Kruanh rđău kan UBND n’gor Lâm Đồng n’hanh ăp n’gâng kan, UBND ăp xã geh tât hăn ôp uănh ngăn ngăn n’hanh hop djăt mbơh nô nău tĭng ƀư nchrăp ntuh kơl trong cao tốc Bảo Lộc – Liên Khương. Âk jêr jŏt, kŏ kol dơi dăn đă ân ơm uănh khlay droh rklaih. Trong nchrăp ƀư cao tốc Bảo Lộc – Liên Khương lah gâl n’glăp n’glĕ dŭt bah njăr trong cao tốc Dầu Giây – Liên Khương geh lĕ rngôch rnoh jong bơi 74km.

Dơi weh ƀư hvi 4 mbor ndeh, tâm rơh bôk năp trong ƀư hvi 17m (4 mbor ndeh, rnoh ngăch nchuăt 80 km/h), ntuh kơl tĭng trong tâm boh bah dih- tâm trôm ngih dak (PPP), ntil tâm ton rdâk njêng – nchuăt dŏng- ndơ̆ rgâl (BOT), đah lĕ rngôch rnoh ntuh kơl bôk năp lah rlău 17.700 rmen prăk. Jŏ ƀư nchrăp lah 30 khay. Lah ta rơh pah kan, wa Nguyễn Hồng Hải, Groi kruanh UBND n’gor Lâm Đồng dăn đă ăp n’gâng kan geh tât ân ndăn ƀư wat jêh ăp hồ sơ, siƀŭt tĭng di nău way. Lơn lah pah kan đă ntrơn du, sŏk mplơ̆ neh ân dơi ƀư na nê̆, tĭng ƀư ăp rêng, ăp njuat lhăt. Sở Nông nghiệp n’hanh Môi trường rgum ntop kơl, druh rklaih jêr jŏt geh tât pah kan đă ntrơn du bah ăp ntŭk gŭ mhe.