Lơ 21/7, Công an n’gor Dak Lak hŏ nhŭp kân geh tay 3 nŭih geh bu rgot joi khlay tâm rnôk ƀư rŭng răng tâm nkuăl Cư Kuin. Pe nŭih nê lah Y Khing Liêng (deh năm 1992, gŭ tâm xã Hoà Sơn, nkuăl Krông Bông); Y Huăt Êban (deh năm 1970, gŭ tâm ƀon Mâp, nkuăl têh Ea Pôk, nkuăl Cư M’gar), Nay Dương (deh năm 1968, xã Cư Pơng, nkuăl Krông Buk). Aơ lah 3 nŭih tâm rnoh 6 nŭih geh Công an n’gor Dak Lak mhal ndrel ntrŭnh nau rgot joi khlay ngăn mpeh nau tih “ƀư rŭng răng gay lơh rdâng n’gâng kan ƀon lan” tĭng Điều 113, Bộ luật hình sưk. Ăp nŭih aơ râng ngăn tâm rnôk ƀư rŭng tăng pănh mpruh tâm UBND 2 xã Ea Tiêu ndrel Ea Ktur, nkuăl Cư Kuin lơ 11/6, jêh ri hăn nchuăt du krap. Ôi lơ 21/7, ndơn nau mbơh bah 3 nŭih aơ dôl ma krap nde tâm mĭn ƀon Kniết, xã Ea Ktur, nkuăl Cư Kuin, rmôt kan Công an n’gor Dak Lak hŏ ntơm ƀư nau nchueng ndrel nhŭp kân.

Rnôk aơ, rmôt kan dôl ma ôp nau bah ăp nŭih aơ. Kơt ri, tât rnôk aơ, rmôt kan công an n’gor Dak Lak hŏ nhŭp dĭng lĕ 9 nŭih geh đă rgot nhŭp khlay ngăn tâm nau ƀư rlăng tâm nkuăl Cư Kuin lơ 11/6 hŏ ƀư 9 nŭih khĭt ndrel 2 nŭih rmanh. Tât rnôk aơ, Ntŭk kan công an hŏ mhal 84 nŭih tih, tâm nê geh 75 nŭih tih mpeh nau ƀư rlăng rdâng lơh n’gâng kan ƀon lan, 7 nŭih geh nau tih dôih Mô mbơh phung tih dôih, du hê nŭih geh nau tih mpôn phung tih dôih, du hê geh nau tih mpeh nau ƀư, joi jă nŭih hăn dak ba dih, lăp dak nơm mô lah gŭ tâm Việt Nam tih dôih./.