VOV4.M’nông: Jêh âk khay rlu rngot rngăt yor srê Copvid-19, nteh chĭng gông bah nuĭh K’ho bah dâng jâng yôk Langbiang, nkuăl têh Lạc Dương, nkuăl Lạc Dương (Lâm Đồng) lĕ ntơm nteh n’gôr plơ̆ tay gay wơt năch pâl nđaih tâm yan năm mhe aơ. Ndrel đah nĕ, ăp ndơ way ơm uĕh ta ntŭk kơt kho ao, ndrănh yăng lĕ dơi nchrăp tŏng ăp, nchrăp rhŏ nău ŭch ngêt sa bah năch pâl nđaih dăch ngai. Yor nău hun hao pâl nđaih ntŭk gŭ rêh lĕ kơl nău rêh wăng sa bah nuĭh ƀon lan ntŭk aơ hun hao tĭng nar.

Rnôk ƀư tĭng pơk lhoi gŭ ƀah kon nuĭh, tâm di đăp mpăn, ngăch, uănh nđôi ta chôt srê Covid-19 tĭng Nghị quyết 128 bah Chính phủ, nteh chĭng gông bah ƀon lan rnoi K’ho ta jâng yôk Langbiang, nkuăl têh Lạc Dương, nkuăl Lạc Dương (Lâm Đồng) lĕ ngăch tĭng tay n’hanh nteh n’hoh rhŏ nău ŭch ngêt sa bah năch. Bu ranh ƀon Krajan Plin rhơn an gĭt, bôl rlu tâm âk khay yơn ăp nău ƀư rhŏ năch pâl nđaih bah nuĭh ƀon lan ta ntŭk hôm e ƀư uĕh. Nău pơk lhoi gŭ ƀah kon nuĭh, tâm di đah chôt srê Covid-19 tâm nu nău nâm ơm mhe tâm rơh aơ lah du nău ntrŭnh dŭt ngăch, tâm di nuih n’hâm ƀon lan. Kônh wa ta nkuăl têh Lạc Dương nchrăp tŏng ăp ndoh ndơ, kon nuĭh kan gay rhŏ uĕh ăp nău ŭch bah năch tâm năm mhe aơ. Bu ranh ƀon Krajan Plin, nkoch:

Jêh rlău 2 năm jŏ jong rlu yor srê Covid-19, chính phủ lĕ an ăp ntŭk tăch rgâl rhŏ tay tâm nu nău nâm ơm mhe gay hun hao wăng sa, n’hao nău rêh nkre njrăng n’gang srê, kônh wa ta ntŭk lah nsum n’hanh rnăk wâl lah êng nchrăp tŏng ăp, nchrăp rhop, nău ŭch uănh nsong, ngêt sa n’hanh tâm nđŭr văn hóa chĭng công bah năch tâm rơh tết aơ. Ăp ndơ bah ndơ sa, dak ngêt tât nău rgum rƀŭn chĭng gông lĕ nchrăp n’hanh ăp nău ƀư wơt năch tât aƀaơ geh nâm ơm. Yor rĭ, nău geh bah rnăk wâl đăp mpăn, tết đăp mpăn kơt ăp năm bah năp”.

Ndrel đah nău ƀư văn hóa chĭng gông n’hanh ndơ sa, ntŭk gŭ rêh nuĭh K’ho ta nkuăl têh Lạc Dương hôm e hun hao nău kan cheh tanh n’hanh ndrănh yăng gay tăch n’hanh pư năch. Tĭng wa Păng Ting K’Rè, ta ƀon Dơng 1, nkuăl têh Lạc Dương, nău kônh wa ntŭk aơ mât uĕh geh săk rnglăy ntŭk ntô văn hóa chĭng gông-ndrăp ndơ nkoch i mbung n’hanh mô mpơl săk kon nuĭh lĕ dơi UNESCO kơp dơn gay ƀư pâl nđaih du nău dơh têh an mât uĕh. Yor lah, pơng rgop dŭt têh nta an nău kan n’hanh n’hao nău geh prăk an dŭt âk rnăk, tâm nĕ geh âk nuĭh hao rklaih ach o n’hanh ƀư ndrŏng tâm di.

Gâp ƀư tĭng nău kan chĭng gông rhŏ an năch lĕ nsĭt tay nău geh sa, rgâl nău rêh rnăk wâl. Âk nuĭh pah kan ta ntŭk dơi geh nău kan, đăp mpăn nău rêh. Yor rĭ, ƀon lan nar lơ hun hao. Aơ lah nău kan ma rgop mât ndrăy nău uĕh ơm, ntĭm tay an druh ndăm wât văn hóa chĭng gông bah nơm, lah drăp ndơ bah u che glơi an geh nău khlay dŭt têh bah nuĭh K’ho lah êng n’hanh nsum mpôl rnoi mpôl đêt Tây Nguyên lah nsum”.

Tĭng wa Trần Xuân Đường, Kruanh UBND nkuăl têh Lạc Dương, nkuăl Lạc Dương, tă bah âk ntil ăp trong ƀư pâl nđaih lĕ nsĭt tay nău geh âk. Yor rĭ, mât ndrăy n’hanh ƀư uĕh ăp nău khlay văn hóa way ơm lĕ n’hanh dôl rƀŏng trong hun hao nău geh ma n’gâng kan ƀon lan dôl joi gay ntrŭt ntrôl. Ndrel đah ăp nău kan wăng sa êng, na nê̆ pâl nđaih ntŭk gŭ rêh lĕ rgop têh an trong kan n’hŭch ach o nâp nâl an ƀon lan. N’hêl na nê̆, lam nkuăl têh aƀaơ hôm e 16 rnăk ach o, rnăk ndrŏng n’hanh mbơm oi nar lơ hao. Wa Trần Xuân Đường an gĭt:

Mpôl hên lĕ geh trong rƀŏng pâl nđaih nsŭk gŭ rêh rgum tâm văn hóa rnoi mpôl,. ngăn lah chĭng gông. Nkre, ăp ntil ndơ ma kônh wa rnoi mpôl ta ntŭk ƀư luh gay rhŏ an năch kơt ndrănh yăng, tanh sah, dông, cheh tanh mbân ao... aơ lah ăp ndơ geh êng, ndơ ma năch pâl nđaih rnôk tât dŭt ŭch. Yor rĭ, pâl nđaih ntŭk gŭ rêh kơl kônh wa geh nău kan pah, hao nău geh, jŭt jăng ach o n’hanh ƀư ndrŏng an ƀon lan”.

Knơm gĭt mât uĕh nău geh mpeh văn hóa bah rnoi nơm, nuĭh K’ho bah dâng jâng yôk Langbiang, nkuăl têh Lạc Dương, nkuăl Lạc Dương (Lâm Đồng) lĕ pơk luh âk ntil pâl nđaih, nkre hun hao wăng sa nkre mât ndrăy nău uĕh way ơm. Đah trong hăn aơ, mbra tâm bah năp mô ngai, ntŭk aơ mbra jêng du ntŭk tât uĕh an ăp năch pâl nđaih âk ntŭk./.

                    Nuĭh rblang: Y Sưng Phê Ja