“Nđơr ŭch rdâk njêng n’gor Dak Lak ndrŏng uĕh, rsang rnglăy, săk tơm” lah nkô̆ bah Nar rgum ntơm njêng nău kan rgâl mhe n’gor Dak Lak năm 2024 mhe dơi UBND n’gor Dak Lak ntơm pơk nar ntri (23/9). Rgum nchră ƀư tâm 2 nar (23-24/9), Nar rgum ntơm njêng nău kan rgâl mhe n’gor Dak Lak năm 2024 (Techfest Đắk Lắk 2024) geh âk nău kan kơt: pla n’hơ, nkoch mbơh ăp trong nchrăp kan, ndơ geh ƀư ntơm njêng nău kan, OCOP, công nghiệp thôn ƀon, rhŏ dŏng pâl nđaih; du đêt tâm nchră mpeh ntơm njêng nău kan rgâl mhe, ntơm njêng nău kan nđư̆r uĕh, trong ntrŭt ntrôl ntơm njêng nău kan tâm ăp n’gâng kan, ăp trong kan, ăp rmôt nuĭh.

Aơ lah nău kan dơi ƀư ăp năm, gay nta trong dơh tâm mâp tâm nđŭr mpôl ntơm njêng nău kan, buăt nthoi ntuh kơl,  joi băl  tâm boh, pơk hvi ntŭk tăch rgâl. wa Nguyễn Tuấn Hà, Groi Kruanh Rnâng kan UBND n’gor Dak Lak an gĭt, ăp nău kan ntop kơl ntơm njêng nău kan ta n’gor hŏ dơi mpơl uĕh, rgop rdâk njêng reh n’gu ntơm njêng nău kan Dak Lak hun hao tâng jru, ring lam nuih n’hâm ntơm njêng nău kan khuh n’gôr tâm ăp rơh kơn ƀon lan.