Ndrel đah druh ndăm lam dak, druh ndăm ăp n’gor tâm nkual Tây Nguyên hŏ geh âk nău kan ngăn ngăn, rgop hun hao wăng sa- rêh jêng kon nuĭh ta ăp n’gor. Nău nchih bah Phóng viên Radio nău ngơi Việt Nam way gŭ kan ta nkual Tây Nguyên.

 Tĭng nău mbơh bah Tỉnh Đoàn Dak Lak, tâm 6 khay bôk năm aơ, druh ndăm lam n’gor hŏ ƀư geh 4.000 nar luh kan, gâl kan druh ndăm đah lĕ rngôch rnoh khlay ƀư nsĭt an geh rlău 7,2 rmen prăk.  

Na nê̆, ăp gưl n’gâng kan đoàn lam n’gor hŏ rdâk njêng 17 mblâm jay tâm rŏng, jay khăn quàng đỏ; tĭng ƀư 17km trong mpoh ang trong ƀon, 23 Nkual pâl rlưn an kon se jê̆; kơl ƀư âk tủ siƀŭt an kon se; nkra uĕh tay âk jay văn hóa, jay rgum ƀon. Ăp bôk nău kan “Nar prao hăn kơl êng”, “Nar pơh nđĭr lam dak” dơi ƀư du rơh, wăch rgum âk mpưm đoàn viên, druh ndăm râng đah nău kan mât njrăng ntŭk gŭ rêh, rdâng lơh đah rgâl trôk nar ta ăp n’gor. Ăp gưl n’gâng kan đoàn lam n’gor hŏ pă an rlău 20 rbăn nklâm ndơ, bơi 3.000 nklâm học bổng, ndeh wah jâng an nuĭh ƀon lan, kon se jê̆; ƀư but săm dơm nău ji ta ăp nkual jru ngai. Lĕ rngôch rnoh khlay ăp nău kan hăn kơl êng lah rlău 10 rmen prăk. Yuh H Giang Niê, Bí thư Tỉnh Đoàn Dak Lak lah:

“Bah meng nău ƀư êng êng tĭng nău kan ri đah ăp gưl n’gâng kan đoàn geh nău tâm rgop kan nsum. Hôm đah gưl n’gor ri mpôl hên ndăn rgŏ jă lĕ nău uănh khlay ntop kơl bah ăp tổng công ty, tập đoàn gay rgŏ jă sĭt ăp nkual jêr jŏt mha êng bah ăp n’gor Tây Nguyên. Jêng ăp nău kan ntop kơl dơi rƀŏng di trong, rgum tâm rdâk njêng ƀon lan mhe, nkual ƀon têh ăp tŏng nău lư. Ăp gâl kan ri rgum rgâl trong ƀư gay hăn lăp na nê̆ ngăn ngăn lơn”.

          Ta Kon Tum, ntô̆ n’hao nău khlay kan hăn lor, nău blău ƀư mhe bah druh ndăm, ntơm bah bôk năm tât aƀaơ druh ndăm ta n’gor hŏ  nsrôih râng tĭng ƀư ăp nău kan, gâl kan rgop ƀư lôch jêh nău dơn kan chính trị, nău dơn kan chuyên môn n’hanh râng hun hao wăng sa- rêh jêng kon nuĭh. Nô A Xây, Groi Bí thư Rnâng kan Tỉnh đoàn, Kruanh Hội Liên hiệp druh ndăm Việt Nam n’gor Kon Tum, an gĭt:   

“Gay an ƀư geh nău dŭt tam âk, Ban Thường vụ Tỉnh đoàn Kon Tum hŏ ra lĕ, ƀư jêng ngăn ngăn lĕ rngôch ăp bôk nău kan gay an tĭng ƀư tâm khay 3 Khay druh ndăm. Kơt năp nti ăp trong ƀư, nkô̆ geh tât rgâl mbrô gay ndơ̆ rgâl khoa học, kỹ thuật an đoàn viên druh ndăm n’hanh lơn lah n’glăp tâm nkual jru, nkual ngai, nkual rnoi mpôl đê̆”.

        Tỉnh Đoàn Gia Lai mhe ƀư bôk nău kan sơ kết 3 năm rdâk njêng n’hanh pơk hvi ntĭt leo nuĭh ntoh lư tâm pah kan Đoàn n’hanh trong leo druh ndăm rchong kon se jê̆ n’gor Gia Lai n’hanh mpư rnê druh ndăm ntoh lư tĭng nău Wa năm 2023. Pe năm aơ, ăp gưl n’gâng kan Đoàn-Hội ta n’gor Gia Lai hŏ mât uănh khlay, ntrôl dăng ăp trong ntĭm nti nău way ơm cách mạng, nuih n’hâm rŏng dak, ntĭm nti nuih n’hâm uĕh lŏng, trong gŭ rêh văn hoá an druh ndăm rchong kon se  jê̆. Tỉnh Đoàn Gia Lai hŏ an ƀư rơh rgŏ jă “Ăp nar du nău lư uĕh, ăp pơh du nău nkoch uĕh” ta mạng xã hội, năl saơ n’hanh mpư rnê 27 nuĭh ntoh lư “nuĭh uĕh, kan uĕh” tâm đoàn viên, druh ndăm.

 Tĭng ƀư nău ntrŭnh mbrô 05 mpeh “Ntrôl dăng kơt nti n’hanh ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh”, Ban Thường vụ Tỉnh Đoàn Gia Lai hŏ uănh khlay an ƀư nău kơt nti n’hanh ƀư tĭng nău mĭn, nuih n’hâm uĕh lŏng, trong gŭ rêh Hồ Chí Minh, uănh aơ lah nău dơn kan rgum tơm, rloh rlău tâm ăp nău  kan bah Đoàn. Rnôk an ƀư, hŏ ntoh âk nuĭh ntoh lư gĭt blău, gơih nđơr, rlău jêr jŏt njêng nău kan, mât nâp rnă njrăng chính trị, yor nău  rêh đăp mpăn bah ƀon lan, rdâk njêng ƀon lan mhe. Nsrôih let năp tay ntrôl dăng tay trong leo tâm rlong rŏng dak, dâk chŏl lor trong hun hao wăng sa- rêh jêng kon nuĭh. Lah ngoăy tâm ăp nuĭh ngăch prăl dơi mpư rnê druh ndăm ntoh lư ƀư tĭng nău Wa, n’hanh dơn geh bằng khen bah UBND n’gor Gia Lai, nô Nay Wing, Bí thư huyện đoàn Chư Sê, lah:

Nar aơ he dŭt rhơn n’hao, tâm let năp tay mbra geh ăp nău dơn kan rgum tơm, ngăn ngăn tât đoàn viên druh ndăm gay mât, ntô̆ n’hao geh ăp nău dơi âk lơn đŏng. He mbra lah nuĭh chŏl lor bôk năp, hăn leo lor bôk năp ta ăp ntil nău kan gay leo an ăp đoàn viên druh ndăm. N’hao dăng nkoch trêng, rgŏ jă đoàn viên druh ndăm mpeh ăp trong kan kơt ntĭm nti gĭt jru pháp luật, đăp mpăn hăn ntung trong, nta trong dơh gay druh ndăm tât đah tơm prăk manh, nta joi nău kan, n’hao nău geh wăng sa gay đăp mpăn nău rêh.”

      Nchih nkah nău rgop bah druh ndăm ta n’gor, Kruanh UBND n’gor Gia Lai hŏ ntăm an bằng khen an 6 mpôl n’hanh 10 nuĭh geh nău dơi ngăch prăl tâm nău rdâk njêng n’hanh pơk hvi nuĭh ntoh lư tâm pah kan Đoàn n’hanh trong leo druh ndăm rchong kon se jê̆ n’gor Gia Lai. Ban Chấp hành Tỉnh đoàn Gia Lai ntăm an bằng khen 75 druh ndăm ntoh lư ƀư tĭng nău Wa năm 2023.