VOV4.Mnông- N’ha cò gŭr mănh êr ntô̆ n’hao ta ăp chor jay tâm ƀon Drang Phôk, xã n’har bri Krông Na, nkuăl Buôn Đôn, n’gor Dak Lak lah rup ueh, lah na nê̆ nău ƀư tơm têh dăng ta n’har bri neh dak. Ăp n’ha cờ ngih dak mhe geh pă an kơl an ƀon lan geh ndơn tay n’ha cờ lĕ ơm blak, gay ma n’ha cò gŭr mănh êr mbro mbrăng ntô̆ n’hao ta nkual n’har bri.

     Dơn n’ha cờ ngih dak mhe geh pă an, yuh H’Bố Mlô, ta ƀon Drang Phôk, xã Krông Na, nkuăl Buôn Đôn dŭt rhơn ngăn. Yuh H’Bố nkoch, mbra yông cò mhe ndơn an cò ơm lĕ yông bâh năm e lĕ blak, ơm. Âk năm ba năp, yông cò ngih dak lĕ jêng nău kan ƀư ƀa ƀơ bâh ăp rnăk vâl tâm ƀon Drang Phôk, bôl ma nar lễ mô lah nar ngăn. Ăp rnăk way geh hăn ta bri sreh tơm gle jong n’hanh sŏng ƀư jrŏng cờ yông ta năp jay dŭt ueh ngăn. Yuh h’Bố nkoch.

Ăp năm tâm ƀon ăp rnăk geh dơn n’ha cờ mhe rĭ gâp sŏk n’ha cờ mhe yông ta năp jay. Gâp dŭt rhơn n’hanh nău nĕ lah dŭt khlăy rnôk geh dơn yông cờ, ryơk rnê, mpơl nău ƀư tơm bâh neh dak he nơm.

        Ƀon Drang Phôk lah ƀon dŭt ngai ta nkuăl Buôn Đôn, ta nklang nkaul rđŭng bâh bri ngih dak mât Yok Đôn, ngai đah trong n’har bru đah dak băl Campuchia bơi tât 50km. Ƀon geh 140 rnăk đah rlău 500 nuĭh, tâm nĕ 86% lah rnoi đê̆. Wa Y Tê B.Krông, Bí thư chi bộ ƀon Drang Pôk an gĭt, bâh geh ngih dak ntuh kơl, ăp năm dăch aơ, nău rêh ƀon lan lĕ geh rgâl âk, jêng têh ueh lơn. Ngăn lah, đah nău mbơh tơih rgŏ jă bâh n’gâng kan ta ntŭk, nuĭh ƀon lan lĕ njêng nău bên yông cờ ta năp jay n’hanh rgŏ ăp trong ƀon. ăp rnôk geh n’ha cờ ơm blak, nuĭh ƀon lan ndơn tay mhe n’hanh mât an ueh.

Ăp nar lễ têh, nar khlăy n’hanh bôk năm mhe rĭ geh dơn cờ mhe jêng lah ƀon lan yông vơt năm mhe n’hanh ăp nar khlay đah nău mĭn lah ƀon lan dŭt rhơn ryơk rnê. Aơ lah nău mbơh tơih nău rŏng dak n’hanh ryơk rnê mpôl rnoi, rhơn nar geh nău dơi gay ma bâh nĕ rgâl nău mĭn n’hanh nău rêh bâh ƀon lan êng lơn.

        Tâm ăp nar pah kan bâh ăp khay pe n’har bri mhe geh leo ƀư, đoàn  2 n’gor Dak Lak n’hanh Lâm Đồng lĕ pă an 150 n’ha cờ ngih dak an nuĭh ƀon lan ƀon Drang Phôk. Aơ lah nău kan bâh mom ndăm 2 n’gor gay ma ntop mbơh tơih nău rŏng ƀon tơm neh dak, rgŏ jă ƀon lan nkual n’har bri mpŏng sĭt đah neh dak, rdâk njêng ƀon tơm ta nkual n’har bri ăp nar lơ ma têh ndrŏng.

Nô Y Lê Pas Tơr, groi Bí thư rnâng kan đoàn n’gor Dak Lak an gĭt:

Mpôl hên geh pă an n’ha cờ ngih dak an nuĭh ƀon lan rêh ta ntŭk xã Krông Na. Aơ lah nău kan ƀư na nê̆ nkre rgŏ jă nuĭh ƀon lan geh nâp nâl, đăp mpăn pah kan jan sa, gŭ rêh gay ma mât nău ƀư tơm n’har bri ngih dak.

        Rup n’ha cò ngih dak ntô̆ mpăr ta trôk nđir nkual n’har bri lơ ma n’hao nău ryơk rnê bâh ăp nuĭh ƀon lan ta ƀon n’har bri Drang Phôk. Yông cờ ngih dak mô dơn lah nău ueh văn hóa, mpơl nău rŏng dak n’hanh nău lah ueh đah ăp anh hùng liệt sĩ lĕ khĭt yor nău đăp mpăn mpôl rnoi. Bâh nĕ, ntrôl an ăp nuĭh ƀon lan, ngăn lah rơh mom geh ntop pă tay soan mom gay ma rdâk njêng n’hanh mât ƀon tơm.

          Nuĭh rblang: Thị Đoắt