VOV4.M'nông: Ndrel đah lam dak, cán bộ, tahen công an ta n'har bri bah n'gor Dak Nông dôl khuh n'gôr nchrăp wơt du năm mhe đŏng. Yơn rhơn năm mhe mô chuêl nău kan, ăp tahen ta n'har bri way nsrôih, njrăng lor gay mât đăp mpăn ta n'har bri đŏng.

          Khuh n'gôr wơt Tết Nhâm Dần 2022 dôl n'gôr gră ta n'har bri n'gor Dak Nông, săk ntơr khay năm mhe dôl mprang lam ăp pôih n'har bri. Đah cán bộ, tahen, Pôih lah jay, n'har bri lah ƀon tơm, sa Tết ta pôih tâm ban kơt gŭ sa Tết ta jay đŏng, geh bánh chưng, geh play do, kao mai, kao đào, n'hanh geh năm mhe rhơn mƀak. Năm lor bôk năp wơt Tết ta n'har bri, Binh nhất Lầu Văn Hiện, Rmôt mât phao bleo, Pôih n'har bri Đắk Tiên, Bộ Chỉ huy Biên phòng n'gor Dak Nông an gĭt, nău uănh khlay, rgŏ jă bah kruanh rđău kan, nuĭh mât bôk kan ndrel geh nău nchrăp ăp tŏng bah Pôih gay geh du Tết rhơn mƀak, hŏ kơl ăp tahen kơt nô bah ir nău nkah jay n'hanh gĭt kloh nău khlay ƀư tơm, nău dơn kan bah he ta  n'har bri bah neh dak:

          “Năm aơ lah năm lor bôk năp gâp wơt Tết ta n'har bri. Oh nô tâm Pôih tâm ban kơt oh nô gŭ tâm jay, geh nău tâm uănh tâm ban da dê. Gâp dŭt rhơn, n'hao êng săk lah nuĭh tahen. Năm mhe geh nău mbah rhơn njuăl tât rnăk wâl, băl mpôl du năm mhe ăp nuĭh n'hâm suan ngăch lăng dăng soih, wăng sa geh hao đŏng".

          Ma mpang ti jăp blău bah ăp cán bộ, tahen n'har bri ăp bánh chưng drŭng uĕh rhŏ dŏng sa ăp nar Tết hŏ nchrăp ăp tŏng. Tơm ndơ sa êng ƀa ƀă ơm geh tăm êng tâm mir, way kloh uĕh, nđĭr rêh n'hanh tŏng an dŏng sa Tết. Thiếu tá Lương Văn Phú, Chính trị viên Groi kruanh Pôih n'har bri Đắk Tiên, Bộ Chỉ huy Biên phòng n'gor Dak Nông an gĭt, đơn vị hŏ ƀư jăp pah kan rmăn đăm nău mĭn n'hanh cán bộ, tahen đăp mpăn rhơn năm mhe, wơt tết da dê:

       “Nuih n'hâm bah ăp tahen aƀaơ dŭt rhơn nđơr, n'hanh nchrăp ăp ntil drăp ndơ gay đăp mpăn wơt Tết. ăp oh nô tahen hŏ ntrŏng nău mĭn gay tĭng ƀư ăp nău kan dơi jao.”

        Tâm ban kơt âk Tết êng ƀa ƀă đŏng, Tết Nhâm Dần 2022 dja bah mpôl tahen Pôih n'har bri Dak Nông, bah meng dông piăng tahen, way lah ăp n'gâr phao. Ăp tahen n'har bri nkre wơt tết, nkre rhơn năm mhe, nkre djăt ăp nău nteh n'glônh bah n'har bri, nchrăp luh hăn kan. Lơn ma dăch Tết ri pah hăn ôp uănh, rsong hăn njrăng n'gang bah ăp pôih n'har bri lơn ma dơi an ƀư. Ăp nău kan mât njrăng ƀư tơm hôm way dơi ƀư mbro đŏng. Rnoh tahen bah ăp Pôih way gŭ kâp n'hanh nchrăp tĭng ƀư ăp nău kan dơi jao. Nău rsong hăn, treng nđôi, mât njrăng nuĭh luh lăp tâm nkual n'har bri dơi tĭng ƀư jăp, gay rgop mât njrăng nâp trong n'har bri, n'gâng n'har n'hanh ƀư tơm n'har bri neh dak n'hanh nkre njrăng n'gang nuh srê  Covid-19 du trong geh nău tam. Trung tá Nguyễn Huy Hiếu, Kruanh Pôih n'har bri Đắk Tiên, Bộ Chỉ huy Biên phòng n'gor Dak Nông an gĭt:

      “Dơi Đảng, Ngih dak, ƀon lan jao an năm kan mât uănh, njrăng n'gang n'har bri neh dak, dăn ton mbra tĭng ƀư jăp nău kan, leo ƀư mât njrăng lhăt n'har bri, ntŭk ƀon lan, rƀah gĭt nău lư, kan nsum đah ăp mpôl kan gay rlăch ndăng geh nău tam ăp ntil nuĭh tih, nsrôih ƀư lôch jêh nău kan tâm rơh Tết."

        N'gor Dak Nông geh trong n'har bri jong nklăp 141 km hăn rlău 7 xã n'har bri bah 4 nkuâl lah Cư Jút, Đắk Mil, Đắk Song n'hanh Tuy Đức. Ta lĕ rngôch ăp ƀon lan bah 7 xã n'har bri dja hŏ njêng ăp rmôt mât njrăng êng trong n'har bri, n'gâng n'har da dê. Ăp năm rlău aơ, lơn lah tâm rnôk Tết, nău kan nsum bah mpôl tahen n'har bri đah ăp rmôt mât njrăng êng ƀon lan, ăp rmôt dân quân tự vệ xã hŏ mât uĕh nău tam tâm nău rsong hăn, treng nđôi, njrăng n'gang nuĭh nchuăt rlău n'har bri, lăp tih, rlăch ndăng nking nchăng ăp nău tih ta njok trong n'har bri.

  Đại tá Nguyễn Văn Lư, Chỉ huy trưởng Bộ Chỉ huy Biên phòng n'gor Dak Nông, an gĭt, ndrel đah rdâk njêng ntŭk nsing mât njrăng n'har bri lam  ƀon lan, n'har bri n'gor hŏ tĭng ƀư jăp pah kan tâm dâk nău n'har bri. Lơn lah, tâm rnôk nuh srê Covid-19 tât krit nji, pah kan tâm boh dak bah dih n'har bri hŏ geh ăp trong ƀư tâm di, geh nău tam. Lôch nê, rgop mât uĕh nô nău tâm rnglăp bar dak, mât nâp n'har bri bah neh dak:

       “Tâm rnôk mpeh bah nê geh nuh srê ri mpôl hên ân rgâl trong ƀư, trong tâm boh dak bah dih mhe, mô dơi mâp na nê̆ ri mpôl hên tâm njuăl si ƀŭt tâm rgâl nău, ma trong ôp duh ndal n'hanh tâm mâp đêt nuĭh, tâm mâp nsum ta n'har bri. He mbra dơi lah, ăp trong ƀư, rgâl trong kan ri mpôl hên hôm mât dơi nău kan tâm mbơh gĭt, tâm rgâl nău lư n'hanh rgop kan nsum tâm pah kan mât uănh, mât njrăng ƀư tơm neh dak, n'hanh mât đăp mpăn rnă njrăng ta nkual n'har bri bah ăp ding.”

        Nău nsrôih, lor nchrăp tĭng ƀư ăp nău kan bah mpôl n'har bri ta Dak Nông hŏ n'hanh dôl rgop khlay gay mât đăp mpăn, lam rêh jêng kon nuĭh ta nkual n'har bri bah n'gor. Lơn lah tâm rnôk Tết dja, nău nâp dăng bah ăp oh nô hŏ nsĭt tât nău đăp mpăn an ƀon lan wơt Tết./.

Nuĭh rblang: Điểu Thân