Tĭng ƀư nău rđău đă bah Bộ Giao thông vận tải, ăp n'gor tâm lam dak dôl mât kân lhăt ndeh rdeng jâk. Ta Gia Lai, dôl lăp tâm khay et tao, mpôl kan dơi kan hôm kan nsum lhăt gay mât kân ndeh rdeng tao lhăt bêng ir.

Kơt nău way, ăp khay wai kơt aƀaơ, ndeh rdeng tao nsrŭng kâp njok ta jâng gung nhih máy Đường An Khê, mô lah Nhih máy Đường A Yun Pa, n'gor Gia Lai. Yơn êng đah ăp năm, năm aơ ăp ndeh rdeng tao lăp tât ăp nhih máy dja dơi nsrŭng mprĭp grep. Ăp nuĭh tơm ndeh hŏ gĭt dăp  tao rĭng uĕh tâm trôm bong ndeh. Âk ndeh rdeng têh dơi an rdeng di rnoh jâk, gay đăp mpăn hăn ntung trong ta ăp njăr trong geh tăm tao bah ăp nhih máy đường. wa Lương Tuấn Thông- Groi Giám đốc Kỹ thuật nkret njêng Nhih máy Đường AYun Pa an gĭt, năm aơ nkô̆ nău mât kân ndeh rdeng lăn lhăt bêng ir dơi tĭng ƀư jăp bah rêng đăng kiểm tât mât kân hăn ntung trong. Gay rgop suan ndrel  ăp mpôl kan dơi  kan, mpeh nhih máy đường hŏ geh trong kơl prăk ndeh rdeng đah ăp ntil ndeh rdeng di rnoh bêng jâk.

      "Aƀaơ công ty geh trong nchrăp ƀư tĭng quy định bah pháp luật, hŏ nkoch trêng đah ăp ndeh rdeng gay pah kan rgŏ jă dơi đăp mpăn gay rhŏ dŏng an pah kan nkret njêng bah nhih máy. Công ty hŏ ndrel hăn đah ndeh rdeng, đah ăp ndeh rdeng 17 tấn (di rnoh bêng jâk) ri công ty mbra kơi ntop 8% gay đăp mpăn nău geh an ndeh rdeng an kônh wa ƀon lan kan lŏ mir. Đah ăp ndeh rdeng lăn lhăt bêng ir ri Công ty mbra mô an n'glăp n'hanh nchih rmal ma siƀŭt".

         Tĭng nô Nguyễn Đình Khang, nuĭh ơm jŏ năm ƀĭt ndeh rdeng tao an ăp nhih máy đường ta n'gor Gia Lai, năm aơ âk nuĭh ƀĭt ndeh sơch rdeng tao n'hao âk tơ̆ plơ̆, rgâl bah hôm ma ndra rdeng tih nău  way yor rnoh rmal an ăp nău tih dja lah dŭt âk.

         "Rnôk lăp tâm khay sreh tao, mpôl kan dơi kan nkoch trêng mpeh rdeng lăn lhăt bêng ir, nuĭh ƀĭt ndeh ton ƀư di tĭng nău nkoch trêng bah mpôl kan dơi kan đŏng".

Trung tá Lê Công Ngọc, Kruanh Rmôt Cảnh sát Giao thông mbrô 1, Jrô Cảnh sát giao thông, Công an n'gor Gia Lai an gĭt: Ntơm bah bôk khay et tao tât aƀaơ, rmôt hŏ rmal rlău 100 tơ̆ nău tih. Aƀaơ, ăp nkual tăm tao bah Gia Lai hôm âk hang rhiăng rbăn tấn ta mir đŏng, jêng nhih pah kan ntrôl dăng tay ăp trong mât kân ndeh rdeng jâk.

          "Tâm khay sreh tao 2022 – 2023, Jrô Cảnh sát giao thông, na nê̆ lah rmôt 1, mât ŭanh njăr trong Quốc lộ 25 hŏ ký ton đah 157 bôk ndeh râng rdeng tao sĭt tât Nhih máy AYun Pa. Jrô cảnh sát giao thông hŏ kan nsum đah 5 nkuâl geh tăm tao, ăp pơh mpôl hên kan nsum đah ăp nkuâl gay nkra mpeh way nkô̆ rdeng lăn lhăt bêng ir".

Gay n'hao nău treng nđôi ăp bôk ndeh geh ma nău mpơl rdeng lăn lhăt bêng ir, Tổng cục Đường bộ Việt Nam hŏ đă ăp Sở Giao thông vận tải, ăp Cục Mât ŭanh trong ndeh rđău đă mpôl Thanh tra giao thông dŏng ndơ rhôp rup gay rhôp tay rup gui, lôch nê rmal bah kơi ăp bôk ndeh  tih. Chính phủ hŏ n'gluh an dŏng Nghị định 123, tâm nê, n'hao dăng rmal đah nău tih rdeng lhăt bêng ir. Đại tá Đỗ Thanh Bình, Groi Cục trưởng Cục Cảnh sát giao thông an lah, gay rmal lhăt nău dja ân ntrŏng gĭt kloh nău dơn kan bah nhih pah kan mât uănh đăp mpăn nâp uĕh ndeh rklư, ân ƀư lhăt jăp nkô̆ nău dja.

        "Mpôl hên mbra rgum lĕ mpôl kan n'hanh tâm pă gưl dŭt kloh, tĭng đơn vị kơt: Cục Cảnh sát giao thông dơn nău kan ntŭk tât, Jrô Cảnh sát giao thông dơn nău kan ntŭk tât, Kruanh công an nkuâl dơn nău kan ntŭk tât n'hanh nău kan nsum bah công an xã tâm trong hăn ôp uănh bôk năp gay năl ăp bôk ndeh, ăp tơm jêng luh rdeng lhăt bêng ir n'hanh rmal lhăt. Bộ Công an hŏ pah kan đah Bộ Giao thông gay năl kloh nău dơn kan tâm trong mât đăp mpăn nâp  uĕh kỹ thuật ndeh rklư, mô an ndeh rklư đăng kiểm du ding, lôch nê luh hăn ri jêng rbong mô di ndeh nơm đŏng ôh n'hanh mô geh nuĭh dơn nău tih mpeh tơm luh bah rdeng lhăt bêng ir nê lah  nthoi têh jong tay rbong ndeh".

        Gay n'hao dăng pah kan hăn ôp uănh rdeng lăn lhăt bêng ir ndeh tâm let năp tay, Bộ Giao thông vận tải hŏ n'gluh an dŏng siƀŭt njuăl tât ăp nhih pah kan, đơn vị tâm n'gâng kan an ƀư trong nchrăp khay hăn ôp ŭanh lhăt ndeh rdeng jâk bêng tâm lam dak.