Knŭng đah ndơ dŏng geh du mlâm n’hat jêt hơr, du gâl mâng si dăng du hat gay tôp n’hat, jêh du m’it uănh n’gâng tơm si cà phê, nghệ nhân mom Y Ser Bkrông, ta ƀon Tơng Jú, xă Ea Kao, nkual ƀon têh Buôn Ma Thuột lĕ gĭt nchrăp ndơ ƀư. Mô kâp vẽ mon âk, nô tĭng nău blău ơm jŏ năm bah nơm ngăch trah mon tĭng trong tơm si. Rup ndah mbrơi mbrơi jêng rup ăp trong trah bah nghệ nhân. Nkre ƀư, nô Y Ser Bkrông nkre

Aơ lah rup nuĭh bu ur hăn ndrâm dak gay bâk dak. Aơ lah rup si bah nuĭh Tây Nguyên, gâp ŭch nkoch tay nău rêh ngăn bah ƀon lan kăl e. Gâp uănh tơm si kơt nĕ m’hâm ƀư jêh nĕ mư mĭn tât nău ŭch ƀư bah gâp moh ndơ mon, m’hâm n’gâng si he dơi mĭn tât rup ndah bah nuĭh bu klô djôt yêh mô lah nuĭh bu ur dôl ŭm mô lah nuĭh bu ur anh sah hăn tâm mir, ntĭl n’gâng tơm si.

Ta rgum tâm rlong trah mon mỹ nghệ bah tơm cà phê dơi ƀư tâm trôm Lễ hội cà phê ta nkual ƀon têh Buôn Ma Thuột rơh tal 8 mhe rlău, geh 53 nghệ nhân tât bah ăp nkuăl, nkual têh, nkuăl ƀon têh ta lam n’gor Dak lak n’hanh ăp n’gor nkual tây Nguyên râng. Đah nkô̆ bôk nău “Văn hóa, nghệ thuật, bri dak, kon nuĭh Tây Nguyên” âk nghệ nhân lĕ dŏng nghệ thuật trah mon si way ơm gay ƀư jêng ndơ dŏng”. Ăp rup ndah kon mŭn way bên kơt: rgum rƀŭn lễ hội, ngêt ndrănh yăng, tŭr chĭng, khoh phe, mă kon, chom mir dơi nghệ nhân ƀư.

Nghệ nhân Y Dhok Adrơng, ta xă Cư Suê, nkuăl Cư M’gar, n’gor Dak Lak nkoch: nău rup kon mŭn si Tây Nguyên lah nsum n’hanh nuĭh Êđê lah êng way dŏng ăp ntil si dăng, rbân kơt Muồng, tơm nâng,... gay ƀư rup kon  mŭn. Đah tơm cà phê an săch ăp tơm kranh, an kro mư dơi ƀư jêng rup kon mŭn.

“Tơm aơ aƀaơ gâp trah mon mê̆ mă kon. Yor kăl e rnôk hôm e jêt ăp rơh hăn tâm mir mê̆ way mă n’hanh mă gâp ta nkơi. Đah trah kon mŭn ri tơm si têh mbra dơh ƀư n’hanh jêng rup lơn. Hôm đah si cà phê ri jêr lơn, he ân m’hâm ƀư gay dơi mât mpok aơ, trah jêr đŏng, an dŏng rgop ăp ntil măy ri mư dơi ƀư.

          Knŭng tâm 3 nar, ăp nghệ nhân lĕ hêg 48 rup kon mŭn mỹ nghệ đah âk nău uĕh tâm nău rêh drăp ndơ n’hanh nuih n’hâm bah nuĭh Tây Nguyên. ăp ndơ lĕ jêh dơi mpôl rdâk ƀư dŏng mpla nsơ tâm nkual pâl nđaih sinh thái Ko Tam gay nkoch tât nuĭh ƀon lan n’hanh năch.

Dơi tât uănh, groi nđôi rnôk nghệ nhân mon ndơ mỹ nghệ bah tơm cà phê tâm ăp nar ƀư lễ hội, nô Nghiêm Bá Nam, năch pâl nđaih tât bah nkual ƀon têh Hà Nội nkoch: aơ rơh bôk năp nô saơ i măt nghệ nhân mon mỹ nghệ bah si cà phê. Nô saơ ndrăt yor bah ăp gâl si ntôn lah jăng lơi, tă bah mpang ty bah nghệ nhân đah ăp ndơ dŏng đêt lŏ dơi ƀư jêng ăp rup ndah kon mŭn khlay.

          “Bah ăp ndơ tơm cà phê jăng lơi ri ăp nghệ nhân dôl nchreng ăp ndơ đah nău blău ty bah nghệ nhân gay nsơr ndơ bah khân pơng, dŭt uĕh. Ăp nghệ nhân mbra ƀư geh âk ndơ dơi uănh n’hanh khlay đah nghệ thuật, gĭt saơ kơt he mbra dŏng lĕ ăp ndơ bah tơm cà phê”.

Đah ăp rnoi nuĭh ta Tây Nguyên, rup ndah tơm si lah du ntil nghệ thuật uĕh geh bah jŏ. Bah ăp gâl tơm si mô khlay, tă bah mpang ty blău bah nghệ nhân, dơi nsĭng rup ndah kon mŭn mhe, geh âk nău răm n’hanh dŭt n’hâm huêng. Mô knŭng trah mon ta ăp tơm si têh jŏ năm, aƀaơ, ăp rup ndah nĕ dơi trah mon ta ăp tơm cà phê kranh dăng, nsĭt tay ăp nău khlay mhe, uĕh n’hanh êng an tơm cà phê.