Tâm ăp nar rlau aơ, tăng lah kônh wa mpeh Bắc dôl rdâng đah nau khuch khat hô bah mih dak lip yor phŭt mro 33, yuh Nguyễn Hồng Tố Diễm, gŭ tâm nkuăl ƀon têh Pleiku, n’gor Gia Lai nchrăp ndơ sa ndrel dak ngêt tât gay ma kơl an kônh wa ntŭk geh dak lip. Ăp ntil ndơ yuh leo tât geh dăp ueh gay ma kâp ndeh bu leo hăn:

            ‘Gâp ndrel ma yuh gâp, bar hê oh nur hên njoăl đê̆ ndơ ân kônh wa nkuăl geh dak lip lơh, kŏ ŭch lah ăp nô ăp yuh bol ma trong ngai kŏ leo tât ty ân kônh wa. Kŏ ŭch ăp nŭih mra kơl an kônh wa tâm ăp nkuăl dôl geh nau khuch khat”.

            Rêng nau kan “N’ha ueh nkŭm n’ha sat”, âk nŭih tâm n’gor Gia Lai kŏ kuăl jă ƀon lan, băl bên rgop mì tôm, dak ngêt ndrel dak si gay ma njoăl kơl an ân ƀon lan nkuăl dak lip mpeh Bắc. Nô Võ Phi Hổ, nŭih tơm ndeh Phi Hổ, hăn trong Gia Lai-Đà Nẵng mbơh, jêh rnôk geh nau kuăl jă, tâm kêng măng lơ 11/9, hŏ geh âk nŭih geh nuih n’hâm lŏ rgum tât ntŭk gay ma njoalư ndoh ndơ, tâm pă ăp nau jêr ma kônh wa mpeh Bắc dôl ma rdâng:

‘Gâp ntơm dâk kuăl kônh wa ƀon lan Gia Lai sâm nsum ty leo ăp nklâm ndơ, nau ŭch rŏng bah kônh wa Gia Lai rƀŏng tât kônh wa mpeh Bắc. Nkre lah gâp kŏ bah n’gâng kan tâm nkualư gay ma manh ntŭk kơp uănh vé bah công viên Đồng Xanh lah ntŭk rgum ndoh ndơ ndơn ăp ndơ kơl yor ta aơ ntŭk hvi ndrel dơi ân neh rdeng ndơ lăp”.

Kŏ tâm kêng măng 11/9, Rnâng kan n’gor uỷ Gia Lai geh nau ntrŭnh mbơh đă ăp gưl uỷ, n’gâng kan, rmôt kan bah n’gor ndal ƀư nau rgŏ jă kơl an ân kônh wa geh nau khuch khat. Rơh rgŏ jă ntơm nar aơ lôch lơ 13/9/2024. Ntơm bah tơm prăk bah rmôt kan, Uỷ ban MTTQ Việt Nam n’gor Gia Lai kŏ pă kơl an 400 rkeh prăk njoăl tât kônh wa ăp n’gor mpeh Bắc.

Ta Dak Lak, đah ăp nau kan ngăn, kônh wa ăp rnoi tâm Dak Lak dôl geh nau kan tâm kơl ma ƀon lan mpeh Bắc dôl geh nau khuch jâk bah moh dak lip, ntoh nuih n’ham tâm kơl, tâm rnglăp tâm rŏng bah rnoi mpôl Việt Nam. Tâm nkuăl Lăk, ngoai tâm ăp nkuăl jêr ngăn bah n’gor Dak Lak, ntŭk geh tât 66% lah rnoi mpôl đê̆ gŭ rêh, kônh wa hŏ ndrel tâm rgop n’hâm soan, nŭih rgop prăk kaih ngăn ngăn ƀư jêng ăp hộp boh juh ma tuh ŭch rŏng njoăl tât kônh wa mpeh Bắc tâm rnôk mâp khuch. Kônh wa mô rvê nau jêr jŏt, anh sah tuh neh ngih nơm tăm leo tât ntŭk rgum tâm chùa Quảng Trạch, xã Đăk Liêng, nkuăl Lăk gay kơl an.

Tâm Kon Tum, Rnâng kan Đoàn n’gor Kon Tum kuăl jă ăp gưl kan Đoàn ndrel rlau 33 rbăn đoàn viên, druh ndăm tâm n’gor rgop kơl an ƀon lan rklaih mih dak lip. Rơh tâm rgop kơl an bah ƀon lan geh Đoàn n’gor Kon Tum ƀư tâm 5 nar, ntơm 11/9 tât 15/9. Jêh rnôk rgŏ jă đah nuih n’hâm kơl an, ăp nŭih cán bộ, công chức, viên chức ntŭk kan Đoàn n’gor Kon Tum hŏ kơl an ƀon lan nkual dak lip mpeh Bắc. Nô Nguyễn Văn Mạnh, Groi Bí thư Rnâng kan Đoàn n’gor Kon Tum, mbơh:

“Rnâng kan Đoàn n’gor kŏ ntrŭnh mbơh tât dĭng lĕ ăp ntŭk kan đoàn nkuăl, TP. Êp nê kŏ lah du ntrong tâm nthoi ăp nŭih geh nuih n’hâm lŏng. Ăp ntŭk kan đoàn bah nkuăl, TP geh ăp ntŭk ndơn ndơ kơl. Ăp ndoh ndơ kơl an bah TP kŏ kơt lah ăp nkuăl geh rgum tâm quảng trường. Ntơm bah nê Rnâng kan Đoàn n’gor tâm nthoi ma ăp rmôt kan nchuăn rdeng leo ndơ hăn tât ân kônh wa mpeh Bắc gay ma kơl an kônh wa rlet rlau nau jêr rnôk aơ”./.