Dŭt âk nuĭh lĕ njôt nđâp ma thùng mì thôm, dak ngêt, lương khô, phe, kho ao, ao phao, dak toh gay ma ndơ̆ ta ăp bôk ndeh 0 prăk gay ma njoăl tât ƀon lan mpeh Bắc. Kơp tât 8 mông lơ 10/9, nuĭh ƀon lan Đăk Lăk lĕ tâm rgop geh 5 bôk ndeh rdeng ndơ, râng geh ăp bôk ndeh geh bơi tât 20 tấn. Măng 10/9, rnoh ndeh aơ ntơm hăn let Bắc gay ma pă an ƀon lan ta ăp n’gor dôl geh nău tât khuch hô yor mih dak buk. Gay ma nta nău dơh nơih an nuĭh ƀon lan, ăp rmôt kan tâm kơl geh dơh nơih tâm nău nchoăn rdeng ndơ, UBND nkuăl ƀon têh Buôn Ma Thuột lĕ ntĭm đă Hội chữ thập đỏ nkuăl ƀon têh n’hanh ntŭk kan lao động thương binh xã hội tâm rgop đah ntŭk kan mât đăp mpăn nkuăl ƀon têh mât uănh ndeh klư, rnoh ndơ n’hanh ăp ntil sƀ hăn trong gay ma ndeh klư hăn nsong dơh nơih.