VOV4.M’nông - Ta năp nău mbrơi tâm nău ƀư tĭng trong kan trok an ăp rnăk geh khuch ta nkual n’glău dak bât thủy điện Đăk Psi 5, N’gâng kan Công thương n’gor Kon Tum đă nuĭh tơm ntuh kơl nău nchrăp bư aơ lah Công ty Cổ phân Đức Thành Gia Lai an jêh trok prăk ntop kơl an ăp rnăk geh khuch bah năp nar 30/6/2022, lah mô N’gâng kan mbra tâm ôp tâm nchră đah UBND n’gor đă Tổng công ty Điện lực miền Trung rlu pơk dŏng ngih măy.

Du mir cà phê geh khuch yor thủy điện Đăk Psi.

Nkô̆ nău jêng tât mbrơi tâm nău trok prăk, ntop kơl ăp rnăk geh khuch nkual n’glău dak bât thủy điện Đăk Psi 5 tĭng N’gâng kan Công thương n’gor Kon Tum lah yor: Công ty Cổ phần Đức Thành Gia Lai hôm ndŭih tih yor trôk nar n’hanh nău pơk dŏng bah ăp ndơ thủy điện gưl bah lơ jêng mô lĕ đah nău kan tâm trong ƀư tơm, tâm rgop... uănh nđôi, kơp uănh khuch khat an trok, ntop kơl an ăp rnăk tĭng nău ntrŭnh gay đăp mpăn pah kan jan sa jêng tât nău dăn đă âk tơ̆ n’hanh jŏ jong.

Nŭih blang: Y Sưng Phê Ja