Lơ 7/12, ta nkuăl ƀon têh Quy Nhơn, n’gor Bình Định, ntơm rƀŭn Bưu chính ăp dak ASEAN (ASEANPOST) tal 28. Rơh rƀŭn yor N’gâng kan Công ty Bưu điện Việt Nam (Vietnam Post) ƀư. Rơh rƀŭn bưu chính ăp dak ASEAN geh ƀư ntơm lơ 7-9/12/2022, đah nau râng bah ntoh măt rđau kan Bưu chính 10 dak Đông Nam Á, rgum tâm nchră mpeh nau ntrŭnh ƀư ăp nau kan tâm boh âk ding, nau nchrăp ƀư nau kan geh nchră ta Đại hội Liên minh Bưu chính lam ntur neh ndrel Liên minh Bưu chính nkuăl Châu Á-Thái Bình Dương.

Ngăn lah, ăp rđau kan gưl prêh bah Bưu chính 10 dak Đông Nam Á mra dŏng âk mông gay tâm nchră mpeh nau dơi bah Bưu chính lam ntur neh, ăp nau nkhêp ndrel nau ntul rlong bah bưu chính tâm rơh tât, ntrong rklaih n’hao nau nâp nau kan nchuăl leo tĭng nau ơm, nchuăn leo ngăch EMS, nchuăn leo ndoh ndơ tăch rgâl điện tử, tem bưu chính, ăp nau kan n’hao rnoh hao ndơ./.