Ôi 5/7, HĐND n’gor Gia Lai ƀư rơh Hop tâl 13, khoá XII, năm kan 2021-2026. Nchrăp rơh hop ƀư ntơm bah nar 5 tât lĕ nar 7/7, uănh an dŏng 2 nghị quyết mpeh nuĭh kan n’hanh mĭn uănh, an dŏng 22 nghị quyết geh tât ăp nkô̆ nău ntuh kơl, wăng sa, rêh jêng kon nuĭh ta n’gor. Mpeh pah kan nchrăp nuĭh kan, ntơh măt UBND n’gor Gia Lai, wa Trương Hải Long- Kruanh UBND n’gor Gia Lai răk rblang siƀŭt mbơh nău sơch wa Phạm Minh Trung - Giám đốc Sở Tài nguyên Môi trường ƀư uỷ viên UBND n’gor. Lôch jêh sơch bah kơi nê, wa Phạm Minh Trung hŏ geh đah rnoh phiếu 62/63. Nchrăp, tâm rơh hop dja, HĐND Gia Lai mbra mĭn uănh 22 trong nchrăp nghị quyết bah UBND n’gor Gia Lai. Tâm nê, geh âk trong nchrăp nghị quyết khlay kơt: rgâl trong nchrăp ntuh kơl năm 2023 tơm prăk ngân sách n’gor; rgâl di trong nchrăp ntuh kơl jong dah găp; rgâl dŏng neh bri jêng nău kan êng ƀa ƀă gay ƀư trong mbluh rloh ăp xã ta nkuâl Kông Chro.

Ta nkuăl ƀon têh Kon Tum, HĐND n’gor Kon Tum ntơm ƀư rƀŭn tal 5, gưl 12, năm kan 2021-2026. Tâm nar rƀŭn, HĐND n’gor Kon Tum mra uănh nau tă geh ƀư nau kan bah ăp ntŭk kan tĭng nau ntrŭnh, tâm nchră, nchră tât nau kan văng sa, rêh jêng tâm 6 khay bôk năm, uănh năl nau kan, nau ƀư tơm tâm 6 khay dŭt năm 2023 ndrel nau ntrŭnh ƀư ăp nkô̆ nau geh tĭng nau dơi.

Geh ƀư ntơm rnôk aơ tât lơ 7/7, rơh rƀŭn tal 5, HĐND n’gor Kon Tum gưl 12, năm kan 2021-2026 mra uănh, ƀư nau kan đah 32 nkô̆ nau UBND n’gor mbơh tâm nar rƀŭn, tâm nê geh nau kan khlay, kơt: rnoh kơl an ƀư bôk nau kan pă ƀon lan ăp nkuăl geh nau khuch khat, ngăn ngên jêr jŏt, n’har bri, ntrơn du dah rŏng, nkuăl tăm bri dŏng kan bah n’gor, pă tơm prăk ƀư nau kơl an hun hao tâm boh nau kan nsum, ntrơn rgâl nau nchrăp ƀư ăp nau kan nkô̆ nau bah neh dak năm 2022-2023 ndrel nau nchrăp nau ntop nau kan ntuh kơl nsum tâm năm 2024./.