VOV4.M'nông: Nar aơ (19/5), tâm lam dak ƀư âk nău kan Nkah ndray 132 năm Nar deh Kruanh Hồ Chí Minh. Bah năp nê, tâm pơh aơ nơh, ta Hà Nội hŏ ƀư Tâm nchră khoa học gưl neh dak, pla n'hơ rup n'hanh si ƀŭt “N'hao uĕh nuih n'hâm cách mạng, ntru lĕ tĭng nău nŏng êng nơm”. Wa Võ Văn Thưởng, Ủy viên Bộ Chính trị, Rnâng kan Ban Bí thư râng n'hanh ƀư tơm tâm nchră. Lôch nê rgop ƀư kloh ăp rnoh khlay khoa học - ngăn ngăn nuih n'hâm Hồ Chí Minh mpeh “N'hao uĕh nuih n'hâm cách mạng, ntru lĕ tĭng nău nŏng êng nơm”.

Rnôk hôm rêh, Kruanh Hồ Chí Minh, nuĭh ntơm njêng n'hanh tiăr nti Đảng he, way ŭanh khlay mha êng tât pah kan rdâk njêng Đảng, gay Đảng he kloh uĕh, nâp dăng ngăn, lah du Đảng cách mạng ngăn, lah nuih n'hâm uĕh, lah nău gĭt blău kloh rsang. Nkhêp nkah ndray 39 năm nar njêng Đảng (03/02/1969), Nuĭh hŏ nchih tác phẩm “N'hao uĕh nuih n'hâm cách mạng, ntru lĕ tĭng nău nŏng êng nơm”, lah rjăp nău khlay rđău kan bah Đảng đah cách mạng Việt Nam n'hanh nău khlay ân n'hao nuih n'hâm cách mạng đah cán bộ, đảng viên lah nsum, rơh kơn mom ndăm lah êng. Nkre, nchŏng luh ăp nău mpơl, ăp nău tât khuch bah tĭng nău nŏng êng nơm n'hanh nkoch luh du đêt trong nkra rdâng lơh tĭng nău nŏng êng nơm...Rlău n'gul rach năm rnôk ntơm njêng luh, tât aƀaơ nău nchih hôm geh rnoh khlay kơt ơm đah pah kan rdâk njêng, dăp rgum ăp tŏng Đảng, đah ăp cán bộ, đảng viên. Nău nchih lah nău ntĭnh tiăr nti, lah nău ntĭnh ntăn ma Wa an tay ăp rơh kơn cán bộ, đảng viên ân way hăn tiăr nti, nsrôih njrăng, n'gang n'hanh rlăch ndăng jut jăng tĭng nău mĭn êng nơm gay n'hao nuih n'hâm uĕh cách mạng.

        Tĭng GS. TS Hoàng Chí Bảo, nuĭh rnâng kan gưl têh Học viện Chính trị Quốc gia Hồ Chí Minh, tâm nău nchih  “N'hao uĕh nuih n'hâm cách mạng, ntru lĕ tĭng nău nŏng êng nơm”, Wa rgum âk tâm nău nduih lah ăp nuĭh tĭng nău nŏng êng nơm, Wa nchŏng kloh: "Phŭng rlăng tâm trôm neh dak nơm, phŭng rlăng tâm trôm nuih n'hâm hôm klach rvê rlău ma phŭng rlăng lăp tŭn jot bah dih lăp”- Aơ lah ăp nău mbơh njrăng lor răp jăp an he tâm nău tiăr nti, nuih n'hâm gŭ rêh uĕh tât dŭt nău rêh:

      “Wa nduih lah lĕ ma ăp nuĭh geh nău mĭn kơp n'hâm suan, jêng lah geh du đêt n'hâm suan kan hŏ kơp đah Đảng, hŏ đă Đảng ân koh rong dơh mhâm wa? Wa hŏ nchih dŭt kloh rjăp, geh ăp nuĭh yor ntưp n'hanh tĭng nău nŏng êng nơm ma ƀư đảng jêng du ntung gung gay hao tĭng kơn lư săk. Ăp nuĭh geh nău mĭn tŏng nău nŏng êng nơm, nău têh mô dơi kan, nău jê̆ mô dơi ƀư, kơt nti ri rleh ƀlao, nău kan ri mbrơi nkai, kêng dŭt lah tih nău way rĭng grep kan bah Đảng n'hanh wăk geh nău tih, jêng rlăch ndăng Đảng. Ăp nău mĭn di na nê̆ rblang kơt nê, dŭt jru hvi sôt hơr rlău n'gul rach năm bah năp nơh- lah du nău mbơh njrăng lor lhăt jăp an he tâm nău tiăr nti nuih n'hâm gŭ rêh tât dŭt lĕ nău rêh".

        Ăp nău nchrăp lor dăn đă ta rnôk tâm nchră hŏ ƀư kloh mpeh ntŭk gŭ kan khlay nuih n'hâm uĕh lŏng Hồ Chí Minh tâm lam rêng nău mĭn bah Wa mpeh ăp nkô̆ nău tơm bah cách mạng Việt Nam; nău khlay ƀư tơm, jâng nsing nău mĭn rôih sŏng bah nău mĭn, nuih n'hâm Hồ Chí Minh đah pah kan rdâk njêng Đảng lah nsum n'hanh pah kan rdâk njêng Đảng mpeh nuih n'hâm uĕh lŏng lah êng bah ntơm tât aƀaơ n'hanh an rơh mhe; tâm boh đah nău mĭn, nuih n'hâm uĕh lŏng, trong gŭ rêh Hồ Chí Minh; rblang nkra an tâm di tơm suan jêng nău geh n'hanh tơm ƀư jêng nuih n'hâm uĕh lŏng gay mât tơm suan ntrôl an hun hao nkre rdâng lơh nău mĭn tŏng nău nŏng êng nơm...

        Bí thư Đảng uỷ Khối ăp nhih pah kan Trung ương Huỳnh Tấn Việt an gĭt, Tâm nchră rgop n'hao nău gĭt êng n'hanh ƀư jru hvi lơn mpeh nkô̆ khlay, rnoh khlay bah nău mĭn, nuih n'hâm uĕh lŏng, trong gŭ rêh Hồ Chí Minh đah pah kan rdâk njêng n'hanh dăp rgum rĭng uĕh Đảng. Nkre, lah rnôk gay nkah tay n'hanh ƀư jru hvi lơn ăp nău ntĭm nti bah Kruanh Hồ Chí Minh, n'hanh gay cán bộ đảng viên uănh năl di tay săk he nơm, gay mât uĕh tay ăp nău uĕh nău blău, nkra bah ăp nău mpăng đêt, di lah nuĭh rhŏ dŏng kan bah ƀon lan kơt Kruanh Hồ Chí Minh tă ntĭnh ntăn.

Wa Huỳnh Tấn Việt an lah, nău đă ndơ̆ luh tâm rnôk aƀaơ lah ăp cán bộ, đảng viên ân tĭng ƀư jăp nău dơn kan dâk leo lor; nuĭh geh nău kan lơn ma têh, ntŭk gŭ kan lơn ma têh, lơn lah nuĭh mât bôk ăp nhih pah kan, đơn vị tâm Đảng n'hanh tâm n'gâng kan mât ƀon lan lơn ma dâk leo lor tâm trong tiăr nti, nuih n'hâm uĕh lŏng, trong gŭ rêh, pah kan, ngăch ngăr gay lam mpôl, ăp nuĭh ƀon lan kơt tĭng:

      “Lăp tâm nuih n'hâm nău ntĭm bah Wa, he ân rôih tĭng ƀư n'hanh nsrôih tĭng ƀư kloh uĕh tâm rmôt bah Đảng, nking nchăng n'hanh ntrôl rŭch nău tih sa khâm, nău hŭch hêng mpeh nău mĭn chính trị, nuih n'hâm uĕh lŏng, trong gŭ rêh bah cán bộ, đảng viên, nô nău "ƀư jêng djơh mân êng”, “rgâl jêng êng” tâm rkeh ndrăng nơm; Ndơ̆ tay nău kơt nti n'hanh ƀư tĭng nău mĭn, nuih n'hâm uĕh lŏng, trong gŭ rêh Hồ Chí Minh jêng nău kan way ƀư mbro, jêng du nău ŭch geh văn hóa tâm Đảng”.

Lah rđău đă tâm nchră, wa Võ Văn Thưởng, Ủy viên Bộ Chính trị, Rnâng kan Ban Bí thư lah rjăp: N'gâng ntơm bah rdâk njêng Đảng mpeh nuih n'hâm gŭ rêh uĕh lŏng lah kơt dŏng ƀư ngăn nuih n'hâm cách mạng, lah hăn ndrel đah ƀư, dâk kan du jâng nsing chính trị kloh rsang. Tĭng nău nŏng êng nơm lah "Bu rkeh tâm nuih n'hâm” jêng ŭch "rdâng lơh" ân ntơm bah "rdâk njêng", tâm nê nău khlay n'glêh an lah rdâk njêng, tiăr nti, nkân nuih n'hâm hưp, n'hao nău dơi kan gay rlăch dun bah năp nău nkơnh... wa Võ Văn Thưởng đă ăp nhih pah kan, đơn vị ân n'hao nău way neh dak, nău jăp tâm Đảng, ntrôl dăng pah kan hăn ôp uănh, groi nđôi, nkre đah rgâl mhe trong rđău kan...;n'hao dăng nău way neh dak, nău jăp kan gay sơch ăp nuĭh hŭch jêng, rgâl jêng nuih n'hâm djơh; rmal lhăt ăp nuĭh tih gay ntĭm nti, mbơh njrăng, nkah an dâk kah rngăl tay, geh nău tam ntop kơl an pah kan ntĭm nti nuih n'hâm uĕh lŏng cách mạng, ntrôl dăng lah uănh êng tih di săk nơm./. 

Nuĭh rblang: Điểu Thân