Tâm nău nchih ntĭnh bah Kruanh Hồ Chí Minh mbơh năm 1969, Wa “an tay dŭt ân nău dêh rŏng an lam ƀon lan, lam Đảng, lam tahen, an ăp mon său druh ndăm n’hanh kon se jê̆”. Wa ntĭnh ntăn “Ƀon lan he dŭt han săk dăng janh, gơih nđơr đăp dêh”. “Đảng ân geh trong nchrăp dŭt uĕh gay hun hao wăng sa n’hanh vǎn hóa, gay mô rlu n’hao nău rêh bah ƀon lan”. Nchih nkah nău ntĭm nti bah Kruanh Hồ Chí Minh, ndrel đah nuĭh ƀon  lan lam dak, kônh wa ăp rnoi nuĭh Tây Nguyên hŏ mô rlu  tâm  rnglăp, nsrôih pah kan jan sa, rdâk njêng ƀon tơm nar lơn ma ndrŏng uĕh, an nău rêh hơm răm đăp mpăn.

Ntŭk nkual n’har bri xã Đăk Nhoong, nkuâl Đăk Glei, n’gor Kon Tum, wa A Cu, rnoi Giẻ-triêng, Bí thư chi bộ nkre ƀư kruanh thôn Đăk Ga, nkoch, kônh wa way ntop kơl nsum hun hao wăng sa n’hanh nsrôih râng ndrel  ăp mpôl mât njrăng bri. Nău kơt nti n’hanh ƀư tĭng nuih n’hâm Wa Hồ dŭt dăch dêh, ngăn ngăn đah ăp đảng viên ta aơ:

“Ăp nar he kơt nti n’hanh ƀư tĭng nuih n’hâm bah Wa lah kơt nti ăp nău kan uĕh, nău di. Nti kơt Wa mpêt nkrem dŏng sa ăp nar. Hôm kơt nti mbơh ngơi, gŭ dâk sông sa đŏng, rgŏ jă kônh wa wăng sa hun hao rnăk wâl nsan hao klaih rlău ach o jŏ jong”.

Đảng viên dâk leo lor n’hanh ƀư jăp gay kônh wa ƀon lan kơt tĭng ƀư, nê lah nău ma wa A Thiếu, rnoi Jarai, ta ƀon Lung, xã Ya Xiêr, nkuâl Sa Thầy, n’gor Kon Tum, tĭng ƀư rgâl uĕh jêng mir, hun hao wăng sa rnăk wâl:

“Lah he tăm ntlơi lêng kơt nê ri tơm mô hao jêng, bu nduih tă bah ngih dak kơl an ntil mô uĕh jêng, kơt nê lah mô di yor nê lah tă bah he nơm dơm. Lah he mât chăm uĕh tơm  ân hao jêng uĕh. Rnăk kuĭh ntu tăm tơm, ntuh kơl rvăt máy bơm n’hanh khoan ntu, ntrŭp dĭng dak tŏ. Rnăk gâp nsrôih tăm tơm rêh uĕh gay nsĭt geh hun hao wăng sa, n’hanh an ƀon  lan ndrel ƀư gay klaih rlău ach o jŏ jong”.    

  3 năm aơ, tâm nkual  rnoi mpôl đê̆ ta n’gor Kon Tum hŏ njêng rlău 800 trong leo tâm kơl nsum hun hao wăng sa, rgâl uĕh jêng mir, jut jăng nău rluk mâl way ơm… Ăp trong leo ƀư dja hŏ kơl rlău 10.000 tơ̆ rnăk ach o n’hanh dăch kêng ach o geh ndơ ma nsan hao. Lah ngoăy tâm ăp nuĭh ntoh lư dơi nkhôm rnê ta Tâm nchră mpeh ntrôl dăng kơt nti n’hanh ƀư tĭng nău mĭn, nuih n’hâm, trong gŭ rêh Hồ Chí Minh tă bah Tỉnh uỷ Kon Tum ƀư khay 5 mhe aơ, wa A Huế, rnoi Xơ-Đăng, Kruanh thôn Kon Nhên, xã Đăk Ruồng, nkuâl Kon Rẫy, an gĭt:

        “Kơt nti n’hanh ƀư tĭng nuih n’hâm uĕh long, trong gŭ rêh Hồ Chí Minh, mpôl hên hŏ rgŏ jă kônh wa rdâk njêng geh nău dơi ƀon lan mhe. Gâp rgŏ jă na nê̆ kônh wa kơl nar luh kan, njêng uĕh măt uănh nkual jay rot, ndrel nkra tay gung trong. Tăm si bah meng trong me tâm ban kơt ăp trong lăp tâm thôn. Uănh năl nău ngăn geh ri aƀaơ nuĭh ƀon lan mô hôm rluk mâl kơt kăl e nơh đŏng ôh”.

          Tâm ban kơt ta n’gor Kon Tum đŏng, kônh wa ăp rnoi nuĭh n’gor Lâm Đồng dôl ndơ̆ rgâl tơm tăm, dŏng mhe khoa học kỹ thuật tâm nău kan tuch tăm gay wăng sa nar lơn ma hun hao. Wa Kon Sơ Ha Vương, rnoi K’Ho, Kruanh UBMTTQ xã Đạ Nhim, nkuâl Lạc Dương, an gĭt, rgâl bah hôm ma tăm êng du ntil tơm cà phê, nuĭh ƀon lan hŏ tăm âk ntil tơm, tĭng kơn tuch tăm tĭng nău nchăm rvăt, n’hanh nsum suan du nuih n’hâm rdâk njêng xã ƀon lan mhe ntop n’hao tay.

“Đah trong rƀŏng ngih dak n’hanh ƀon lan ndrel ƀư, âk ntung trong hŏ dơi ntuh kơl nâp uĕh. Ndrel đah wăng sa đăp mpăn, nău rêh drăp ndơ n’hanh nuih n’hâm bah nuĭh ƀon lan hŏ dơi n’hao dŭt âk”.

Tăm âk ntil tơm hăn tât geh âk ndơ tuch tăm tăch đŏng, nuĭh Rđe ta n’gor Dak Lak dôl nsan hao ƀư geh ndrŏng. Wa Y Mi Êban, ta buôn Ea K’mat, xã Hoà Đông, nkuâl Krông Pắc nkoch mpeh nău tăm rlŭ sầu riêng, tiêu tâm mir cà phê 1,4 ha.

“Đah nău ƀư lah đảng viên he ân dâk lor bôk năp n’hanh leo lor gay kônh wa kơt tĭng ƀư, way nsrôih ôp joi hun hao wăng sa rnăk wâl. Rnôk tăm rlŭ sầu riêng, mô geh âk tơm  prăk ơm jêng ân manh ngân hàng n’hanh kơt nti tay kỹ thuật gay tăm. Năm aơ hên klêh geh nklăp 15 tấn sầu riêng, ndrel đah nsĭt geh bah tơm cà phê n’hanh tiêu dŭt đăp mpăn đŏng.”

Ta n’gor Gia Lai, kônh wa ăp rnoi mpôl đê̆ dôl kơt nti ăp trong ƀư mhe an nău rêh nar lơn ma hơm răm đŏng. Bu ranh ƀon Hmrick, rnoi Jarai, ta ƀon Ia Nueng, xã Biển Hồ, Nkual ƀon têh Pleiku, an gĭt, đah nău ntuh kơl bah ngih dak, kônh wa dôl rdâk tay nău kan way ơm kơt trah rup si, tanh tôk, cheh tanh bok brai; nti n’gon trău srăch uĕh n’hanh ƀư pâl nđaih nsum mpôl ƀon lan:

“Aƀaơ nău rêh bah kônh wa hŏ rgâl geh, tâm ƀon gung trong rsong hăn dơh soih,  mô hôm geh nuĭh ji ngot đŏng ôh. Đah nău ƀư lah bu ranh ƀon, gâp way nkoch trêng an kônh wa gĭt wât kloh trong nchrăp, trong kơl bah Đảng, Ngih dak, gay kônh wa nsing nâp tâm gung trong bah Đảng, Ngih dak. Rdâk njêng ƀon văn hóa pâl nđaih nsum mpôl lah trong kan di gay rgâl nău rêh nuĭh ƀon lan, mbra dơi hơm răm, đăp mpăn”.

Ndrel đah kônh wa ăp rnoi mpôl đê̆ ta Tây Nguyên, nuĭh Bu Nong ta n’gor Dak Nông dôl nsum suan du nuih n’hâm tâm rlong hun hao wăng sa n’hanh rdâk njêng ƀon lan   mhe. Wa K’Sung, Kruanh ƀon Ting Wel Đơm, xã Đắk Nia, nkual ƀon têh Gia Nghĩa, rhơn nđơr: nơm geh Đảng, geh Wa Hồ, kônh wa ƀon lan hŏ geh nău rêh hơm răm.

“Tâm ăp rơh tâm lơh, đah ƀon  lan rnoi mpôl đê̆ ƀon tơm  ta  aơ  way nsing nơm tâm Đảng. An tât nar aơ, kônh wa nha  hôm nsing nơm  tâm gung trong bah Đảng, pháp luật bah Ngih dak đŏng, way tâm rnglăp gay mât ndray đăp mpăn aƀaơ n’hanh way tâm rnglăp gay rdâk njêng wăng sa nar lơn ma nsan hao, nău rêh nar lơn ma dơi n’hao prêh, hun hao gay ƀon lan geh ndrŏng, neh dak têh dăng.”

Kruanh Hồ Chí Minh hŏ tĭng drô phan hŏ 55 năm aơ, yơn nuih  n’hâm rŏng nuĭh bah Wa nha hôm mbro đah ƀon lan Việt Nam. Lam Đảng, lam ƀon lan he du nuĭh n’hâm “tâm rnglăp nsrôih, rdâk njêng du dak Việt Nam đăp mpăn, dơn ngoăy, bah tâm lơh tâm su, geh nău tâm ban n’hanh têh ndrŏng” kơt nău ŭch rŏng n’glĕ dŭt bah Kruanh Hồ Chí Minh./.