Jêh 5 năm tâm rgop njrăng, n’gang n’hanh n’hŭch trôk nar tâm nău kan ntĭm nti, ăp ntŭk rmôt kan âk rơh tâm rlong, jrô tiăr nti, nău ƀư bah dih, rƀŏng tât n’hao nău wât n’hanh nău blău njrăng n’gang trôk nar. Âk nău ƀư nkoch mbơh mpeh njrăng, n’gang n’hŭch đêt trôk nar geh nkô̆ nău lĕ dơi ƀư, kơt: rơh tâm rlong “Kơl play neh-Kon se mĭn rklă nuĭh dŭt janh dăng ntrôl rŭch trôk nar n’hanh rgâl trôk nar”, “Mĭn rklă nău jă nău mhe an nău mpât mprơ n’hanh nhạc cổ truyền mpeh njrăng n’gang trôk nar”, vẽ rup bah dih trôk đah bôk nău “Ndrel oh njrăng, n’gang trôk nar-Mĭn nkra tâm rgŏ năp nâp nâl”, Tiăr nti rdâng n’gơ neh ta ngih sam ƀŭt tiểu học Măng Đen, nkuăl Kon Plông, n’gor Kon Tum...

Bah meng săk rnglăy dơi geh, bôk nău kan tâm rgop njrăng n’gang trôk nar đah N’gâng kan ntĭm nti n’hanh N’gâng kan tuch tăm mât rong n’hanh hun hao ƀon lan hôm e geh ta du đêt nău mô hŏ dơi ƀư kơt: geh rnôk tâm rgop mô hŏ ngăch; ăp nău ƀư bah dih mpeh njrăng n’gang trôk nar mô hŏ tŏng tâm ban đah ăp ntŭk; nău ntĭm nti, tiăr nti an rmôt nai ăp ngih sam ƀŭt mpeh ƀư nău kan bah dih mpeh njrăng, n’gang trôk nar mô hŏ dơi uănh tât, ntrôl dăng.

Tĭng wa Nguyễn Văn Tiến, Groi Cục trưởng Cục mât uănh đê điều n’hanh Njrăng, n’gang trôk nar, N’gâng kan Tuch tăm mât rong n’hanh hun hao ƀon lan, Việt Nam dâk tal 5 tâm ăp dak geh khuch hô bah rgâl trôk nar. Ăp năm dăch aơ, phŭt dak lip na nao geh đah dŭt âk lơn, đê̆ đŏng hôm ntoh “dak lip rdâng dak lip”, “phŭt rdâng phŭt” ƀư âk nău khuch hô ƀư khuch dŭt têh đah nuĭh n’hanh drăp ndơ. Yor nê, rƀŭn nchră gay uănh lah tay ăp nău di, hôm e, nău rhoăt tay n’hanh dăn đă ăp trong mkra na nê̆ gay n’hao tay săk rnglăy trong kan njrăng n’gang trôk nar tâm nău kan ntĭm nti ta ăp gưl tâm lvang bah năp tay. Wa Nguyễn Văn Tiến lah:

“Bah ăp nai, ăp ngih sam ƀŭt n’hanh ăp đại biểu saơ trong kan rgop njrăng n’gang trôk nar tâm ăp môn nti đah ăp mon lah dŭt săk rnglăy. Yor nê năm tât, mpôl hên mbra đă kruanh 2 n’gâng kan ƀư tĭng tay bôk nău kan aơ. Yor nê kơt nĕ he mbra ƀư uĕh năp dâl an ăp mon geh nău blău mpeh rdâng đah trôk nar, wât mpeh trôk nar, tal 2 tay lah ndâk njêng tay du nău rêh jêng đăp mpăn bah năp trôk nar let bah kơi tay”.

Ntơm lăp năm nti mhe, ăp ntŭk an ntrôl dăng, pơk hvi ntrong kan nău ƀư mbơh rblang nău wât njrăng n’gang trôk nar tâm ngih sam ƀŭt. Lơn lah mbơh ƀư ndơ̆ tâm nău ƀư bah dih, nău ƀư khay rlu nti đah nkô̆ nău ntĭm nău blău njrăng n’gang trôk nar đah âk trong ƀư an rêng lam hvi n’hanh nchrăp njrăng n’gang trôk nar tât me bŏ n’hanh nău rêh jêng kon nuĭh”.

Bah năp nĕ, Cục mât uănh đê điều n’hanh Njrăng n’gang trôk nar tâm rgop đah Vụ Cơ sở vật chất (N’gang kan ntĭm nti) ƀư rgum nchră bôk nău mpeh tâm di nău wât njrăng n’gang trôk nar tâm bôk nău ăp môn nti, nău ƀư ntĭm nti ăp ngih sam ƀŭt THCS bah 5 n’gor Tây Nguyên. Săk rnglăy an saơ lĕ lôch uĕh đah âk nău râng tâm nchră, nău rgop ntoh ngơi dŭt n’hâm bah ăp kruanh ngih sam ƀŭt n’hanh nai. Di rơh aơ, ntoh măt Cục mât uănh đề điều n’hanh njrăng n’gang trôk nar, wa Nguyễn Văn Tiến ndrel kruanh du đêt ntŭk kan ndrel n’gâng kan ntĭm nti, N’gâng kan tuch tăm mât rong hun hao ƀon lan n’gor Dak Lak n’hanh ntoh măt công ty Acecook ta Việt Nam lĕ tât chop khâl, ntrŭt nsôr n’hanh an ndơ 2 rnăk nai geh nău rêh jêr jŏt ta n’gor Dak Lak (rnăk nô Nguyễn Thái Dương n’hanh rnăk yuh Đỗ Thị Huyền).

Ta Việt Nam, tâm 30 năm dăch aơ, rĭng du năm trôk nar ƀư khuch nklăp 300 nuĭh khĭt n’hanh roh, khuch khat wăng sa bah 1-1,5% GDP. Kon se, kon hŏk geh 28% rnoh nuĭh Việt Nam lah ngoăy tâm âk nuĭh geh khuch hô ngăn yor trôk nar lơh.

Bah meng ăp sam ƀŭt luật, trong ƀư nău ntrŭnh nkô̆ nău mpeh trong kan njrăng n’gang trôk nar an kon se, kon hŏk, Thủ tướng Chính phủ lĕ an bôk nău rgop an tâm nchră “N’hao nău wât ntŭk gŭ rêh n’hanh Mât uănh nău mâp trôk nar nsing tâm nsum mpôl, tât năm 2020” tâm nĕ, jao nău kan an n’gâng kan ntĭm nti tâm rgop đah N’gâng kan tuch tăm mât rong n’hanh Hun hao ƀon lan ƀư ntĭm nti tiăr nti an nai, giảng viên, rgop nkô̆ nău njrăng n’gang trôk nar tâm bôk nău ntĭm; ntop an tâm di “Ngih sam ƀŭt đăp mpăn bah năp trôk nar”; tŏng ăp đăp mpăn an kon hŏk, ntŭk ntô ngih wâl ntĭm nti rnôk geh trôk nar lơh.