Lôch 2 nar n’gul pah kan ndăn ngăch, răp jăp n’hanh dơn kan, ôi 17/5 ta Nhih pah kan Trung ương Đảng, Tâm nchră n’gul năm kan Ban Chấp hành Trung ương Đảng khoá 13 hŏ n’glôch jêh. Tổng Bí thư Nguyễn Phú Trọng ƀư tơm n’hanh geh nău lah khlay n’glôch jêh tâm nchră. Uănh tay lôch jêh geh bah bôk năm kan tât aƀaơ, Tổng Bí thư Nguyễn Phú Trọng an gĭt, he hŏ tĭng ƀư geh nău dơi rnoh tât kan, nău dơn kan: nkre rgum njrăng, n’gang mât kân nuh srê, nkre ntrŭt ntrôl dâk hao tay n’hanh hun hao wăng sa – rêh jêng kon nuĭh, rdâk njêng jâng wăng sa êng, ƀư tơm êng nkre đah lor nchrăp, nsrôih lăp rgum dak bah dih jru hvi n’hanh nsĭt geh.

Bah ngăn ngăn rđău kan tâm n’gul bôk năm kan khoá XIII mhe aơ, Tổng Bí thư Nguyễn Phú Trọng nchŏng kloh, 5 nău tă ơm gĭt kơt nti mpeh nău rgâl mhe trong mât bôk kan n’hanh trong gŭ rêh, pah kan tâm nê, ân rgum an n’gluh dŏng lor ăp kôp n’hanh săk tam lam trong kan pháp luật, ăp quy định, nău way, rêng pah kan gay tĭng ƀư răp jăp, dơn ngoăy lam Đảng n’hanh lam trong kan chính trị. Nkoch mpeh trong rƀŏng dơn nău kan ntơm bah aơ tât lĕ năm kan Đại hội 13, Tổng Bí thư Nguyễn Phú Trọng dăn đă, rgum an tĭng ƀư jăp 5 nău  kan rgum tơm; lơn lah uănh khlay ntrôl dăng n’hanh ƀư jăp lơn đŏng pah kan rdâk njêng, dăp rgum Đảng n’hanh lam trong chính trị kloh uĕh, nâp dăng ngăn.