Ôi lơ 18/9, n’gâng kan Chính trị lĕ rƀŭn nchră an tâm rgop mpeh đề án nău ntrŭnh ntuh kơl ƀư trong loih têh ngăch Bắc - Nam, lôch geh djăt Ban cán sự đảng n’gâng kan mât uănh ntung trong mbơh tơih mpeh nău mbơh nău ntrŭnh ntuh kơl ƀư trong loih têh ngăch Bắc-Nam n’hanh nău tâm rgop bâh ăp ntŭk kan, n’gâng kan Chính trị lĕ tâm nchră n’hanh nglôch lôch aơ lah nău kan dŭt khlăy n’hanh dŭt na nê̆. Nkô̆ mpŏng ŭch nsum rdâk njêng trong loih hăn ngăch gay ma tâm di đah nău ŭch nchoăn rdeng, ntop njêng tay nău ƀư trong loih ta mpeh hăn Bắc -Nam an na nê̆, nâp nâl, njêng bôk nău kan lor, njêng an hun hao wăng sa- rêh jêng, mât đăp mpăn rnă njrăng ngih dak, rnă njrăng đăp mpăn, ntop ƀư dơi ueh ăp nău ntrŭnh, nău mpŏng bâh Đảng mpeh ntuh kơl hun hao ndơ dŏng ntung trong nchoăn rdeng tâm trong kan hun hao neh dak tĭng Nghị quyết Đại hội 13 bâh Đảng n’hanh hun hao ăp nău nchrăp kan ngih dak. N’gâng kan chính trị dơn ngoăy tâm ban ŭch dăn nău tâm rgop bâh BCH Trung ương Đảng mbơh an nău ntrŭnh ntuh ƀư trong loih hăn ngăch ta trong Bắc -Nam ê lor chính phủ ndơ̆ an Quốc hội ta rơh rƀŭn nchră tal 8, Quốc hội khóa 15.