VOV4.M’nông:   Nuĭh kan lŏ mir n’hanh doanh nghiệp ta nkual Tây Nguyên dôl tâm rgop ƀư luh ăp nkual tăm tơm sa play uĕh kah âk, dơi an mrô săk đah trong tuch tăm đăp mpăn uĕh, âk ngăn đah ndơ. Trong ƀư aơ dôl nsĭt tay săk rnglăy an lĕ kônh wa ƀon lan n’hanh ăp doanh nghiệp tăch n’gluh, ntrôl lŏ mir hun hao tĭng trong mhe, đah rnoh khlay âk n’hanh nâp nâl.

N’gor Lâm Đồng aƀaơ geh nklăp 10.000 ha sầu riêng n’hanh aơ lah ngoăy tâm âk ntil ndơ lŏ mir khlay ngăn bah n’gor. Wa Võ Hữu Long-Kruanh Công ty TNHH Nkra njêng tăch rgâl Long Thủy, xă Lộc An, nkuăl Bảo Lâm, n’gor Lâm Đồng an gĭt, ntŭk tăch n’hanh ntŭk tăch n’gluh an play sầu riêng aƀaơ dŭt đăp mpăn, yơn nău khlay bah ntil play kah aơ lơ âk n’hanh đăp mpăn rnôk nkual tăm dơi dăn mrô săk, kloh rah wah trong tăm, mât chăm, pĕ, ê nkra n’hanh tâl dŭng. Lơn lah, đah nău pă mrô săk nkual tăm, doanh nghiệp dơi tăch n’gluh di trong têh n’hanh nsĭt tay nău geh an n’ăp nuĭh tăm n’hanh doanh nghiệp:

        “Mrô săk nkual tăm lĕ pă hôm, VietGAP tŏng ăp hôm, rnôk gâp tŏng ăp geh sam ƀŭt tăch n’gluh ri rnoh khlay gâp rwăt nkôp đah ntŭk tăch ri âk lơn bah 15-20 rbăn prăk. Đah ăp rnoh neh lĕ an mrô săk, lĕ tâm rgop ƀư tâm trong bah he ri mhe aơ gâp ký geh 6.000 tấn”.

Nkual tăm geh mrô săk đah trong mât tăm đăp mpăn uĕh dôl dơi nsĭt tay săk rnglăy âk an kônh wa ƀon lan n’hanh ăp doanh nghiệp tăch n’gluh ta Tây Nguyên.

Ndâk njêng nkual tăm tĭng trong tâm rgop dôl dơi ntrôl dăng ta n’gor Dak Nông đah âk ntil play kơt sầu riêng, chanh rse, play rba, bơ. Âk nkual tăm ta n’gor lĕ dơi pă mrô săk gay rhŏ an tăch n’gluh. Wa Bùi Phú Tôn, Kruanh Công ty TNHH tăch n’gluh Nghiệp Xuân, xă Đăk Nia, nkual ƀon têh Gia Nghĩa, n’gor Dak Nông an gĭt, đah nău jêng tâm rgop, ăp ndơ bah công ty lĕ uĕh âk n’hanh tâm ban, nsĭt tay săk rnglăy âk rnôk tăch n’gluh:

“Ntŭk tăch đă he an tăch n’gluh di trong khlay. Tăch n’gluh di trong khlay ri đă an geh mrô săk nkual tăm, mrô săk ntŭk tâl dŭng tĭng tâm di ngăn, mô di hăn trong tăch jêt kơt kăl e tay”.

Wa Nguyễn Thị Tình, Groi kruanh N’gâng kan tuch tăm mât rong n’hanh hun hao ƀon lan n’gor Dak Nông an gĭt, tât aƀaơ Ntŭk kan dak si mpa rong tơm tăm lĕ pă an n’gor 38 mrô ntŭk tăm n’hanh mrô săk ntŭk tâl dŭng. Gay dơi geh tâm di pă an mrô săk nkual tăm, đă nuĭh ƀon lan an rgâl mhe trong tăm, dơi uănh nđôi uĕh kah, lơn lah uănh nđôi mpa phah tơm tăm. Đah nău dơi pă an mrô săk nkual tăm, du đêt ndơ play bah n’gor lĕ dơi tăch n’gluh di trong hăn ăp dak đah rnoh dŭt âk, khlay âk lơn n’hanh nuĭh ƀon lan dơi geh sa âk lơn. N’gor geh jâng wăng sa đah doanh nghiệp lah jâng nsan têh, Dak Nông dôl rgum ntrôl dăng hun hao tâm rgop trong n’hanh nkual tăm geh mrô săk:

“Gay dơi ndâk njêng nkual tăm ri tâm rgop đah nĕ an ndâk njêng trong tâm rgop, gay geh nkual tăm n’hanh ntŭk tăm đăp mpăn gay joi ntŭk, joi tu tơm. NkKô̆ nău bah nkual tăm lah he mbra gĭt tơm tăm nĕ dôl ntŭk tăm, moh nuĭh dôl ƀư n’hanh moh trong ƀư tĭng, geh đăp mpăn ndơ đŏng lah mô. Ta n’gor ri bah n’gor ủy tât UBND n’gor lĕ geh dŭt âk ntĭm rđău nău aơ. Tâm nkô̆ nău rgâl tay nău kan lŏ mir ri mĭn đŏng ndơ̆ tâm rgop trong gay geh nkual tăm đăp mpăn, nâp nâl rhŏ an công nghệ nkret njêng kơt tăch n’gluh bah kơi aơ”.

Nkual tăm geh mrô săk đah trong ƀư mât tăm đăp mpăn dôl nsĭt tay săk rnglăy âk an kônh wa ƀon lan n’hanh ăp doanh nghiệp tăch n’gluh ndơ lŏ mir ta Tây Nguyên. Nău aơ dôl dơi ăp ntŭk tâm nkual uănh khlay hun hao gay dơi ndơ̆ ăp ntil ndơ lŏ mir tơm khlay hăn lam ntŭr neh./.

                    Nuĭh rblang: Y Sưng Phê Ja