Kơp dơn bah Ntŭk nchroh n’gơ neh n’hanh nchroh mbơh dak lêng rdŭl, Viện Vật lý Địa cầu an saơ, knŭng tâm 20 nar bôk khay 7, ta nkuăl Kon Plông, n’gor Kon Tum lĕ geh 70 rơh n’gơ neh. Ta năp nĕ Ntŭk kan lĕ kơp dơn geh tât hang rhiăng rơh n’gơ neh, rmeh n’gơ geh ta ntŭk aơ. Gŭ rêh bah dâng nkual bah dâng bah thủy điện Thượng Kon Tum, yuh Trần Thị Thu n’hanh âk nuĭh ƀon lan ta thôn 3, xă Tân Lập, nkuăl Kon Rẫy dŭt rvê rnôk geh nău mbơh mpeh n’gơ neh:

“Nkual ƀon lan gŭ ta aơ bah dâng jâng dak bât. Kônh wa tăng nteh n’gơ, n’gơ neh lah klach rvê. Lah kơt bah lơ ri n’gơ neh ma khuch ma pơk dak mô lah dak pling jŭr ri kônh wa ta nkual aơ dak băm lĕ. Way lah pơk dak mpling lĕ băm mô gĭt lah rêh m’hâm ƀư?”.

N’hêl na nê̆, tâm rhiăng rơh n’gơ neh, rmeh n’gơ geh nar bah năp ta Kon Plông, nuĭh ƀon lan dơi saơ n’gơ lah dŭt klach. Nuĭh ƀon lan knŭng geh n’gơ neh, rmeh n’gơ tă bah nău mbơh bah ngih pah kan way kan n’hanh truyền thông. Wa Bùi Thị Oanh, jay ta thôn Vi Rin, xă Đăk Tăng, nkuăl Kon Plông lah kơt aơ:

“Ƀon lan ta aơ khân pơng saơ nâm ơm. Lĕ saơ mô hŏ geh nuĭh khĭt ma klach. Mô hŏ saơ klach lah ngăn kơt nĕ. Ta aơ lĕ geh mô hŏ geh nău têh”.  

Ta năp nău ntoh na nao bah n’gơ neh ta nkuăl Kon Plông, gay ƀon lan mô phit klach yơm mô thơ tha, ăp gưl n’gâng kan ƀon lan n’gor Kon Tum lĕ n’hao uănh nđôi, mbơh nău, ntĭm trong rdâng gay n’hŭch nău lư n’hanh đăp mpăn nău mĭn nuĭh ƀon lan. Yơn lah, tĭng wa Nguyễn Hữu Tháp, Groi Kruanh UBND n’gor Kon Tum, n’hŭch đêt ngăn aƀaơ lah mô geh du ntil nău mĭn njêng jru mpeh n’gơ neh ta nkual aơ n’hanh aơ lah kơt trôk nar lơh mô dơi mbơh njrăng ơm jêng geh dŭt ndal.

“Ntĭm rđău tay ăp n’gâng kan, nău kan, ăp ntŭk, nkuăl Kon Plông tâm rgop rjăp đah ăp Ntŭk mĭn njêng gay uănh nđôi, nchrăp rdâng đah n’gơ neh. N’gor Kon Tum mô hŏ geh nău blău âk mpeh mât uănh n’hanh rdâng đah n’gơ neh. Đă Ban ntĭm rđău ngih dak njrăng n’gang trôk nar dŭt n’hâm uănh tât kơl ƀon lan gay nchroh mbơh, rdâng rnôk geh nu nău n’gơ neh ta lam n’gor”.

Tĭng kơp dơn bah Ntŭk mbơh nău n’gơ neh n’hanh mbơh njrăng dak lêng rdŭl, Viện Vật lý Địa cầu, tâm rhiăng rơh n’gơ neh, rmeh n’gơ ta nkuăl Kon Plông, n’gor Kon Tum bah năm 2022 tât aƀaơ, n’gơ neh geh rnoh têh ngăn lah 4.7 geh ta dŭt khay 8/2022. Jêh rơh n’gơ neh aơ, Văn phòng Ban ntĭm rđău Ngih dak mpeh njrăng n’gang trôk nar lĕ pơk âk nău ƀư gay nchrăp rdâng đah n’gơ neh, kơt: hăn uănh ngăn, ƀư tiăr nti an cán bộ lĕ rngôch ăp xă, nkuăl têh bah nkuăl Kon Plông; ƀư tiăr nti rdâng đah dak lip, n’gơ neh...

Yơn lah tât aƀaơ mô hŏ geh du ndơ khoa học way kan jru mĭn njêng mpeh nkô̆ nău, rnoh klach bah n’gơ neh ta nkual nkuăl Kon Plông, n’gor Kon Tum gay bah nĕ dăn đă ăp trong mkra rdâng tâm di.