Ndơn măt kruanh Đảng, Ngih dak, Thủ tướng njuăl nău ôp khâl đêp rmên n’hanh nău mbah rhơn uĕh lăng ngăn tât ăp nuĭh u, nuĭh mê̆, ăp oh yuh bu ur Việt Nam. Thủ tướng mĭn lah, Bu ur Việt nam rlău ăp rơh geh nău ƀư tơm khlay, geh âk nău rgop têh tâm rnôk ndâk njêng, mât njrăng n’hanh hun hao bah neh dak. Đảng n’hanh Ngih dak uănh tât trong kan tâm ban bu ur bu klô n’hanh yor nău ngăch hao bah bu ur đah âk nău ntrŭnh, nău kơl mpeh ntĭm nti cán bộ bu ur, mât uănh săk soan, ntop kơl bu ur tâm nău kan, rdâk njêng nău kan... Đah âk nău kơl nĕ, Việt Nam lĕ dơi nta ntŭk ntô, dơh an bu ur nar lơn mĭn lah jâng nsan, nău tơm n’hanh geh âk nău dơi rgop an rnăk wâl, nsum mpôl n’hanh nău rêh jêng. Yơn lah, tĭng Thủ tướng he hôm e âk nău an ƀư gay nsĭt tay nău rêh uĕh lơn an nuĭh bu ur, an bu ur dơi geh, rgop an kon nuĭh, an neh dak, mô an geh nuĭh ntlơi bah kơi. Thủ tướng mĭn lah:

Ntŭk rơh rƀŭn tâm nchră.

“Rơh tâm nchră gay djăt, tâm pă, ndrel mkra n’hanh ndrel geh nău kan ƀư tĭng ăp nău rƀŏng tâm ban bu ur bu klô n’hanh yor nău rgâl hao bah bu ur ta 03 rmôt bôk nău: Bu ur đah hun hao wăng sa; Bu ur n’hanh ăp nău rnă njrăng đăp mpăn rêh jêng, tâm ban bu ur bu klô; Bu ur n’hanh rơh rgŏ năp. He an uănh tay ăp nău lĕ dơi ƀư, mô hŏ dơi ƀư gay geh ăp trong mkra tay gay rgâl uĕh, nta an nău kan, nsơr n’hâm soan bah oh yuh bu ur. Nău tâm nchră mô dơi mkra lĕ ăp nău, yơn he an wât, mô rlu mkra ăp nău mhe ntoh, nsrôih an hun hao”.

Đah nuih n’hâm ƀon lan ƀư tơm, sŏng dăng, ngăn ngên, ăp đại biểu lĕ an ăp nău ôp, n’gluh an ăp nău ŭch, mpŏng, jêr jŏt wăk kol. Thủ tướng ndrel ăp n’gâng kan nău kan ơh mpeh ăp nău hôm e rvê, nău ôp bah bu ur lam dak. Lơn lah mpeh nău pơk hvi nuĭh prăk kaih têh gay oh yuh gĭt tơm prăk dơh lơn, Wa Đỗ Thị Ninh mpeh tâm rmôt kan Prăk kaih têh Tình thương ntŭk kan Nghi Lộc, n’gor Nghệ An nkoch:

 “Gay prăk kaih têh hvi jêng ndơ ƀư tam rgop ƀư tĭng nău ntrŭnh bah Ngih dak n’hŭch an manh prăk kon khlay, n’hŭch ach o nâp nâl, ntrŭt prăk kaih lĕ rngôch lam dak, dăn đă Chính phủ geh trong mkra gay pơk hvi đah nuĭh năch n’hanh tơm prăk an manh têh hvi, nkre uănh nta nơih mpeh pháp lý gay ăp rmôt kan prăk kaih têh hvi dơi hun hao nău trok njuăl prăk”.

Tĭng Thủ tướng Phạm Minh Chính Ngân hàng ngih dak an geh ăp trong mkra kơl lor n’hanh ntop kơl an ƀư têh hvi dơi lam hvi nău kan n’hanh pơk hvi nuĭh gĭt gay n’hŭch nsing nơm manh prăk kon khlay n’hanh ăp ntil wăng sa têh hvi dơi gĭt tơm prăk du trong ngăch ngăn.

Thủ tướng ntoh ngơi ta Rƀŭn nchră.

“Ăp nuĭh dơi gĭt ăp rmôt kan an manh têh hvi aơ hôm e đêt ri Ngân hàng an mĭn m’hâm ƀư pơk hvi nuĭh pơk hvi rnoh khlay pơk hvi năm khay an tâm di, ndrĭ mư kuăl lah kơl lor, n’hanh pơk hvi hôm an geh trong nchrăp đăp mpăn tâm pă tơm prăk bah ăp nuĭh dơi gĭt n’hanh n’hŭch dơi nsing nơm manh prăk kon khlay hôm e. Aƀaơ ŭch n’hŭch an manh prăk kon khlay ri an geh âk ngih pah kan, tâm nĕ geh ăp ngih pah kan dơi kan lăp yơn ngân hàng n’hanh nchrăp an m’hâm ƀư oh yuh dơi gĭt dơh lơn, nơih lơn n’hanh pơng dơi đăp mpăn nău ŭch bah he, yơn pơng nâp nâl dơi geh an trok rnon”.

Bah meng nĕ âk nuĭh ntoh măt bu ur lĕ n’gluh an nău ôp geh tât ăp nău mpeh ăp trong mkra gay bu ur thôn ƀon râng dŭt n’hâm n’hanh geh âk nău rgop tâm bôk nău kan ndâk njêng ƀon lan mhe; moh trong mkra gay ntrôl tâm ban bu ur bu klô tâm nău kan mĭn njêng khoa học công nghệ; dăn đă Thủ tướng ntĭm rđău ngih pah kan dơi kan dŭt n’hâm mbơh ƀư ăp sam bŭt gay kơp dơn n’hanh nchih săk ao dai Việt Nam lăp ndơ văn hóa mô mpơl săk ngih dak./.

VOV/Nuĭh rblang: Y Sưng Phê Ja