VOV4.M’nông: Bôk nău kan “1 rkeh mĭn ƀư mhe, nsrôih rlet rlău jêr jŏt, mĭn ƀư mhe, nsrôih lơh dơi chôt srê Covid-19” lah ngoăy tâm âk bôk nău kan khlay tâm rơh khay 5 aơ. Aơ mô knŭng lah di geh ma hôm mĭn lah jâng nsan, gay phung pah kan mô rlu nsrôih mĭn ƀư mhe.

Nô Hoàng Anh Tuấn-nuĭh kan kỹ thuật tâm nău kan Engineering, Công ty TNHH Toyoda Boshoku (Nkual công nghiệp Namora nkual ƀon têh Hải Phòng) 13 năm ƀư nău kan koh geh tât 30 nău mĭn ƀư mhe dơi kơt dŏng tâm nău kan. Yơn ntô̆ n’hao ngăn n’hanh dôl nkah gĭt ngăn đah nô lah tâm nar khay mĭn joi, gŭ mĭn ƀư mhe “Ê nkra trong n’hŭch mông nar camera định vị ndơ rnôk koh”.

“Bôl công ty lĕ rgŏ jă nuĭh gay ƀư ntop mông yưn mô tŏng. Lah rwăt tay 1 mlâm măy mhe mbra roh 7 rmen prăk n’hanh kơt nĕ công ty an ƀư 2-3 năm tât mư sŏk tŏng tay prăk. Bah nĕ gâp gŭ mĭn njêng nău mpŭng lĭr tâm rnôk ê nkra ndơ, ngăn lah mông nar camera định vị ndơ mpŭng lir, dăn đă nău mĭn n’hŭch mô nar camera định vị. Lor rnôk nkra rgâl mông nar camera rlu lah 105 giây, jêh nĕ gâp lĕ nkra rgâm hôm 92 giây”.

Mĭn ƀư mhe dơi công ty an rlong dŏng bah khay 3/2021. Jêh rnôk uănh năl uĕh nâp, mĭn ƀư mhe bah nô lĕ dơi kruanh công ty kơp dơn n’hanh ndơ̆ an dŏng lam hvi tâm ntŭk kan bah khay 9 năm 2021 đah rnoh khlay geh 3,8 rmen prăk du năm. Nĕ lah ndơ ntrŭt nsôr têh gay nô Tuấn nsrôih rlet rlău jêr jŏt, mĭn ƀư mhe âk lơn tâm năm tât.

Du ndơ mĭn ƀư mhe ntoh lư êng bah nô Nguyễn Thanh Tuấn, Mât uănh ntŭk sok, công ty cổ phần Sah ônh Đèo Nai, Tập đoàn Sah ônh Khoáng sản Việt Nam, lah “Kơt dŏng phần mềm dơn nău mbơh trực tuyến”. Mĭn ƀư mhe kơl n’hŭch mô nar kâp, n’hao mông nar pah kan bah phung pah kan tâm mông nkra njêng, n’hŭch mông nar nchih săk i ty, n’hao mông nar n trŭt đă phung pah kan. Nău dơn mbơh trực tuyến rgop n’hŭch prăk mông nar ndeh rhŏ kan ndơ̆ wơt phung pah kan n’hanh n’hao gĭt wât kơt dŏng công nghệ thông tin an cán bộ, phung pah kan. Nô Nguyễn Thanh Tuấn nkoch mpeh nău mĭn ƀư mhe bah nơm:

“Nău kan sah ônh mpôl hên geh êng nău kan ŏk r’ah, yor nê lơ n’hŭch ăp nău kan mô khlay ri lơ n’hao uĕh ndơ, sah ônh lah mah ônh bah neh dak. Lơ geh mông nar âk ndơ̆ an nkra njêng ri uĕh lơn lah sam ƀŭt sam tra âk. Gâp na nê̆ đah ăp oh nô ta ntŭk kan trôm ntu rlău 10 năm hôm gâp saơ oh nô dŭt ŏk r’hah n’hanh prăk kaih nuih n’hâm bôk năp gay gâp mĭn luh trong n’hŭch ăp ndơ mô khlay n’hanh n’hao nău săk rnglăy nău kan an oh nô”.

Bôk nău kan “1 rkeh nău mĭn ƀư mhe- nsrôih rlet rlău jêr jŏt, mĭn ƀư mhe, nsrôih lơh dơi chôt srê Covid-19” bah Tổng Liên đoàn lao động Việt Nam mô knŭng wăch rgum âk nuĭh pah kan râng ma hôm ntơm rdâk ƀư mĭn mhe gay phung pah kan viên chức nsrôih lơn tay, n’hao ngăch n’hanh uĕh nău kan. Wa Trần Thanh Hải-Groi Kruanh Rnâng kan Tổng Liên đoàn lao động Việt Nam, Kruanh ban ntĭm rđău ƀư tĭng bôk nău kan “1 rkeh nău mĭn ƀư mhe-nsrôih rlet rlău jêr jŏt, mĭn ƀư mhe, nsrôih lơh dơi chôt srê Covid-19” an gĭt:

“Bôk nău kan “1 rkeh mĭn ƀư mhe-nsrôih rlet rlău jêr jŏt, mĭn ƀư mhe, nsrôih lơh dăng chôt srê Covid-19” mĭn lah geh du kỹ thuật mhe, dơi ntuh kơl tĭng tâm công nghệ mbra ƀư tơm khlay ngăn tâm nău ƀư mĭn rklă mhe bah nơm tâm nău ngăn nkre lah nău săk rnglăy mĭn ƀư mhe bah nơm tâm cổng thông tin trực tuyến ma rmôt kan công đoàn lĕ ndâk njêng. Nău bôk nău năp tal 2 lah nău dơi mĭn ƀư mhe bah nuĭh pah kan tâm mô nar đêt mbơh ƀư tâm mông nar đêt he dơi geh săk rnglăy rlău 250 rbăn nău mĭn ƀư mhe, rgâl mhe bah nuĭh ƀon lan lam dak râng bơi tâm ban rĭng nsum bah du năm. Nău nĕ an saơ lah he geh nuih n’hâm tâm di n’hanh ăp nău kan di, rdâk hao dơi mĭn ƀư mhe bah nuĭh pah kan ri he dơi geh n’hanh geh nău rgâl têh tâm ntrong leo pah kan mĭn ƀư mhe bah nuĭh pah kan”.

Ta âk doanh nghiệp, nău rgŏ jă, ntrôl dăng ntrong leo tâm rlong pah kan blău, pah kan mĭn ƀư mhe n’hanh aơ lah “1 rkeh mĭn ƀư mhe-nsrôih rlet rlău, ƀư mhe, nsrôih lơh dăng chôt srê Covid-19” lĕ n’hanh dôl kơl rmôt phung pah kan mât uĕh nău dơi,soan mĭn ƀư mhe.... Bah nĕ, rgop n’hao săk rnglăy, uĕh ndơ ƀư, n’hao săk rnglăy nkra njêng tăch rgâl, rgop khlay tâm nău hun hao bah doanh nghiệp, nău kan ntŭk đoàn viên phung pah kan lah êng n’hanh rgop an nău hun hao wăng sa rêh jêng lah nsum bah neh dak./.

          Nuĭh rblang: Y Sưng Phê Ja