Yuh Nguyễn Thị Hoàng Mai, Giám đốc du công ty cổ phần tâm nkuăl ƀon têh Buôn Ma Thuột, n’gor Dak Lak mbơh, Tết năm aơ yuh mô kâp rvê tâm nau săch ndơ gay ma lah ueh nŭih kan nsum ma nơm. Ndơ tăm bah n’gor Dak Lak geh âk ntil, ma rnoh kah ri geh mbơh, tâm di ngăn gay ma công ty rvăt gay ma ân ma bu:

            ‘Kơt ăp năm ri gâp săch ndơ uănh ueh, ăp ntil bánh kẹo geh rvăt tă bah dih, yơn năm aơ gâp lŏ săch ăp ntil ndơ geh rnoh kah ndrel geh ơm bah nkuăl kơt lah grăp điều, grăp mắc ca, grăp sa chi, ndrănh đông trùng hạ thảo gay ma njoăl tât năch. Ê lor lah lah ndơ kah, tal bar lah păng geh tâm nkuăl nơm”.

            Đah yuh Lê Thị Thanh Thuý, tâm Phường Tân Lập, nkuăl ƀon têh Buôn Ma Thuột, kŏ rnơm săch ăp ntil byăp play tăm tâm Dak Lak mô lah ăp ntil grăp pâr kro:

            ‘Âk năm ma aơ gâp săch rvăt ăp ndơ kloh, ueh ân n’hâm soan, tâm di ngăn nau kơl ngêt sa tâm rnôk ăp nar Tết. Gâp rnơm ăp ntŭk kan, tâm boh kan nsum, ƀư kan tăch rgâl ê nkra geh nau bu rnơm tâm nkuăl. Ma rnôk aơ âk ngăn ndơ kah bah nkuăl hôm tŏng dơi nau tăch luh dak ba dih đŏng”.

            Tĭng wa Trần Ngọc Đan Thuỳ, Giám đốc Công ty Gren Foods, nkuăl ƀon têh Buôn Ma Thuột, ntŭk tăch ndơ tăm bah n’gor Dak Lak geh âk ntil, rnoh tăch tâm di. Nau pă tăch nơih ngăch, geh tu tơm kloh hŏ njêng nau rnơm ueh ma nŭih rvăt dŏng:

            ‘Nau tăch mô tŏng ndơ. Ăp rnôk Tết kơt aơ nau ŭch rvăt âk lơn. Âk rnôk nơm rvăt ndơ ri pe puăn nar mơ geh mô geh nkre ôh. Ri ma nơm dŏng ăp ntil ndơ bah nkuăl nơm lah đăp mpăn ndơ mhe nkra, lĕ ri bu lŏ pâr, tâl dŭng ri ma ndơ kah ndrel ueh đŏng”.

            Tâm rnôk tết, ndơ tuch tăm bah nkuăl mô êng knŭng geh nau kah tâm di ma hôm njoăl nau nkoch tât n’hâm soan, nau geh dơi ndrel nâp nâl. Nau ma nŭih rvăt dŏng Dak Lak săch ăp ntil ndơ ueh kah bah nkuăl ƀư ndơ ân Tết kŏ kơt lah sa, dŏng tâm rnăk vâl nê lah nau rêng nau ơm, nkre kơl an nau hun hao nâp nâl bah ntŭk kan tuch tăm./.