VOV4.M’nông: Jêh ăp nar rlu sa tết, bu ur ntoh măt Quốc hội gưl XV rnoi Brâu tâm n’gor Kon Trum Nàng Xô Vi plơ̆ tay đah nau hăn ntĭm nti kon se. PV Khoa Điềm gŭ kan tâm nkuăl Tây Nguyên nkoch tay ăp nau ŭch bôk năm mhe bah bu ur ntoh măt Quốc hội nchrăp tât 26 năm aơ.

Ntơm bah ngih tât bah ntŭk pah kan tâm ngih săm ƀŭt PTDT Nội trú n’gor Kon Tum tâm nkuăl n’har bri Ia H’Drai, bu ur ntoh măt Quốc hội gưl XV Nàng Xô Vi rlet rlau trong hăn jong ngai nklăp 150 km đah ndeh vah jâng. Nau ueh ngăn lah, trong ma bu ur ntoh măt Quốc hội tât ma kon se nti bah nơm njok tâm nkuăl n’har bri tâm êp ma bar dak băl Lào ndrel Campuchia. Plơ̆ tay ngih săm ƀŭt jêh ăp nar rlu sa tết, mâp tay ăp oh kon se lah rnoi mpôl đê̆ bah nkuăl n’har bri, bu ur ntoh măt Quốc hội Nàng Xô Vi nkoch nau ŭch ndrel nau mĭn bah nơm:

‘Đah nau kan ntĭm nti lah nau kan ma gâp uănh khlay ngăn. Gâp ŭch mhâm ƀư njoăl tât ăp gưl kan uỷ Đảng, tât Trung ương ăp nau mĭn rvê bah nai nti tâm nkuăl n’har bri ndrel ăp nau mĭn bah me mbơ̆, ngăn lah nau uănh kơl tât ăp nau jêr bah ăp oh dôl ma mâp. Srê Covid-19 n’gâng kan ntĭm nti khuch ngăn ndrel ngăn lah n’gâng kan ntĭm nti geh nau khoah âk yor nau mĭn ri ma ŭch mhâm ƀư ân bah srê aơ ri ăp oh mra ơm geh plơ̆ hăn nti nâm ơm ndrel geh âk nau mhe lơn tay”.

Lah cử nhân sư phạm địa lý, nai nti tâm ngih săm ƀŭt PTDT Nội trú n’gor Kon Tum tâm nkuăl n’har bri Ia H’Drai, nkoch tât ăp nau nkah bah nơm tâm rơh rƀŭn bôk năp Quốc hội gưl XV, bu ur ntoh măt Quốc hội Nàng Xô Vi nkoch: Đah du hê nai nti săk njê̆ tât Thủ đô, tât ngih kan Quốc hội ri nau bôk năp lah păng saơ prêng ndrel hôm geh nau klach ơm. Bah nau mâp ma ăp ntoh măt, tâm rnôk pah kan đah ăp uỷ ban ri nau ma Nàng Xô Vi saơ ân geh ƀư nkre nê lah ƀư rgâl nau mĭn bah săk nơm ndel ma ăp nŭih êng:

‘Tât rơh rƀŭn tal bar ri gâp nchrăp uănh ndrel ma mĭn ăp ntil săm ƀŭt ân âk lơn. Ndrel tât rnôk mâp ma ƀon lan, mât ma cử tri mpeh nau mbơh tay nau kan bah bah rơh rƀŭn bah nơm ri gâp saơ geh nau rnơm lah, săk gâp geh nau nsôih ndrel ngăn lah jêh aơ gâp mra geh nau nsôih âk lơn tay”.

Bu ur ntoh măt Quốc hội Nàng Xô Vi, tâm rmôt kan ntoh măt Quốc hội n’gor Kon Tum lah kon bah rnoi dŭt đê̆ nŭih Brâu. Rnôk aơ rnoi Brâu gŭ tâm thôn Đăk Mế, xã n’har bri Pờ Y, nkuăl Ngọc Hồi, n’gor Kon Tum. Lĕ rnoi mpôl geh knŭng 173 rnăk ndrel kŏ lah nŭih blau mpeh nuih n’hâm nsôih hao jêng bah nơm đah nau ŭch kan, rgop ân nau hun hao bah ƀon lan. Nkoch tât ăp nau rvê bah nơm ndrel nau ŭch tâm bôk năm mhe Nhâm Dần 2022, bu ur ntoh măt Quốc hội Nàng Xô Vi, nkoch:

‘Ăp ntoh măt Quốc hội kŏ geh nau mĭn, nau ŭch ân săk nơm, mhâm ƀư ân ƀon lan nơm ân bah ach o, jêr jŏt. Lăp tâm năm mhe ri nau ŭch ngăn bah gâp lah mhâm ƀư ân jut jăng bah lơi srê Covid-19 gay ma ƀon lan nơm pah kan jan sa nâm ơm. Lah ntoh măt Quốc hội ri năm mhe gâp mra nsôih lơn ƀư ân ueh lơn nau kan, nkoch nau kan, nau ŭch ngăn ngên ngăn bah cử tri njoăl tât Quốc hội”./.

Nŭih rblang: H’Thi