Nkhŭt ƀao tâl nkhop chai nhựa tâm ntŭk geh nking, geh nkŭm nâp, bu ndăm Nguyễn Chí Tâm, thôn Đăk Ri, xã Tân Thành, rhơn nkoch: Aơ lah ngih prăk 100 yor đoàn druh ndăm ƀư. Ntơm bah ăp nkhop chai 100 prăk, druh ndăm tâm xã rgop ndâk tơm prăk kơl an ăp nŭih geh nau rêh jêr jŏt:

            ‘Gâp hăn rgop nhôm nhựa vah ăp nŭih tĭng nau mĭn ƀư “rgum đê̆ jêng âk” ndrel gâp kŏ bonh đă druh ndăm tâm thôn, tâm xã ndrel ƀư gay ma geh nau dơi kơl an ăp nŭih geh đê̆ đă kŏ dơi đŏng”.

            Nau hăn rgum nhôm nhựa bah druh ndăm xã Tân Thành hŏ ngăch geh bu ranh, kon se kơt tĭng, njêng jêng nau mơng ueh tâm ƀon lan. Wa Nguyễn Văn Bé, tâm thôn Đăk Ri, nkoch:

            ‘Ăp rnôk gâp kŏ nkah, lah saơ chai ndŏk ri nơm rgum, dônh, tal bôk năp bah bah nau khuch tât ntŭk ntu gŭ âm, tal bar lah nơm mra dơi kơl an đŏng ăp nŭih mâp nau jêr”.

            Nsôih n’or ndrel ma phung bu mom tâm thôn Đăk Ri hăn dônh nhôm nhựa, đoàn viên Đặng Văn Hiếu, rnoi Dao, mbơh, ăp nau kan bah druh ndăm kơt lah nar pơh ndrih, khay rlu nti hăn kơl an, ƀư ntŭk pâl ân druh ndăm kon se...kơl an ăp băl mom rêh ân ueh lơn:

            ‘Ê lor lah nau rhơn, tal bar lah geh nau khlay ueh đŏng. Gâp geh tâm mâp âk ngăn, tâm n’ur ma âk nŭih ri nơm kŏ geh nau janh lơn đŏng tâm nau rêh nơm”.

            Nô Đặng Phúc Xuân, Bí thư đoàn druh ndăm xã Tân Thành, mbơh “Ngih prăk 100” rgum nkhop chai, nhụa geh đoàn viên ntrŭnh ƀư ntơm khay 4/2022 tâm lam xã. Ndơn geh nau kơl an âk mpưm bah nŭih ƀon lan, nau kan aơ geh ngăch rêng tât ăp nkuăl ƀon lan gŭ êng êng. Jêh âk khay ‘ngih” hŏ geh rgum bêng, rnoh nhôm nhựa mra geh leo tăch gay ma sŏk prăk kơl an ăp ăk kon se geh nau rêh jêr jŏt, pă kho ao, ndrôm săm ƀŭt, thẻ bảo hiểm y tế ân kon se ach o, ndrel ăp nhoat bôk năp njêng tơm prăk kơl an druh ndăm hun hao văng sa. Nô Đặng Phúc Xuân, nkoch:

            ‘Njêng tơm prăk nê gay ma du năm hên pă 4 tŏ tâm rnôk Tết năm mhe, tết kon se, rnôk lăp năm nti mhe ndrel rnôk trung thu. Jêh nê ndơn geh nau kơl an bah âk mpưm kônh wa ri hên njêng rgop geh đê̆ đŏng prăk ân druh ndăm manh mô geh sŏk prăk kon gay ma rvăt kon ntil tăm hun hao văng sa”.

            Tĭng wa Trần Doãn Hiếu, Groi Kruanh UBND xã Tân Thành, “Ngih prăk 100” lah nau mĭn blau êng bah đoàn viên, druh ndăm ƀư nau kan khlay hŏ rêng tâm ƀon lan, njêng nau mơng têm nkrem ndrel rgop nau mât ntŭk ntu. Ndrel ma nau druh ndăm, bu ur xã ƀư nau kan tâm rgop prăk kơl an, ƀư ngih, hun hao văng sa rnăk vâl kŏ ndơn geh nau kơl an ngăn bah ƀon lan. Wa Trần Doãn Hiếu, mbơh tay, ăp nau kan ƀư ueh nau tâm rgop nsum hŏ leo tât âk nau săk tam bah bơi tât 2/3 rnoh nŭih lah nŭih rnoi mpôl đê̆:

             ‘Aơ kŏ lah nau nkoch trêng, bonh đă ƀư ueh, nkre lah nau geh dơi ngăn nkre leo kơt tĭng nau ntrŭnh bah Đảng, Ngih dak tât đah ăp nŭih, ăp đoàn viên ndrel dĭng lĕ nŭih ƀon lan, tă bah nê ƀon lan rnơm ŭch lơn tâm ntrong kan chính trị bah xã. Ngăn lah ăp ntŭk kan rmôt kan hŏ geh nau ƀư tâm dăch dơh lơn ma ƀon lan, lah laih ty nthoi jong ngăn bah Đảng Ngih dak tât đah ƀon lan”.

            Kŏ tĭng wa Trần Doãn Hiếu, nau tâm ban bah nŭih ƀon lan hŏ rgop nau kơl an xã nkuăl jru ngai Tân Thành geh 16 nkô̆ nau dơi kơp dơn ƀon lan mhe. Kônh wa 7 rnoi mpôl tâm xã dôl nsum nuih n’hâm ndrel n’gâng kan tâm nkuăl ndâk ƀon lan mhe, nsôih lôch năm 2025 mra jêh lôch bôk nau kan aơ./.