VOV4.M’nông: Geh tât nau kan ăp rmôt kan nkra trong Trường Sơn Đông kăl êng bri tâm 2 Vườn Quốc gia Chư Yang Sin bah n’gor Dak Lak ndrel Bi Doup-Núi Bà bah n’gor Lâm Đồng, lơ 16/5, rmôt hăn kan bah Quốc hội ndrel ăp ntŭk n’gâng kan bah Trung ương ntơm mêt uănh, nchră năl tâm neh bri n’gor Lâm Đồng. Rmôt hăn kan bah Quốc hội yor Thượng tướng Trần Quang Phương, Groi Kruanh Quốc hội leo trong. Tâm 2 nar lơ 16-17/5, Rmôt hăn kan ntơm mêt uănh, nchră năl tâm bri nkra trong Trường Sơn Đông, ndrel geh nar pah kan đah UBND n’gor Lâm Đồng.

Bah năp nê, kơt nau Radio Việt Nam lĕ mbơh, tâm dŭt khay 1, bôk khay 2 năm 2022, ăp rmôt kan bah bar n’gor Dak Lak ndrel Lâm Đồng hŏ saơ ăp rmôt ƀư nkra trong Trường Sơn Đông hŏ kăl êng bri, uih rlau 10km rlet trong bri bah 2 Vườn Quốc gia Chư Yang Sin bah Dak Lak ndrel Bi Doup-Núi Bà bah Lâm Đồng. Bôk năp năl ăp rmôt ƀư nau kan hĭ lơh n’hiang bri rnôk ê geh nau dơi ntrơn rgâl nau dŏng bri, du đê̆ rmôt ƀư nau nkra trong hŏ ƀư êng đah nau nchrăp ƀư bah bôk nau kan. Nau tât aơ geh nau tih pháp luật dŭt khuch hô./.

Nŭih rblang: H’Thi