VOV4.M’nông: Jêh âk nar mêt uănh, joi gĭt mpeh tơm bah ntŭk n’gơ neh nkuăl Kon Plông, n’gor Kon Tum, rmôt hăn kan bah Rnâng kan rđau nau kan neh dak mpeh nau njrăng, rdâng srê hŏ geh nar pah kan đah Rnâng kan rđau nau njrăng rdâng trôk nar lơh ndrel joi kơl nŭih tât khuch n’gor Kon Tum. N’hao nau tâm rgop, nchrăp rdâng đah n’gơ neh gay đăp mpăn nau rêh, drăp ndơ bah ƀon lan ndrel ăp ntŭk ndâk njêng lah nau kan geh uănh khlay.

            Nau mbơh bah nkuăl Kon Plông, bah Rnâng kan rđau nau njrăng rdâng trôk nar lơh ndrel joi kơl nŭih tât khuch n’gor Kon Tum đah rmôt kan ân saơ, tơm n’gơ neh tâm rơh rlau aơ hŏ ƀư ƀon lan ntoh nau rvê. Nua nkoch trêng bonh đă ƀon lan, njrăng der ân ueh rnôk geh n’gơ neh hŏ geh nkuăl Kon Tum ƀư bôk năp, yơn lah nau geh ri ê geh kơt nau ŭch. Bah năp nau n’gơ neh jêng nau khuch mhe, ăp ntŭk kan bah n’gor Kon Tum mô geh nau blau, wa Văn Tất Cường, Groi Giám đốc N’gâng kan tuch tăm ndrel Hun hao ƀon lan n’gor Kon Tum, Uỷ viên Rnâng kan rđau nau njrăng rdâng trôk nar lơh ndrel joi kơl nŭih tât khuch bah n’gor, đă:

            “Gâp đă ăp N’gâng kan, ntŭk kan geh tât ƀư nkre leo lăp nau kan mĭn, nchră mpeh nau nchrăp tât nau n’gơ neh tâm rơh rlau aơ tâm n’gor Kon Tum, ngăn lah bah nkuăl Kon Plông. Ơm leo luh ăp nau uănh mpeh ăp nkô̆ geh tă bah nê lah nau mbơh, nkah đă ân n’gâng kan bah nkuăl gay ma năn ndâk nau kan gay ma rdâng đah ăp nau khuch bah trôk nar lơh mra geh tâm nkuăl”.

            Tâm nau djăt nau rgop tă bah n’gâng kan nkuăl Kon Plông, n’gor Kon Tum ndrel ntoh măt N’gâng kan, ntŭk kan kŏ kơt lah nŭih ƀư nau kan, Rmôt hăn kan bah Rnâng kan rđau nau kan neh dak mpeh nau njrăng, rdâng trôk nar lơh, bah năp măt ân geh rgop tâm nau uănh ăp nau khuch ngăn tă bah ăp rơh n’gơ neh, kŏ kơt lah nau khuch tă bah neh, gay ma njrăng rdâng. Der nau mĭn thơ tha, yơn lah măt êng kŏ der nau klach rvê, khuch tât nau rêh, hun hao văng sa rêh jêng ndrel đăp mpăn bah nkuăl. Wa Nguyễn Đức Quang, Groi Kruanh n’gâng kan njrăng rdâng ndrel kơl rklaih nau khuch yor trôk nar lơh, Groi Kruanh Jrâu kan Rnâng kan rđau đă, Kruanh rmôt ƀư nau kan lah rjăp:

            ‘Kơp uănh tay ăp nau kan njrăng rdâng, djăt ăp nkô̆ nau geh tât nau rdâng đah n’gơ neh, tă bah ăp nau mbơh ntĭm bah Rnâng kan rđau nau kan bah neh dak mpeh nau njrăng rdâng trôk nar lơh ndrel nau mbơh bah Viện Vật lí địa cầu, jêh ri bah N’gâng kan nchrăp kan gay ma ân n’gâng kan, nŭih ƀon lan gĭt gay geh nau njrăng rdâng nau tât khuch. Rđau ăp ntŭk ƀư nau kan tâm rgop nsum đah ntŭk kan mĭn rvê, ơm joi luh nkô̆. Ntơm bah nau tă blau bah Sông Tranh, nơm ân geh rhuăt gleh mông mĭn, ƀư gay ma ơm ndơ̆ luh dơi nau nchră, nau uănh tât ngăn, gay ma geh nau kan ân tâm di, ngăch, săk tam ndrel têm nkrem dơi mông ƀư kan”.

            Ndrel ma nau n’hao nau tâm rgop, nchrăp rdâng đah nau n’gơ neh gay ma đăp mpăn nau rêh kon nŭih, drăp ndơ bah nŭih ƀon lan kŏ kơt lah ăp nau kan ndâk njêng tâm nkuăl Kon Plông, n’gor Kon Tum, mpeh nau jŏ jong Rmôt kan Rnâng kan rđau nau kan bah neh dak mpeh nau njrăng, rdâng nau tât khuch đă Rnâng kan rđau nau njrăng rdâng trôk nar lơh ndrel joi kơl an nau tâm mâp rmanh bah n’gor Kon Tum jao ân ăp ntŭk kan bah nkuăl tâm rgop nsum đah Viện lật lý địa cầu, ăp ntŭk kan khoa hoch ndal ntrŭnh ƀư nau mĭn mpeh n’gơ neh, tơm n’gơ neh. Viện vật lí địa cầu geh nau mbơh kơl uănh ndrel nchră nau gay Rnâng kan rđau nau kơl nchră nau ƀah Chính phủ geh ăp nau kan ngăn, jŏ jong. Ăp ngih máy thuỷ điện, kơt: Thượng Kon Tum, Đăk Ring kŏ kơt lah ăp nau kan geh tât nglau bât dak êng êng ân geh kơp, mêt uănh ăp nau kan gay mât đăp mpăn ân nkuăl tâm dâng tĭng nau uănh khlay, ngăn lah đah nau njrăng rdâng bah tơm n’gơ neh./.

Nŭih rblang: H’Thi