VOV4.M'nông: Nar 4/5, Bộ Giáo dục n'hanh Đào tạo njuăl si ƀŭt tât Giám đốc ăp Sở Giáo dục n'hanh Đào tạo mpeh nău n'hao dăng njrăng, n'gang rmok dak an kon se nti. Si ƀŭt njuăl bah Bộ Giáo dục n'hanh Đào tạo đă ăp Sở Giáo dục n'hanh Đào tạo rđău đă an ƀư geh nău tam tay ăp si ƀŭt rđău đă bah Thủ tướng Chính phủ, Bộ trưởng Bộ Giáo dục n'hanh Đào tạo mpeh njrăng, n'gang khĭt rmanh rmok dak đah kon se nti. Ăp Sở pơk rơh hăn nkoch trêng, ntĭm nti nău gĭt êng gay kon se nti gĭt n'hanh tĭng jăp ăp nău way mpeh njrăng, n'gang rmok dak,  lơn lah nău gĭt năl ăp ntŭk rŭ hôch geh ma nău rmok dak; an ƀư, ntĭm nti nău mbơh gĭt, blău njrăng, n'gang rmok dak tât tĭng nhih nti, jrô nti lor rnôk kon se nti tât khay rlu nti; leo âk trong ƀư nti re, ntĭm nti nău gĭt blău đăp mpăn an kon se nti tâm nhih nti. Rđău đă n'hao dăng lơn đŏng pah kan nsum đah nhih nti n'hanh rnăk wâl, nsum mpôl n'hanh n'gâng kan ta ntŭk gay mât uănh, groi nđôi kon se nti tâm rnôk rlu nti; mât đăp mpăn, njrăng, n'gang rmok dak./.

Nuĭh rblang: Điểu Thân