Nar nđaơ (15/8), ta nkual ƀon têh Buôn Ma Thuột, mpôl pah kan bah Hội đồng pâl nđaih n’hanh Rƀŭn nchră nkual ƀon têh Goyang (n’gor Gyeonggi, Hàn Quốc) tât khâl n’hanh pah kan đah n’gor Dak Lak.

Ta nar pah kan, 2 ding lĕ tâm rgâl mpeh nu nău hun hao wăng sa, rêh jêng n’hanh văn hóa pâl nđaih ta ăp ntŭk. Kruanh n’gor Dak Lak mbơh: Dak Lak lah n’gor nklang nkual Tây Nguyên, đah 49 rnoi nuĭh gŭ rêh ndrel, âk nău uĕh văn hóa. Geh rnoh neh cà phê têh, rnoh ndơ geh nklăp 400 rbăn tấn du năm. Cà phê Buôn Ma Thuột lah ndơ moh ntoh lư, lĕ dơi mât njrăng ntĭm ntŭk tăch. Năm bah năp n’gor lĕ geh âk nău ƀư kan ndrel đah Hàn Quốc, tâm nĕ nău ký sam ƀŭt kơp dơn kan ndrel ăp ding đah n’gor Dak Lak đah n’gor Jeollabuk nsĭt tây âk săk rnglăy ngăn ngên ta ăp ntil.

Ntoh măt mpôl pah kan an gĭt, Goyang lah nkual ƀon têh ta n’gor Gyeonggy, ta mpeh bah lơ nhâp nar bah dak Hàn Quốc, tă thủ đô Seoul nlkăp 18 km. Ntŭk aơ dôl dơi ndâk ƀư jêng nkual têh vệ tinh bah thủ đô Seoul, dơi uănh lah nkual ƀon têh rbăn nkao, ntoh lư đah Lễ hội nkao way dơi ƀư tâm khay 4 tât khay 5 ăp năm.

Jêh tâm nchră n’hanh mĭn joi, 2 n’gor mpŏng kan ndrel tâm 3 ntil nău lah: pâl nđaih, văn hóa n’hanh tăch rgâl. Wa Oh Jun Hwan, Giám đốc Hội chợ nkao nkual ƀon têh Goyang, an lah, mbra dŭt uĕh dơi kan ndrel ƀư lễ hội nkao tâm rgop đah lễ hội cà phê, mpla nsơ ndơ cà phê Dak Lak ta ntŭk tăch Hàn Quốc:

“Đah Goyang lah ntŭk geh âk quán cà phê ngăn, hôm Dak Lak lah ntŭk nkra njêng geh cà phê dŭt âk. Rnôk ma 2 ding dơi joi saơ nău ndrel mô lah ăp ndơ geh tât cà phê gay hun hao rĭ dŭt uĕh. Mpôl hên mpŏng dơi kan ndrel ta âk ntil nău, knŭng ŭch mpeh Dak Lak dơi nkoch ăp nău ŭch mô lah ăp nău dơi kan ndrel gay ntrŭt ntrôl têh dăng an 2 ding dơi kan ndrel ngăch ngăn”.