VOV4.M’nông:   Năm 2021, Dak Lak lĕ nâp nâl rlet rlău du năm đah âk ntul rlong, jêr jŏt n’hanh dơi geh âk săk rnglăy khlay, ƀư jâng nsan an năm 2022 n’hanh ƀư tĭng Nghị quyết Đại hội Đảng bộ n’gor rơh tal 17 năm kan 2020-2025. Hương Lý, nchih nău an Đài TNVN, gŭ nkual Tây Nguyên geh rơh ôp wa Nguyễn Đình Trung, Ủy viên Trung ương Đảng, Bí thư N’gor ủy Dak Lak mpeh ăp săk rnglăy Đảng bộ, n’gâng kan ƀon lan n’hanh nuĭh ƀon lan ăp rnoi mpôl n’gor Dak Lak lĕ dơi geh ndrel nsrôih dăng ƀư tĭng “nău rƀŏng nsum” tâm ăp năm bah năp tay.

          - Ơi wa Nguyễn Đình Trung, Ủy viên Trung ương Đảng, Bí thư N’gor ủy Dak Lak, năm 2021 lĕ lôch, aơ lah năm bôk năp Dak Lak mbơh ƀư Nghị quyết Đại hội Đảng bộ n’gor rơh tal 17 n’hanh trong nchrăp wăng sa-rêh jêng 5 năm (2021-2025). Wa dơi an gĭt du đêt săk rnglăy ntoh lư ma n’gor Dak Lak dơi geh tâm bah năp mêh ?

          - Wa Nguyễn Đình Trung: Năm 2021 tâm nău mâp âk jêr jŏt bah srê Covid-19 n’hanh geh khuch bah du đêt nkô̆ nău êng ta n’gor, N’gor ủy, Ban thường vụ n’gor ủy lĕ rgum ntĭm rđău, ƀĭt joet ăp gưl n’gâng kan ƀon lan n’hanh nuĭh ƀon lan ta n’gor ƀư tĭng uĕh trong kan njrăng n’gang srê n’hanh ăp nău kan hun hao wăng sa rêh jêng, trong kan ndâk njêng Đảng trong kan ndâk njêng trong chính trị đah nuih n’hâm “ndrel mâp âk jêr jŏt ntŭl rlong ri lơ an mât uĕh tâm rnglăp n’hao prêh tâm nău mbơh ƀư ăp nău kan lĕ n’gluh an”. Săk rnglăy trong kan bah năm 2021, n’gor lĕ geh âk săk rnglăy uĕh. Mpeh hun hao wăng sa-rêh jêng ri geh 15/16 rnoh an ƀư lĕ dơi geh n’hanh rlet rlău trong nchrăp n’gluh an. Tâm nĕ, rgŏ jă prăk ntuh kơl lĕ kon nuĭh ƀư tĭng nklăp rlău 42 rbăn 100 rmen prăk, geh 141% nkôp đah trong nchrăp n’gluh an. Dĭng lĕ sŏk an tơm prăk ngih dak geh rlău 8.200 rmen prăk, geh 152% nkôp đah nchrăp jao trung ương an. Rnoh xă tâm di ƀon lan mhe rlău 2 xă nkôp đah trong nchrăp n’gluh an. Tâm hun hao wăng sa bah n’gor, ri hun hao ŭnh nar nkra njêng lah du ntŭk an tâm nkra njêng công nghiệp bah n’gor. N’gor lĕ wăch rgum ntuh kơl geh 28 nău nchrăp ƀư đah dĭng lĕ prăk ntuh kơl dăn ƀư rlău 24 rbăn rmen prăk. Âk nău nchrăp ƀư mhe lĕ an dŏng rgop ntrôl hun hao wăng sa-rêh jêng bah n’gor. Năm 2021, trong kan ndâk njêng đảng, trong kan ndâk njêng trong chính trị dơi uănh mĭn n’hanh ƀư tâm ban n’hanh dơi geh âk săk rnglăy.

Wa Nguyễn Đình Trung, Ủy viên trung ương Đảng, Bí thư N'gor ủy Dak Lak

- Ơ, bah meng ăp săk rnglăy dơi geh mpeh hun hao wăng sa-rêh jêng, trong kan ndâk njêng Đảng, ndâk njêng trong chính trị dơi n’gor Dak Lak ƀa ƀơ uănh mĭn mbơh ƀư. Aơ dơi uănh lah nău kan jêr jŏt, an ƀư du trong uĕh, di. Ndrĭ, ntơm năm tal 2 ƀư tĭng Nghị quyết Đại hội 13 bah Đảng n’hanh Đại hội Đảng bộ n’gor rơh tal 17, nău aơ dơi ntrôl dăng tay m’hâm ƀư mêh wa ?

          - Wa Nguyễn Đình Trung: Nghị quyết bah N’gor ủy năm 2022 lĕ mĭn: “Ntrôl dăng tay trong kan ndâk njêng ntrŭt nkra rgâl Đảng tĭng nuih n’hâm Nghị quyết trung ương 15, khóa 12 n’hanh 13 ndrel đah nău ƀư tĭng ntĭm đă 05 n’hanh n’glôn jêh mrô 1, lơ 18/5/2021 bah Bộ Chính trị đah du đêt nău kan khlay kơt bah kơi aơ:

Bôk năp, ƀư tĭng n’glôn jêh mrô 21, lơ 25/10/2021 bah Ban chấp hành trung ương Đảng mpeh ntrôl dăng ndâk njêng ntrŭt đă nkra tay đảng n’hanh trong chính trị. Nsrôih nking n’gang, ntrôl rŭch, mkra rjăp cán bộ đảng viên roh đah nău mĭn chính trị, nău rêh, geh nău ƀư nkra rgâl êng.

Tal 2, ndâk njêng rmôt đảng viên geh tŏng gĭt blău, nău rêh, nsing nơm tâm ban nău kan. Rgâl mhe dăp n’gâng kan n’hao săk rnglăy nău kan bah trong chính trị hăn ndrel đah n’hŭch biên chế. Dăp rgâl tay cán bộ, công chức, viên chức n’hanh ndâk ƀư ntŭk pah kan.

Tal 3, rgâl mhe trong ƀư, n’hao nău gĭt blău ntĭm rđău soan pah kan bah rmôt kan ntŭk đảng, đảng viên. Tâm nĕ n’hao nău ƀư hăn lor, ntrong leo mât uĕh nău kan bah Đảng viên. Ntrôl dăng trong kan uănh nđôi, groi uănh, rjăp kỷ cương, kỉ luật...

Tal 4, n’hao săk rnglăy trong kan njrăng n’gang saơ rmal sa khâm, nking n’gang ntrôl rŭch sa khâm, mplŭng lĭr. Ntrôl ngăch uănh nđôi, rmal ăp nu nău, tih dôih. Ngăn lah nău tih sa khâm jêr jŏt geh lư tâm kon nuĭh uănh tât.

Nău n’glĕ dŭt lah, mặt trận tổ quốc Việt Nam n’hanh ăp rmôt chính trị xã hội an mĭn êng ƀư groi nđôi râng rgop nău ndâk njêng Đảng, ndâk njêng n’gâng kan, ndâk njêng rmôt cán bộ đảng viên ƀư tĭng lĕ nău kan dơi jao.

- Tâm rnôk chôt srê Covid-19 geh jêr jŏt, gay đăp mpăn njrăng n’gang srê tam nkre hun hao wăng sa-rêh jêng n’hanh dơi geh ăp nău rƀŏng Nghị quyết Đại hội Đảng ăp gưl n’gluh an, rnâng kan n’gor ủy, Ban Thường vụ N’gor ủy Dak Lak lĕ geh âk nău ntrŭnh, ntĭm rđău, ƀĭt joet m’hâm tâm khay tât mêh wa ?

          - Wa Nguyễn Đình Trung: Năm 2022 nchroh mbơh nu nău chôt srê geh jêr jŏt tay. Yor rĭ, Ban thường vụ n’gor ủy lĕ an ntĭm đă mrô 16 mpeh nău ntĭm rđău trong kan njrăng n’gang srê Covid-19 tâm nu nău mhe gay ntĭm rđău lĕ rngôch trong chính trị mbơh ƀư ăp nău kan njrăng n’gang chôt srê. Tâm nĕ mĭn ăp nău kan khlay kơt bah kơi aơ:

          Ngoăy lah mĭn nchrăp tĭng nu nău geh chôt srê gay ngăch geh ntĭm rđău, ƀĭt joet trong ăp nău khlay, tâm di mô an geh tât ndal, mô an âk ir trong dak si lam hvi.

Tal 2 lah n’hao trong kan ntĭm rđău nkoch mbơh, gay n’hao nău wât bah nuĭh ƀon lan tâm trong kan njrăng n’gang srê Covid-19.

Tal 3 lah rgum ntĭm rđău ăp nkuăl ủy, thị ủy, thành ủy n’hanh đảng viên, ăp ngih pah kan ntŭk kan nchrăp trong ƀư đăp mpăn trong kan njrăng n’gang srê. Lơn lah tâm rơh lễ, tết nguyên đán Nhâm Dần.

4, mât uănh ƀư tĭng rjăp Nghị quyết mrô 128 bah Chính phủ n’hanh trong nchrăp bah N’gâng kan dak si kơt Ủy ban n’gor. Tâm nĕ uănh lah di, ngăch ăp gưl rnoh srê gay kơt dŏng ăp trong mkra di đah nu nău geh bah chôt srê. Đăp mpăn nkre ƀư tĭng uĕh trong kan njrăng n’gang srê nkre rhŏ hun hao wăng sa rêh jêng bah n’gor./.

- Dăn lah uĕh wa !

                              Nuĭh rblang: Y Sưng Phê Ja