Năm 2022 bol mpôl kan dơi kan n'gor Kon Tum hŏ nsrôih nking nchăng, yơn nău lơh n'hang bri, lơh si mô geh nău way hôm geh tay đŏng. Aơ hôm lah nkô̆ nău duh hô dơi âk cử tri uănh khlay n'hanh đại biểu ôp rkhêl ta Rơh hop tâl 4, HĐND n'gor Kon Tum khóa XII.

Tâm 11 khay bah năm 2022, mpôl kan dơi kan n'gor Kon Tum hŏ ban saơ 83 tơ̆ nău tih Luật Lâm nghiệp, sŏk mplơ̆ 419m3 si ăp ntil, neh bri geh roh huach rlău 32ha. Ta rơh ôp rkhêl HĐND n'gor Kon Tum, âk đại biểu lah rjăp hŏ geh nău mƀơk lhoi mât njrăng, mô jăp dơn kan n'hanh mô  dơn nê hôm geh kơl an mpôl ntŭng lơh si đŏng. Ơh bah năp HĐND n'gor, kruanh UBND n'gor Kon Tum lah rjăp an geh ăp nău tih Luật Lâm nghiệp tă bah mât bôk kan bah gưl ủy, n'gâng kan du đêt ntŭk mô hŏ uănh khlay di rnoh; Nău dơn kan bah du đêt cán bộ pah kan mât njrăng bri mô hŏ âk; hôm nău mƀơk lhoi mât kan, kơl an mpôl tih djơh lơh ntŭng si, rdeng si mô geh nău way. Ủy ban nhân dân n'gor mbra rđău đă tay ăp n'gâng kan n'hanh ăp nkuâl n'hanh ăp xã gay mât njrăng bri. N'hao dăng nău dơn kan bah nuĭh tơm bri n'hanh mpôl kiểm lâm. N'hao dăng lơn đŏng pah kan hăn rsong uănh, mât uănh mha êng lah ăp khay muĭh mir.  

VOV Tây Nguyên/Nuĭh rblang: Điểu Thân