hao văng sa rêh jêng. Ngăn lah, Đồn hŏ đă du đồng chí râng gưl uỷ, rnôk aơ lah Kruanh Ban Pháp chế Hội đồng nhân dân xã Thuận An, 10 đảng viên râng nau rƀŭn tâm ăp chi bộ thôn- ƀon, 37 đồng chí ƀư nau kơl an ăp rnăk vâl.

            Thượng tá Phan Quốc Tuấn-Kruanh Đồn biên phòng mpông Thuận An mbơh, tâm ăp năm rlau aơ, rmôt kan mro kơl an nau tâm nchră ma ƀon lan. Nchrăp kơl mbơh nau ân gưl uỷ, n’gâng kan tâm nkuăl, ƀư rmôt hăn kan bah Nkuăl uỷ, UBND nkuăl Dak Mil, ndrel ăp rmôt công an, tahen, biên phòng...kơl an ndrel pă nklâm ndơ ân ƀon lan dnrel mât njrăng nkuăl n’har bri bah n’gor Mondulkiri, Campuchia. Mhe aơ, rmôt cán bôk nkuăl Dak Mil ndrel tahen Biên phòng tât khâl ndrel rhơn tết Chol Chnam Thmay tâm nkuăl Pech Chenda, n’gor Mondulkiri. Đồn mro pơk trong ân ƀon lan nkuăl n’har bri, ngăn lah 2 ƀon Sarpa, ndrel Bu Dak, xã Thuận An hăn kơl băl mpôl tâm xã Bu Sa Ra, nkuăl Pechr Chenda, n’gor Mondulkiri, dak Campuchia:

            ‘Êng tâm xã Thuận An geh rlau 150 rnăk geh nau tâm boh tâm dăch, băl mpôl đah dak ba dih. Nŭih ƀon lan vay hăn ro, kơp n’ăp ma tât khâl băl bên ndrel kŏ kơt lah băn bên tât tâm ăp nar lễ, tết bah rnăk vâl. Rmôt kan kŏ pơk trong nơih, ntĭm mbơh, nkoch trêng gay nŭih ƀon lan hăn ro tâm di tĭng nau ntrŭnh bah pháp luật, pơk nau tâm boh rjăp đah nŭih ƀon lan bar ding nkuăl n’har bri. Bah nê, kŏ ƀư ueh nau kan mât nkuăl n’har bri. Bah ƀon lan ri hên kŏ gĭt âk nau kơl an nau kan mât nkuăl n’har bri bah rmôt nơm đŏng”.

            N’gor Dak Nông geh trong n’har jong 141km tâm dăch ma n’gor Modulkiri, dak Campuchia. Nkuăl gŭ kan bah tahen Biên phòng tâm 7 xã nkuăl n’har bri, đah 32 rnoi oh nô, tâm 4 nkuăl tâm dăch ma 4 xã, 2 nkuăl Pech Chanda ndrel Ô rang, n’gor Moldulkiri, Campuchia.

            Rđau kan tahen Biên phòng n’gor Dak Nông mro kơl nchră nau đah n’gor uỷ, UBND ƀư ueh nau tâm nchră ƀon lan, tâm nchră neh dak. Rơh geh srê Covid-19, n’gor Dak Nông hŏ hăn khâl, pă nklâm ndơ, ndơ sa, dak si gay ma njrăng srê Covid-19. Mhe aơ ngăn, jêh rnôk srê ji geh nkân njrăng, âk rmôt kan bah n’gor Dak Nông hŏ tât khâl n’gor Modulkiri ndrel rhơn tết Chol Chnam Thmay. Tĭng Đại tá Phan Quý Vỹ-Groi Chính uỷ N’gâng kan rđau tahen Biên phòng n’gor Dak Nông, nau kan tâm nchră rgop nau ueh tâm nau bun dăp nau tâm boh, kan nsum đah bar dak lah nsum ndrel 2 n’gor Dak Nông-Mondulkiri lah êng, ngăn lah ƀư rjăp nau tâm rnglăp bah ƀon lan 2 dak tâm nkuăl n’har bri:

            ‘Rnôk aơ dôl ma ntrŭnh bôk nau kan tâm njêng đah ăp Đồn biên phòng ndrel đah ăp rmôt tahen bah Campuchia ndrel dôl ntơm ƀư nau kan tâm njêng đŏng đah aơ ƀon 2 nkuăl n’har bri. N’gor uỷ hŏ rđau ndrel UBND n’gor hŏ geh nau nchrăp, ăp nkuăl n’har bri ndrel ăp đồn biên phòng dôl ma ntrŭnh ƀư. Bah nê n’hao lơn tay nau tâm rnglăp kan nsum tâm dăch bah ƀon lan 2 ding n’har bri. Nkre bah nê, kí ton ƀư âk bôk nau kan gay ma kơl an mpeh dak băl mpeh nau kan hun hao văng sa, văn hoá, ntĭm nti. Kơt lah bôk nau kan “kơl an kon se hăn nti”, Tahen Biên phòng n’gor Dak Nông kơl an 12 ngih gŭ tâm Campuchia, ăp khay kơl an kon se du hê 500 rbăn, ndrle rong ăp kon se hăn nti tât lôch jrâu 12. Bah nau kan tâm kơl mra ntĭm nti nau vay ơm, nkre tâm ban nuih n’hâm bar ding gay mât nau dơi đăp mpăn nkuăl n’har bri bah neh dak đăp mpăn, tâm boh hun hao”./.

Nŭih rblang: H’Thi