Tâm ban đah nau nchrăp ndơn mpeh văng sa ndrel nau tă geh dơi ƀư Nkô̆ nau geh mbơh tâm nau nchrăp, Groi Giáo sư-Tiến sỹ Trần Hoàng Ngân, Ntoh măt Quốc hội gưl 15, ân lah: rnoh rnon nsum bah dak nơm năm 2025 knŭng hôm 36% (rđil ma rnoh nkah mbơh lah 60%), lah nau ueh, ntoh nau dăng tâm nau mât ân săk tam, kơl an ƀư nâp nau rnơm bah tơm ntuh kơl ndrel ăp ntŭk kan lam nturr neh tâm tơm prăk Việt Nam. Nkre lah ăp nau kan tâm ban pă tâm nau sŏk geh-leo dŏng tơm prăk, lah nau khlay ƀư ƀư nâp nau dơi ân hun hao. Wa Trần Hoàng Ngân Mbơh:

‘Đah nau nchrăp ntuh kơl hun hao knŭng 2,8 rkeh rmen prăk ri lôch năm kan aơ nơm hŏ geh 3,4 rkeh rmen ân nau ntuh kơl ntŭk ntu văng sa, rêh jêng. Aơ lah nau ang gâp ân lah geh nau dơi ngăn. Rnơm nê, phung he hŏ ntuh kơl dơi nkra trong hăn ngăch, trong meng dak lêng, ăp ndrâm dak lêng, tach ndeh mpăr, trong meng 4 Hà Nội, trong meng 3 nkuăl ƀon têh Hồ Chí Minh ndrel âk ntŭk ntĭm nti, dak si hŏ geh ntuh kơl”.

Mpeh nau hun hao GDP, lah mô geh kơp năm 2021, lah năm geh nau khuch ngăn yor lah srê Covid-19, ri nau hun hao văng sa bah dak nơm geh 7,2% tâm 4 năm mro mrăng. Năm 2025, nau geh dơi tăch luh ndoh ndơ bah Việt Nam nchrăp rlau 900 rmen đôla. Aơ lah du nau geh dơi mhe. Ntơm bah du jâng văng sa mô lăng geh, tât rnôk aơ dak nơm hŏ jêng jâng văng sa Top 20 neh dak geh nau dơi dăng ngăn bah jâng văng sa tăch rgâl têh tâm lam ntur neh.

Đah nau mĭn ƀư nau kan n’ho ro lah nau hun hao ngăch ndrel nâp nâl, ăp nau tă dơi geh tât hun hao văng sa bah neh dak nơm hŏ geh nkoch mbơh tât nau hun hao mpeh nau rêh jêng ndrel nau dơi bah kon nŭih. Rnoh mrô hun hao kon nŭih bah Việt Nam geh rgâl âk, hao 37 gưl, hao tal 46 tâm nau dăp rgum pă rnoh mrô ueh lăng đăp mpăn bah lam ntur neh năm 2025, âk lơn rđil ma ăp neh dak ndrel geh rnoh dơi. Tiến sỹ văng sa Lê Duy Bình kơp dơn:

‘Nau kan hun hao bah nơm mô knŭng lah nau hun hao tât nau kan văng sa ma lah geh nsum ma nê lah nau hun hao mpeh kon nŭih, sŏk kon nŭih ƀư tơm, sŏk ntŭk ntu ƀư kan lah nau tơm, saơ rơh mhe ƀư tơm jêh aơ lah nkô̆ nau gay hhun hao gay nơm geh du nau kan hun hao nâp nâl, gay lơi ân du ntŭk ntu ueh ngăn ân rơh kon sau bah nơm jêh aơ tă”.

Ndrel ma nau kan văng sa êng, nau kan khoa học công nghệ, ntrơn rgâl blau njêng mhe ndrel ntrơh rgâl mrô bah neh dak nơm hŏ geh ăp nhoat hao ngăch ngăn. Rnoh mrô mhe  blau nau dơi mhe bah lam ntur neh năm 2025 bah Việt Nam dăp tâm rnoh 44/139 neh dak, nkuăl neh. Ntrong kan mrô hun hao dăng, lam ntuưk; nau hun hao bah Internet di đông tâm TOP 20 bah lam ntur neh. Nau kan tăch rgâl điện tử hun hao ngăch, nau geh nklăp 20%/năm. Nơm bah nau ngăn bah nau kan tăch rgâl. Wa Nguyễn Hữu Sơn, Kruanh rmôt kan ATS ntoh nau:

‘Phung he uănh aơ nau nsôih, nsôih têh ngăn bah Chính phủ, pơk trong ân ntŭk ƀư nau kan tăch rgâl. Nê lah nau ueh ngăn ngên. Nau ƀư nau kan tâm ntŭk kan công nghệ tơm prăk, gâp saơ nau kan aơ Việt Nam dôl geh âk nau dăng đah nau hun hao ngăch, dôl rnglăp nsum tâm nau geh dăng dơi ndrel nau ntrŭnh hun hao nau kan mrô, tơm prăk mrô”.

Dŭt ŭch ngăn mpeh nau tă geh dơi bah nau blau nau kan geh ntoh tâm nau nchră nau ntrŭnh: “Ăp nau ntrŭnh, nau kan ân geh ntoh tă bah nau ŭch, nau geh dơi nsum ndrel nau geh dơi ueh lăng bah ƀon lan, đăp mpăn geh kloh rvah, mbơh lĕ. Nau nau tâm ban nuih n’hâm bah, nau rnơm bah nŭih ƀon kan, ntŭk ƀư nau kan tăch rgâl ƀư mâng veh ân nau nchră uănh nau dơi bah cán bộ ndrel nau săk tam bah nau kan. Ndâk n’hao nuih n’hâm ŭch ƀư nau kan kơl an yor neh dak, hun hao nau nsôih mĭn ƀư nau  kan êng, nsôih êng, janh mĭn, janh kan, janh rgâl mhe, blau nau mhe, nsôih ƀư nau kan ndrel  ndơn ăp nau kan tĭng nau geh dơi nsum. Wa Lưu Thị Thanh Mẫu, Groi kruanh rmôt ƀư nau kan tăch rgâl mom Việt Nam mpŏng: 

“Ndrel ma nau ƀư nau kan bah Chính phủ điện tử, tâm rgop nsum đah rnoh mrô ndrel n’hao nau dăng dơi bah gưl n’gor ri gâp ân lah  gưl kan n’gâng kan Bộ ndrel Chính phủ mra ntrŭnh ân ngăch dơi nau ntrŭnh mrô 66 ndrel nau ntrŭnh mrô 68 bahy Bộ Chính trị. Kơt nê nau nkoch đah nau ntrŭnh đă ndrel nau ƀư nau ngăn tât mra dơi geh nau ntrŭt dăng jâng văng sa bah neh dak nơm hun hao kơt Tổng Bí thư hŏ lah rjă aơ lah rnôk n’hao săk bah rnoi mpôl. Nơm mra hăn nsum ma nau kan gay njêng luh du jâng văng sa ngăch blau, leo Việt Nam hun hao jêng nau kan văng sa bôk năp bah lam ntur neh”.

 Tâm nau kan hun hao văng sa rêh jêng bah neh dak 5 năm rlau aơ, hôm ơm ăp nau ê geh nau dơi gay ma rklaih, ndrel nau tă dơi blau dơi geh mbơh kloh tâm nau nchrăp nau ntrŭnh bah Đảng. Yơn lah, đah ăp nau tă dơi geh têh ngăn tâm nau hun hao neh dak ma dak nơm tă geh dơi 5 năm rlau aơ, đah nuih n’hâm rgâl nau mhe, đah n’hâm dăng tâm rnglăp ndrel nau mpŏng hun hao, rnoi mpôl Việt Nam dôl nhoat hăn tâm rach năm mhe-rach năm bah hun hao nâp nâl, ueh lăng, tâm rnglăp ndrel dơi ƀư êng nơm./.