VOV4.M’nông – Ôi 21/6, Thủ tướng Phạm Minh Chính lĕ ƀư tơm rƀŭn nchră mbơh dăp rgum n’hanh ntrŭt ngăch ntuh kơl nkual dâng rđŭng dak me Cửu Long rnôk 2021-2030 tâm nar 21/6/2022 ta nkual ƀon têh Cần Thơ đah tât râng bah ăp ban, n’gâng kan, nău kan trung ương, ăp ntŭk nkual dâng rđŭng dak me Cửu Long, Nkual ƀon têh Hồ Chí Minh, ăp nuĭh ntuh kơl, doanh nghiệp, kan ndrel hun hao, ăp nuĭh way kan n’hanh nuĭh khoa học.

Lam ntŭk rƀŭn nchră

Rƀŭn nchră lĕ mbơh bôk nău kan ƀư bah Chính phủ mpeh trong hun hao wăng sa rêh jêng n’hanh đăp mpăn mât njrăng bri dak, rnă njrăng nkual dâng rđŭng dak me Cửu Long ƀư tĭng Nghị quyết mrô 13 bah N’gâng kan Chính trị; mbơh dăp rgum nkual rđŭng dak me Cửu Long tĭng nău ntrŭnh bah Luật Dăp rgum; ntrŭt ngăch ntuh kơl an nkual dâng rđŭng dak me Cửu Long. Ta rƀŭn nchră ăp nuĭh ntoh măt tâm nchră ăp nkô̆ nău mpeh dăp rgum nkual dâng rđŭng dak me Cửu Long rnôk 2021-2030, uănh tât năm 2050. Thủ tướng Chính phủ Phạm Minh Chính lah rjăp, an mât dăng ăp nkô̆ nău nsrôih, ngăn lah kon nuĭh, đă an hun hao ngăch n’hanh nâp nâl, tâm di đah ntŭk, ƀư tơm bah nkual; uănh aơ lah nău kan khlay, geh nkô̆ khlay đah nău hun hao bah ăp ntŭk tâm nkual n’hanh lam dak.

Nuĭh rlang: Y Sưng Phê Ja