Lôch rnôk Thủ tướng Chính phủ Phạm Minh Chính rgŏ jă rgum “500 nar măng tâm rlong ƀư lôch jêh 3.000 km trong cao tốc”, ta ntŭk ƀư trong cao tốc Khánh Hòa – Buôn Ma Thuột, ăp ntŭk ƀư hŏ n’hao âk nuĭh kan, ndeh rklư ndăn ƀư ngăch ăp gâl kan.  

Ta gâl ntrŭp 3, mpeh gâl nthoi 3 trong cao tốc Khánh Hòa – Buôn Ma Thuột, Tổng Công ty rdâk njêng mbrô 1 hŏ rgum rlău 60 kỹ sư công nhân ndrel 60 bôk ndeh têk ăp  ntil ndăn ngăch ƀư. Nô Nguyễn Đình Lợi, cán bộ kỹ thuật ta aơ, nkoch:

“Tĭng ƀư nuih n’hâm rđău đă bah Thủ tướng lah nchră ƀư dơm mô nchră plơ̆, mơ̆ mih găng nar ƀư nar 3 tơ̆ pleh 4 mpôl kan ri hŏ rêng lam tâm ntŭk ƀư trong cao tốc Khánh Hòa – Buôn Ma Thuột, yor kơt nê̆ ăp oh nô cán bộ, kỹ thuật, công nhân, nuĭh ƀĭt ndeh nsrôih ƀư tĭng nuih n’hâm rđău đă bah Thủ tướng. Ăp jêr jŏt ta ntŭk ƀư trong kơt trôk nar ri ta nuih n’hâm nsrôih âk mpơl ta ntŭk “Mih jê̆ ri uănh tâm ban kơt mô mih, lah mih têh uănh tâm ban kơt mih jê̆ hôm lah mih dŭt têh ri ntưp baih ma ƀư”.

Đăp mpăn tĭng ƀư ăp gâl ndranh ƀư jong 16,5Km ta mpeh n’gor Dak Lak n’hanh 22km mpeh n’gor Khánh Hòa, wa Nguyễn Viết Hải, Kruanh hội đồng thành viên tập đoàn Sơn Hải an gĭt, tập đoàn hŏ mbrôn lĕ mpôl kan, ƀư ndăng măng nar nsrôih ƀư lôch jêh rlău trong nchrăp:

“Mpôl hên ton nchrăp ƀư trong Nha Trang – Buôn Ma Thuột gâl n’glăp 3 mbra ƀư lôch jêh tâm năm 2025, jêng lah ngăch lor du năm rđĭl đah trong nchrăp hŏ tâm râp lah năm 2026. N’hanh trong Nha Trang – Buôn Ma Thuột gâp n’glăp nthoi bôk năp hăn rlău Khánh Hòa 22km nthoi bah trong Quốc lộ 1 tât Quốc lộ 26 mpôl hên ton rhuăt glêh nar ƀư lôch jêh tâm năm 2025.”

Nchrăp ƀư trong cao tốc Buôn Ma Thuột-Khánh Hòa geh rnoh jong 117,5km, lah 3 gâl n’glăp, dơi ƀư ntơm bah khay 6 năm 2023, nchrăp ƀư lôch jêh năm 2026. Tât aƀaơ, gâl bôk năp tă bah Ủy ban nhân dân n’gor Khánh Hòa ƀư tơm ntuh kơl rnoh khlay ntrŭp ƀư 20%; Gâl n’glăp tâl 2 tă bah Bộ Giao thông Vận tải ƀư tơm ntuh kơl geh lĕ rngôch rnoh khlay ntrŭp ƀư bơi 7%; gâl n’glăp tâl 3 tă bah UBND n’gor Dak Lak ƀư tơm ntuh kơl rlău 15% rnoh khlay. wa Phạm Ngọc Nghị, Kruanh UBND n’gor Dak Lak an gĭt, bôk năp ƀư trong di rnoh ngăch tĭng Nghị quyết mbrô 89/NQ-CP nar 25/7/2022 bah Chính phủ.

“Tĭng nar tâm rlong tă bah Thủ tướng Chính phủ rgŏ jă, n’gor Dak Lak dăn ton, nsrôih tay lĕ nuih n’hâm lơn đŏng tâm nău groi nđôi, ntrŭt ntrôl, nta trong dơh gay ăp đơn vị ƀư, mbơh nti tĭng ƀư lôch jêh trong nchrăp kan. Gâp nsing nơm  lah, đah nău rđău đă lĕ n’hâm suan bah Thủ tướng Chính phủ; nău ntop kơl bah ăp n’gâng kan Trung ương; nău nsrôih bah ăp nhih pah kan, đơn vị, nkuâl geh tât n’hanh nău nsum ti, du nuih n’hâm ŭch tĭng bah ƀon lan ăp rnoi nuĭh tâm n’gor, nklăp trong nchrăp gâl n’glăp 3 mbra ƀư lôch jêh tâm năm 2025 n’hanh wat jêh ƀư trong cao tốc Khánh Hòa - Buôn Ma Thuột rơh bôk năp mbra ngăch di kơt trong nchrăp ndơ̆ luh.”

Đah nău mât uănh, rđău  đă bah trung ương tât n’gor, nău lor nchrăp, nsrôih lĕ n’hâm suan bah tơm nuĭh ntuh kơl n’hanh ăp nuĭh tơm ndranh ƀư, mpŏng trong cao tốc Khánh Hòa – Buôn Ma Thuột mbra dơi tât n’hanh rlău trong nchrăp ndơ̆ luh, tŏng đah nău ŭch rŏng, mpŏng kâp geh trong hăn bah nuĭh ƀon lan./.