Pơh bah năp, N’gâng kan Văn hóa-Thể thao n’hanh pâl nđaih n’gor Dak Lak (Việt nam) lĕ geh rơh pah kan, tâm nđŭr văn hóa ta n’gor Sê Kông (dak Lào).

Tĭng wa Nguyễn Thụy Phương Hiếu, Groi Giám đốc N’gâng kan Văn hóa- Thể thao n’hanh pâl nđaih Dak Lak, aơ lah nău ƀư tâm ăp bôk nău kan tâm rnglăp nchră nău văn hóa bah n’gor Dak Lak năm 2022. Rơh pah kan di nkah gĭt 60 năm ndâk njêng tâm boh tâm rnglăp nchră nău Việt Nam-Lào, 45 năm kan ndrel dăch dêh Việt Nam-Lào n’hanh dơi ƀư di nkah gĭt 47 năm nar quốc khánh dak băl Lào nar 2/12.

Tâm trôm rơh pah kan, 2 ding lĕ rgum nchră, tâm rgâl mpeh nău kan ndrel hun hao văn hóa n’hanh pâl nđaih. Tâm ban ŭch ký ton nkah gĭt đah 2 n’gâng kan bah 2 n’gor mpeh nău kan dnrel, tâm ntop kơl tâm nău hăn ndrel đah văn hóa n’hanh pâl nđaih tâm lvang aơ tât năm 2025. Tĭng nkô̆ nău ký ton, 2 ding mbra tâm plĕ ƀư tĭng nău kan nchră nău văn hóa, mdơ̆ mpôl nghệ thuật gưl n’gor hăn n’gor băl gay tâm nđŭr kơt ƀư hăn uănh boăt nthoi pâl nđaih đah doanh nghiệp đah ăp ntŭk pâl nđaih ta ăp n’gor.

Wa Nguyễn Thụy Phương Hiếu an lah, lĕ 2 n’gor mpeh tâm 3 dak hun hao pâl nđaih Lào-Việt Nam-Campuchia lĕ dơi Chính phủ 3 dak mbơh an. Dak Lak lĕ geh trong nchrăp mpeh 3 dak hun hao pâl nđaih n’hanh mbra ơm dơi ƀư tâm năm tât.

Tâm rnôk ƀư bôk nău kan, đoàn n’gor Dak Lak lĕ tât khâl, mbah rhơn kruanh n’gor Sê Kông n’hanh râng nkah gĭt quốc khánh dak CHDCND Lào ta n’gor Sê Kông. Dak Lak tâm rgop ƀư bôk nău kan nghệ thuật n’hanh geh nău uănh mĭn, groi nđôi n’hanh ntroh n’gôr dŭt n’hâm bah n’gor Sê Kông. Wa Nguyễn Thụy Phương Hiếu lah:

Hăn di tâm rơh Quốc khánh 47 năm bah dak băl, jêng lah lơ dăch dêh tâm rŏng lơn. Tâm rơh hăn ri rmôt kan dơi kruanh n’gor, kruanh n’gâng kan kơt ăp n’gâng kan nău kan nta an dŭt nơih, ăp ntil n’hanh nău rŏng dŭt răm lĕ an rmôt kan geh âk nar gŭ ta Sê Kông nkre ƀư tĭng uĕh nău kan bah nơm kơt wât tay mpeh văn hóa kơt bri dak neh ntu, ntŭk ntô ăp ntil bah n’gor Sê Kông jêh nĕ n’hao lơn kan ndrel đah 2 n’gor kơt 2 dak tâm năm tât.