Xã Nâm Nung, nkuâl Krông Nô, n'gor Dak Nông lah nkual gŭ nde cách mạng tâm rơh tâm lơh mprơh Prăng n'hanh lơh Mỹ kơl neh dak. Mât uĕh nău way ơm dăng janh, Đảng bộ, n'gâng kan n'hanh nuĭh ƀon lan xã Nâm Nung  way nsrôih rlău jêr jŏt, nsan hao dăng, rdâk njêng ƀon tơm nar lơn ma hun hao. Lam xã aƀaơ geh rlău 1.900 rnăk, đah nklăp 8 rbăn nuĭh, (tâm nê geh nklăp 2 rbăn nuĭh Bu Nong). Dơi geh nău uănh ntuh kơl bah Đảng n'hanh Ngih dak, nău rêh bah kônh wa mô rlu dơi n'hao prêh, năm aơ rĭng geh tĭng bôk nuĭh ta rnoh 40 rkeh prăk. Wa Y Sram ta  bon R’Cập, xã Nâm Nung năl.

“Dŭt lah uĕh Đảng, ngih dak hŏ nta trong dơh an kônh wa nuĭh Bu Nong lah êng n'hanh nuĭh ƀon lan lah nsum. Aƀaơ trong rse điện, nhih nti, nhih dak si hŏ ăp tŏng. Lĕ rngôch oh kon he tât nhih nti da dê, ăp rnăk oh kon tât năm hăn nti ăp tŏng. Ntơm nơh mô geh nhih nti jrô nti hôm jêr jŏt ngăn, lơn lah rơh tâm lơh tâm su, aơ lah nkual gŭ nde cách mạng, nuĭh ƀon lan gŭ krit jêr. Yơn aƀaơ ri hŏ rgâl âk hôm, nău rêh bah kônh wa hun hao lơn mô hôm kơt ntơm nơh đŏng ôh".

N’gor Dak Lak rnôk aơ geh 4 ntil chroh lah Công giáo, Tin lành, Phật giáo ndrel chroh Cao đài, đah rlau 600 rbăn nŭih tĭng, geh 32% rnoh nŭih. Tâm ăp năm rlau aơ, đah nau rđau kan bah Đảng, kônh wa tĭng chroh nsôih hun hao văng sa, ndâk njêng ƀon lan, rêh ueh, chroh ueh. Kruanh chroh Y Ky Êban, mât rđau rmôt Tin lành Ea Tul, xã Ea Tul, nkuăl Cư M’gar, Dak Lak nkoch: Nau rnơm bah kônh wa têh ngăn, hăn tâm di trong chroh, rnơm tâm nau rđau kan bah Đảng. Đại hội lam dak tal 13 bah Đảng geh nau dơi ueh tâm năm rlau aơ lah nau ueh ngăn, ntoh nau rnơm ndrel nau mpŏng bah ăp nŭih tât ăp nau ntrŭnh tâm di, leo neh dak nơm hun hao ăp ntil. Kŏ tĭng kruanh chroh Y Ky Êban, tâm nau rdâng srê Covid-19, nau rđau kan bah Đảng hôm ntoh tât nau nsôih gay ma geh chuh vắc xin ân lam ƀon lan:

“Tâm năm rlau aơ ri Đảng ndrel Ngih dak nơm kơl an, pơk trong nơih ân kônh wa geh chuh vắc xin rklaih dơi bah srê Covid-19. Mpŏng ŭch tâm năm mhe mra mô hôm geh srê, nau ji ngot ndrel ăp nau kan mô ueh tât, ăp nŭih ƀon lan ndrel du nuih n’hâm hun hao văng sa, n’hao lơn tay nau tâm rnglăp lam rnoi mpôl Việt Nam kơt lah oh nô tâm du rnăk vâl”.

Đảng viên Lơ Mu Ha Dzô, ta thôn 6, xã Đạ Sar, nkuâl Lạc Dương, n'gor Lâm Đồng lah rjăp, nơm geh mât uănh rđău đă bah Đảng, n'gâng kan ta ntŭk, nuh srê ngăch dơi mât kân, neh dak rgâl jêng kơt ơm mhe, njêng nău nsing nơm tâm ƀon lan:

“Đảng n'hanh Ngih dak mât uănh tât nuĭh ƀon lan dŭt âk, ntuh kơl ăp ntil tâm nău rêh bah nuĭh ƀon lan hŏ dơi n'hao geh rđĭl đah ntơm nơh. Rnôk nuh srê Covid-19 ntoh luh, ăp gưl n'gâng kan hŏ ngăch nkoch trêng n'hanh ntĭm nti nuĭh ƀon lan n'hao nău gĭt êng, nsrôih tĭng ƀư ăp trong nkra njrăng n'gang nuh srê Covid-19 n'hanh nsĭt tay nău dơi geh uĕh. Aƀaơ ƀon lan hôm mât dơi nkual đăp mpăn, nău rêh wăng sa bah nuĭh ƀon lan ri đăp mpăn n'hanh hun hao yor cà phê geh rnoh khlay. Năm mhe geh tay âk nău rhơn, mƀak đŏng”.

Wa Ksor Jar, Groi Bí thư Chi bộ ƀon Châm Prông, xã Ia Băng, nkuăl Đăk Đoa, n’gor Gia Lai lah rjăp: Năm 2021 mhe rlau, srê Covid-19 hŏ ƀư rgâl ăp ntil bah nau rêh. Đah nau kan leo trong lor bah nŭih đảng viên, wa Ksor Jar vay nkoch trêng ân kônh wa gĭt ndrel rnơm tâm nau ntrŭnh kan njrăng rdâng srê bah Đảng ndrel Ngigh dak tĭng ăp rơh:

‘Năm 2021 mhe rlau, Đảng ndrel Ngih dak nơm nsôih rđau ân ngăn nau kan nchueng rdâng bah srê. Tât khay 9/2021, ƀon lan phung hên geh chuh 2 nglai vắc xin, Đảng ndrel Ngih dak lŏ ntrơn jêng nau kan rêh nsum, tâm rdâng ân ueh, ngăch, nkân njrăng ân săk tam đah srê. Nau aơ kơl an phung hên nkre geh mât đăp mpăn lơn, lŏ dơi geh nau hun hao văng sa. Rnôk aơ, lah đảng viên, gâp vay bonh đă ƀon lan kơt tĭng nau ntrŭnh 5K ndrle rnơm tâm nau rđau kan bah Đảng ndrel Ngih dak”.

Tâm trong leo rdâk njêng ƀon lan mhe, nău mĭn Đảng nuih n'hâm ƀon lan lơn ma mpơl kloh. Nuĭh ƀon lan mbra rong neh, râng luh kan ƀư trong, ƀư nhih nti, ndơ dŏng khlay bah ƀon lan. Nê mô dơn lah nău nsrôih, nău mĭn rôih sŏng mpơl nău nsing nơm đah Đảng, n'gâng kan ta ntŭk. Wa Điểu Khuyên – Kruanh ƀon Bu Bir, xã Quảng Tín, nkuâl Dak Rlấp, n'gor Dak Nông nkoch nău rhơn mpeh rdâk njêng ƀon lan mhe:

“Ntơm bah rnôk geh trong, kônh wa dăn lah uĕh Đảng, n'gâng kan hŏ nta trong dơh rdâk njêng gung trong rsong hăn dơh soih. Ntơm bah nê, nău rsong hăn tâm ƀon n'hanh rdeng phân poh, ndơ tuch tăm bah kônh wa sĭt bah mir ba dơh soih đŏng. Nê lah nơm geh bôk nău kan 135 ƀư 400 mét trong n'hanh ƀon lan rgop tay ƀư lĕ rngôch gâl trong ƀon bơi 1km; geh 20 rnăk ndrel râng n'hanh ngih dak. Trong dja geh nău rgop bah ăp rnăk ƀon lan rong neh, sreh tơm điều, tơm cà phê gay ƀư trong mhe dơh soih rsong hăn, kônh wa gĭt nău geh trong hăn gay hun hao wăng sa đŏng”.

Tâm Kon Tum, ăp năm rlau aơ geh âk ngăn nŭih ndrŏng lah nŭih rnoi mpôl đê̆ tăm dak si khlay. A Chung tâm ƀon Đăk Dơn, xã Măng Ri, nkuăl Tu Mơ Rông, n’gor Kon Tum lah du ntoh mhô. Đah nklăp 5000 tơm sâm Ngọc Linh, tăch geh ntơm 120-260 rkeh prăk du kg bum rih n’ăp ma n’ha rnôk aơ, wa A Chung hŏ jêng nŭih ndrŏng rnơm tâm nau tăm Ngọc Linh. Wa mbơh, mô êng rnăk păng geh dnơ sa, ndơ nsoh ma rlau 100 rnăk ƀon lan tâm ƀon Đăk Dơn kŏ geh nau rêh ndrŏng đŏng. Rêh tâm nkuăl căn cứ cách mạng, geh nau rêh hơm răm, đăp mpăn, tâm nau rhơn năm mhe wa A Chung rhơn ngăn, Đảng hŏ leo tât ân ƀon lan năm mhe hơm tăm:

‘Rnơm Đảng, Ngih dak kơl an tât ƀon lan ri ma ăp ƀon lan ta aơ geh tăm tơm sâm Ngọc Linh gay ma hun hao văng sa. Đảng, Ngih dak hôm kơl an ân kônh wa mpeh điện mpoh ang, trong hăn, âk rnăk hôm geh snôih gay ma jêng têh ndrŏng đŏng, âk nŭih geh điện thoại mhe, ngih geh mạng wifi gay ma geh djăt uănh ăp nau nkoch mhe bah tâm dak dnrel dak ba dih. Kônh wa ƀon Đăk Dơn nsôih rnơm tâm nau rđau kan bah Đảng, Năm mhe, n’gâng kan kơl an ân ăp rnăk ach o, rnăk jêr jŏt bah xã Măng Ri aơ”.

Lah du hê đảng viên mom, nô Đinh Văn Phới, cán bộ Phòng Dân tộc, nkuâl Đak Pơ, n'gor Gia Lai saơ dŭt rhơn n'hao êng săk rnôk dâk ta nâm cờ Đảng n'hanh răk nău ton 4 năm bah năp nơh. Nkre, wa Đinh Văn Phới saơ săk he ân geh nău dơn kan rgop suan mom râng âk lơn ăp nău kan đăp mpăn lam rêh jêng kon nuĭh, hăn kơl êng tât nkual jru, nkual ngai. Nơm geh trong kan bah Đảng n'hanh Ngih dak, nău rêh bah nuĭh ƀon lan, kônh wa ta ăp ƀon lan nar lơn ma hơm răm, wăng sa geh hao, rgop tâm nău hun hao bah lam rêh jêng kon nuĭh. Đảng viên Đinh Văn phới nkoch:

“Kônh wa hên ta aơ tĭng ƀư trong nchrăp gung trong bah Đảng n'hanh Ngih dak, nsrôih wăng sa hun hao rnăk wâl. Lah du hê Đảng viên mom, tâm bah ri aơ nơh gâp hŏ, dôl n'hanh nsrôih nkoch trêng rgŏ jă kônh wa tĭng ƀư jăp trong nchrăp gung trong bah Đảng, pháp luật bah Ngih dak, rgŏ jă kônh wa tĭng ƀư jăp trong njrăng n'gang nuh srê Covid-19 n'hanh kônh wa hŏ tĭng ƀư dŭt jăp".

Hăn rlet ăp nau jêr bah năm 2021 yor srê Covid-19 lơh, nô Myet, ƀon Tiêng, xã Tân Sơn, nkuăl ƀon têh Pleiku, n’gor Gia Lai nchrăp tât tâm rơh mhe gay ma ƀư ân ueh, rdâng ân tam đah srê nkre njrăng, rdâng nkre hun hao văng sa. Nô Myet lah rjăp, tâm năm mhe 2022, nô ndrel nŭih ƀon lan tâm ƀon mra nsôih kơt tĭng nau ntĭm đă bah n’gâng kan dak si, gay đăp mpăn n’hâm soan ndrel hun hao văng sa rnăk vâl:

‘Phung hên mro ŭch rnăk vâl hên hun hao lơn tay gay ma leo nsĭt nau rhơn ueh lơn tâm nau rêh. Năm 2021 geh srê Covid-19 ri ma hŏ ƀư ân ƀon lan klach rvê ngăn, mâp âk nau jêr ngăn. Ŭch ntơm jêh aơ tât ba kơi nơm ân geh rgâl nsôih mhe lơn. Phung nơm ân nsôih pah kan, Ndrel ƀư nsum tĭng nau rđau đă bah n’gâng kan ba lơ, gay nsrel rêh ân ueh lăng lơn. Ŭch tâm năm mhe kônh wa pah kan jan sa ân ueh, văng sa hun hao, blau nau mât ân săk jăn, gay năm mhe aơ srê ji rlet rlau, ƀon lan plơ̆ tay nau rêh ueh lăng nâm ơm”.

Ta ƀon Jut 2, xã Ia Dêr, nkuâl Ia Grai đah rlău 165 rnăk Jarai, lôch ăp jêr jŏt bah năm 2021 tă bah nuh srê, nuĭh ƀon lan dôl mĭn uănh trong nchrăp kan mhe. Nô Rơ Châm Ngưu, nuĭh ƀon lan ta ƀon Jut an gĭt, tâm năm 2021, nuh srê Covid-19 ƀư âk nuĭh ƀon lan hăn kan ta ăp n'gor, nkual ƀon têh ngai plơ̆ sĭt der nuh srê, nău rêh bah ăp nuĭh geh tât khuch. Nô Ngưu ŭch mpŏng năm 2022, nuh srê dơi mât kân bah gay ƀư jêng n'hanh nău rêh nuĭh  ƀon lan tâm ƀon plơ̆ tay kơt ơm:

Mpŏng tâm năm 2022 tât tĭng nău ntrŭnh mhe rêh nsum đah nuh srê, kônh wa he ân geh trong nchrăp tâm nău kan  ƀư njêng, rdâk trong kan hợp tác xã, tâm rgop kan nsum ndrel du rêng ƀư, dâng sre têh hvi, tâm rgop kan đah ăp doanh nghiệp, hợp tác xã ton rvăt ndơ geh ƀư, đăp mpăn trong tăch luh, rdâk njêng săk ntơ lư, an luh ndơ geh ƀư kloh uĕh, rêng ƀư OCOP, n'hanh ndơ̆ ndơ geh ƀư kalơ ntŭk ndranh tăch điện tử ntơm bah nê n'hao rnoh khlay ndơ geh ƀư tuch tăm Việt Nam. Ndrel đah nê mbra geh tay âk rnoh manh tơm prăk thuk dơh an kônh wa gay ntuh kơl ƀư njêng. Tâm năm tât mpŏng Đảng, Ngih dak mbra geh ăp trong ntop kơl nău rêh, nău kan n'hanh kơt nti tâm rơh gŭ rêh nsum tay đah nuh srê yơn kônh wa ân nsrôih kơt nti, pah kan jan sa gay rgop hun hao wăng sa rêh jêng kon nuĭh".

Buôn Ebung, xã Ea Tiêu, nkuăl Cư Kuin, n’gor Dak Lak geh 250 rnăk ƀon lan, tâm nê geh 995 lah rnăk rnoi rde, 90% nŭih tĭng chroh tin lành. Nau rêh ndrle nau gĭt rbăng bah ƀon lan nar lơn geh nau rgâl mhe ngăn rnôk ma ăp đảng viên tâm ƀon Êbing tâm dăch, tâm kơl, tâm dăch ma ƀon lan. Bah ăp nau rƀŭn rgum, ăp nau ntrŭnh, ntrong kan, nau kơl an bah Đảng, Ngih dak geh Đảng viên tâm chi bôk leo tât ma ƀon lan dăch lơn. Nŭih n’hâm ƀon lan-nau ŭch bah đảng bah ăp nau tâm nchră ma chi bộ, đảng viên hŏ njêng nau rnơm, nau tâm rgop gay ma ƀon Êbung nar lơn ma hun hao đăp mpăn. Wa Y’Bom Byă, Bí thư chi bộ ƀon Êbung, xã Ea Tiêu, nkuăl Cư Kuin, n’gor Dak Lak, ngơi:

‘Chi bộ pung hên ăp khay rƀŭn du tơ̆ tĭng nau ntrŭnh bah Đảng ndrel nau ntrŭnh bah ngih dak. Geh nŭih kơt mhe nơh ri srê Covid-19 tât jêr, geh rnôk 10 nar, 15 nar rƀŭn du tơ̆. Rƀŭn chi bộ phung hên mra mbơh lor, nau kan bah n’gor nơm, n’gor êng, geh nau ntrŭnh, ntrong kan, nau mbơh đă tât ăp Đảng viên tâm rmôt gĭt. Tal 2 mra uănh ăp nau kan geh jao, kơt lah rmôt kan bu ur, rmôt kan lŏ mir, ăp ntŭk mât njrăng êng, mbơh ăp nŭih. Gâp lah bí thư, ân ƀư nau kan ueh lơn, ăp nau kan ân ngăch, geh nchrăp. Nau kan geh nchră nau ân gưl uỷ gâp ƀư dơi mô dơi mra mbơh đah ba lơ. Nau kan tuch tăm bah ƀon lan kơt nê đŏng, cà phê aơ ri, ngăn lah yan ba kŏ mbơh gay ma ƀon lan geh nau dơi hun hao, geh âk nau rhơn lơn”./.

Nuĭh rblang: Điểu Thân n'hanh H'Thi