VOV4.M’nông: Ôi lơ 26/8, ntŭk kan cảnh sát mêt uănh công an n’gor Lâm Đồng gŏ ƀư nau ân nhŭp krŭng 2 nŭih geh nau tih ta Ntŭk kan nkân njrăng srê ji n’gor Lâm Đồng gay ma mêt uănh, ƀư kloh nau tih sŏk sa drăp ndơ. 2 nŭih geh nhŭp krŭng 4 khay lah Phạm Thị Hoa ndrel wa Nguyễn Xuân Đạt, dôl hăn kan tâm Ntŭk kan nkân njrăng srê ji n’gor Lâm Đồng. Tâm rnôk ƀư nau kan geh jao tâm rơh geh srê Covid-19 ntơm n’gul năm tât dŭt năm 2021, 2 nŭih aơ geh nau tih ƀư rlăm gay ma ƀư nau kan sŏk sa drăp ndơ đah rnoh prăk nklăp 600 rkeh.

Ngăn lah, lĕ 2 hŏ n’hao rnoh khlay bah ndơ dŏng xét nghiệm. Nkre ma, ƀư nau kan xét nghiệm mẫu gộp yơn lŏ mbơh rnoh săm ƀŭt lah hoá đơn, jêh nê tăch tay sinh phẩm, kit test ndrel ăp ntil ndơ dŏng xét nghiệm rmeh ân Công ty Cổ phần công nghệ Việt Á gay ma sŏk prăk. Rnôk aơ nau kan dôl geh mêt uănh ƀư kloh geh Công an n’gor Lâm Đồng mêt uănh, pơk hvi./.

Nŭih rblang: H’Thi