VOV4.M’nông:   Uănh tay ăp nău uĕh bah âk năm jêh rklaih đăp mpăn, kơp dơn ngoăy neh dak lơn lah bơi 3 năm tâm rdâng đah srê Covid-19, nău dơi geh khlay tâm nău ƀư tĭng nău kơl rnoi mpôl đêt ta n’gor Dak Lak an kơp tât lah nău nâp nâl n’hanh jêh trong dak si ta ntŭk, tâm di uĕh nău ŭch but săm ji n’hanh mât chăm săk soan bôk năp an nuĭh ƀon lan.

Ăp tơ̆ kop ji, wa Y Diệp Uông, ta ƀon Dơng Bắk, xă Yang Tao, nkuăl Lắk, n’gor Dak Lak lŏ tât Ngih dak si xă but uănh, sŏk dak si sĭt săm. Wa Y Diệp nkoch: Kônh wa tâm ƀon dŭt rhơn rnôk saơ ngih dak si xă dơi ndâk ƀư kloh uĕh, ăp y, nai dak si mât uănh dŭt uĕt.

“Bah năp đaơ kop ji he ƀư brah lah yang dơm, way djăt nău nchoh. Nar aơ mô hôm geh, nar aơ ntlơi lĕ hôm yor Ngih dak nkoch trêng geh ngih dak si jêng kop ji he hăn ngih dak si. Bah năp đaơ jêr jŏt ngăn, nar aơ geh ndeh, geh ngih dak si dăch dơh lơn”.

Ăp ndoh ndơ dak si dơi năp wăt mât uănh săk soan nuĭh ƀon lan

Đah âk kônh wa, Ngih dak si xă Yang Tao âk năm bah năp lĕ jêng ntŭk nsing nơm rnôk kop ji. Y sĩ Nguyễn Văn Hà, Groi kruanh ngih dak si mât uănh Ngih dak si xă Yang Tao an gĭt: Âk nuĭh kônh wa way mô lap geh rmanh pah kan, nuĭh ranh kop ji, bu ur deh n’gul măng mô dơi tât ngih dak si ri ăp cán bộ, rmôt kan dak si mât uănh thôn, ƀon ngăch tât jay gay an ƀut uănh, kơl lor bôk năp an nuĭh ƀon lan.

“Aơ lah nkual dŭt âk nuĭh rnoi mpôl đêt ta ntŭk đah nău kan lŏ mir jêng nuĭh ƀon lan wât hôm e đêt. Năm plơ̆ ma aơ, nău wât bah kônh wa lĕ dơi hao. Na nê̆, lvang mhe aơ njrăng n’gang srê Covid-19, nuĭh ƀon lan gĭt ƀư tĭng 5K, khân pơng bĭch kăt mŭng, koăih rwach ngih wâl. Khân pơng gĭt ƀư ndrung, wang ndrôk rpu ngai jay, gĭt dŏng ăp ndơ răk kloh uĕh. Aƀaơ kop ji khân pơng mô hôm ƀư hŭm phŭ kơt kăl e ma khân pơng tât đah ngih dak si. Du năm mpôl hên but uănh săm ji geh bah 8.000 tât 10.000 nuĭh ji an nuĭh ƀon lan tâm xă”.

Rlău 27 năm tĭng đah nău kan y, Nai dak si Nông Văn Sáng, Trạm trưởng ngih dak si xă Ea M’Droh, nkuăl Cư M’gar hôm e nkah gĭt ăp nău ơm nar bôk năp tât jâng ta aơ. Nai dak si Sáng nkoch: Bah năp đaơ, nău rêh bah nuĭh ƀon lan hôm e âk jêr jŏt, âk nău rlŭk mâl ơm kơt kop ji mô tât ngih dak si, deh êng kon ta jay, mô ƀư tĭng trong njrăng n’gang kop ji hôm e nkân. Tât aƀaơ đah nău nsrôih bah nău kan dak si, nuĭh ƀon lan lĕ n’hao wât tâm nău mât uănh săk soan, ŭch tât êng ngih dak si but uănh rnôk kop ji, ăp nău ơm ƀư brah, săm ji đah gŭn lĕ roh jăng lơi. 100% bu ur deh kon ta ăp ngih dak si, mô hôm deh kon ta jay.

“Aƀaơ lĕ geh măy siêu âm, măy vĕ n’hâm play nuih, ăp măy kơt măy uănh n’hak, uănh năl mham. Rnôk nău mât uănh săk soan ta ntŭk bah he dơi hao, nuĭh ƀon lan mô hăn but uănh săm ji ta ăp ntŭk ngai mbra hŭch ăp prăk kaih hăn ncho ndeh, mông nar, nuĭh hăm mât uănh ăp ntil dơi hŭch dŭt âk”.

Nai dak si Ngih dak si Đa khoa nkuăl Lắk but uănh săm ji an nuĭh ji

Tĭng kơp uănh bah nău kan dak si n’gor Dak Lak, aƀaơ 100% ngih dak si dơi ndâk ƀư, rnoh xă tâm di rnoh ƀư lam dak mpeh dak si tât aƀaơ rlău 99%. Tga nkuăl Lắk ngoăy tâm âk nkual jêr jŏt bah n’gor Dak Lak, tât aƀaơ nău mât uănh săk soan an rlău 74.000 nuĭh ƀon lan dơi geh âk săk rnglăy khlay. Wa Phạm Phú Anh, Groi kruanh Ngih dak si nkuăl Lắk an gĭt: Tât aƀaơ, lĕ rngôch ngih dak si xă ta lam nkuăl dơi geh tâm di dak si xă lvang 2016-2020. Ăp ngih dak si ƀư tĭng but uănh săm ji bảo hiểm y tế, đăp mpăn nău pă dak si an nuĭh ji. Ndrel đah nĕ, ăp ngih dak si ƀư tĭng uĕh but uănh săm ngăch n’hanh ndơ̆ tât gưl bah lơ ngăch đah ăp nuĭh ji mbăn.

“Muh măt ntŭk ntô ngih dak si ta ntŭk aơ geh nău rgâl dŭt âk. Ntĭt nsa ăp nău ji tâm ntưp geh tâm trong chuh vaccinbe aƀaơ hŭch dŭt na nê̆. Tâm trong kan mât uănh săk soan deh nse mê̆ kon n’hanh oh bê ri nău mĭn êng nuĭh bu ur ta aơ rgâl dŭt âk. Ntĭt nsa kơt kăl e dŭt âk bu deh ta jay, aƀaơ nău mĭn bu tât ăp ngih dak si mô lah ngih dak si nkuăl bu deh”.

Ta n’gor Dak Lak, trong gưl ngih dak si nar lơ tâm di uĕh trong kan săm ngăch, săm nuĭh ji. Ăp ngih dak si lĕ rgop dŭt n’hâm tâm nău mât uănh săk soan, kơl nuĭh ƀon lan djôt dơn ndoh ndơ dak si uĕh tam ta ntŭk, ƀoh êp tâm ƀah ngih dak si đah ăp nkual.

                              Nuĭh rblang: Y Sưng Phê Ja