Rlău 1 năm aơ, nuĭh ƀon lan ta n'gor Dak Nông hŏ ndơ̆ jao bơi 300 n'gâr phao njêng êng ndrel âk ndrak nsiu rtoh êng ƀa ƀă. Tĭng Công an n'gor Dak Nông, ăp năm rlău aơ, ta n'gor hŏ geh âk rơh tât nău rngot klâng geh tât ndrak nsiu phao bleo kơt: hăn nchron geh pănh nuĭh khĭt, nkhĭt nuĭh, tâm rkeh tâm lơh, ntŭng rmuănh drăp ndơ....

Ta năp nău ngăn geh dja, ndrel đah nău ntrôl dăng trong leo ƀư lam ƀon lan mât njrăng neh dak, Công an n'gor Dak Nông hŏ n'hao dăng pah kan nkoch trêng, rgŏ jă ƀon lan ndơ̆ jao phao bleo njêng êng, lôch nê nsĭt geh nău dơi tam. Ntơm bah năm 2022 tât aƀaơ, lam n'gor hŏ rgŏ jă nuĭh ƀon lan ndơ̆ jao bơi 300 phao njêng êng ăp ntil, 4 n'gâr phao dŏng an tahen, 1 n'gâr phao thể thao, 1 găr nat. Rlău ma nê, mpôl công an hôm nhŭp kân geh 7 keh kul phao, 200gr nsiu rtoh, rlău 1.000 găr ndrak chì.