Nar 4/7/2023, Ngih dak si đa khoa chuyên sâu Xuyên Á Tây Nguyên lĕ dơi rdâk ƀư ta nkuăl Cư Jut, n’gor Dak Nông. Wa Nguyễn Văn Châu, Tổng giám đốc ngih dak si Xuyên Á, an gĭt, nău uĕh đah nău dŭt n’hâm bah kruanh n’gor Dak Nông, n’hanh gĭt saơ ăp nău mbơh uĕh tâm ntŭk ntô ntuh kơl tăch rgâl bah n’gor, doanh nghiệp lĕ ngăch ntrŭnh an ntuh kơl ta ntŭk aơ.

“Aƀaơ mpôl hên dôl tât Dak Nông gay ntuh kơl ndrel du tơ̆ 2 ngih dak si: bôk năp lah ngih dak ta Nkual ƀon têh Gia Nghiã, n’hanh ngih dak si tal 2 lah ta nkuăl Cư Jut. Kơp tay rnôk hăn ntuh kơl ta ăp n’gor, nkô̆ nău ngăch lah dŭt n’hâm khlay. Ma ŭch ngăch lah an kloh rah wah, na nê̆, mbơh kloh, an mkra na nao ăp nău gay m’hâm ƀư an nuĭh ntuh kơl geh săk rngăch ngăn”.

Uănh lah prêh đŏng nău uănh tât bah kruanh n’gor Dak Nông đah doanh nghiệp, Wa Hồ Tuấn Dũng, Groi TGĐ Công ty cổ phần 471, an gĭt, ăp wăk kol mhe geh tâm rnôk ntŭk kan ƀư nău nchrăp ƀư nkra tay, pơk hvi trong bah Quốc lộ 14 tât mpông n’har bri Bu Prăng dơi mkra ngăch, gay ndơ ƀư jêh ngăch.

“Ntĭt nsa kơt ăp rnôk geh wăk kol mpeh trong kan neh, mpeh trong kan mkra kỹ thuật jêh nĕ lah ăp wăk kol êng ri dơi geh nău uănh tat ntĭm rđău dŭt n’hâm bah ăp n’gâng kan, nău kan, lơn lah bah ban mât uănh ăp nău nchrăp ƀư, bah kruanh n’gor gay ma mkra dŭt ngăch ăp wăk kol, yor nê mư geh ngăch n’hanh săk rnglăy kơt nar aơ”.

Ntuh kơl tâm nău bri ta nkuăl Dak Song bah rlău 10 năm bah năp, wa Nguyễn Đức Hạnh, Công ty cổ phần kỹ nghệ si MDF Bison Dak Nông, an lah:

“Tâm rnôk 5 năm plơ̆ ma aơ nău uănh mĭn bah n’gâng kan ƀon lan, nău kơl bah ăp ngih pah kan dơi kan, ngih pah kan geh nău dơi ri mpôl hên saơ dŭt dơh. Ri aƀaơ ntŭk kan mpôl hên lĕ tăm bri geh rlău rnoh neh dơi n’gor dăp rgum n’hanh ƀư uĕh trong kan mât uănh njrăng n’gang bri”.

Ăp uănh lah uĕh bah ăp doanh nghiệp an saơ ntŭk ntô ntuh kơl tăch rgâl ta n’gor Dak Nông dôl dơi rgâl uĕh. Nău aơ lĕ dơi djôt dơn tă bah hao ndal bah n’gor tâm ăp bảng chỉ số đo lường ăp năm bah năp. Na nê̆, rnoh rgâl nkra hành chính (PAR Index) Dak Nông bah n’glêh dŭt dăp gưl năm 2018 lĕ hao dăp tal 37/63 n’gor nkual ƀon têh lam dak năm 2022; rnoh mpeh nău rhŏ bah ngih pah kan hành chính lam dak (SIPAS) dăp tal 31/63 (hao 16 gưl nkôp đah năm 2021); rnoh dơi tâm rlong gưl n’gor (PCI) dăp tal 38/63 (hao 14 gưl nkôp đah năm 2021); rnoh nkra rgâl hành chính nău kan ndâk njêng n’hanh hun hao n’gâng kan ƀon lan điện tử, n’gâng kan mrô dăp tal 9/63 n’gor nkual ƀon têh.

Ntoh lư tâm ăp rnoh ndơ PCI năm 2022, Dak Nông geh rgâl âk, kơt prăk năm khay dăp tal 6/63; kơp kloh rah wah dăp tal 17/63; nău ngăch prăl bah n’gâng kan n’gor dăp tal 23/63 n’gor, nkual ƀon têh.

Bôl ndrĭ, tĭng wa Đậu Anh Tuấn, Groi tổng thư ký, Kruanh ban pháp chế Liên đoàn tăch rgâl n’hanh công nghiệp Việt Nam (VCCI), aơ mư njoat bôk năp gay Dak Nông rgâl têh dăng lơn ntŭk ntô tăch rgâl, wăch rgum ntuh kơl. Yor nkôp đah ăp n’gor hăn lor, têh ndrŏng lơn, âk nău geh dơh lơn, nău nkra rgâl hành chính ta Dak Nông an hao ngăch mư dơi ban ăp nău mô hŏ dăng bah n’gor.

“Lah uănh tâm trong ăp rnoh mrô PCI bah n’gor Dak Nông ri knŭng geh rnoh mrô prăk năm khay geh tâm top bôk nău bah lam dak, hôm ƀa ƀă ri mô hŏ tâm top n’gul n’hanh tốp bah kơi. Jêng Dak Nông an nkra rgâl tay lơn tâm ăp ntil nău, Kơt lah lăp nsum ntŭk tăch rgâl an dơn lơn tay, nău neh ntu an dôh rklaih têh dăng lơn tay, jêh nĕ nău mbơh kloh rah wah..., ri geh dŭt âk trong mkra ma Dak Nông an ƀư tâm năm tât. Ntơm hăn bah Dak Nông mô geh dơh kơt ăp ntŭk êng, yơn Dak Nông geh nău ŭch, Dak Nông geh trong uănh n’hanh Dak Nông geh nău nsrôih dŭt têh, jêng mpŏng ŭch nău rgâl tâm ăp năm mhe rlău mư dơi ntơm ƀư, n’hanh nău rgâl tâm năm tât pơng nâp nâl lơn, uĕh dăng lơn tay./.